Abanya-Suède beretswe ishoramari ribategereje mu Rwanda ririmo n’umushinga wa Kigali Innovation City

Yanditswe na Ishimwe Israel
Kuya 10 Ukuboza 2020 saa 01:51
Yasuwe :
0 0

Umushinga wa Kigali Innovation City wagaragarijwe abashoramari bo muri Suède nk’umwe mu y’ikoranabuhanga iri mu ishoramari bashobora kubyaza umusaruro mu Rwanda.

Byagarutsweho mu nama yateguwe n’Urugaga rw’Abikorera mu Rwanda (PSF) n’Akanama k’Ubucuruzi muri Afurika y’Iburasirazuba ka Suède (SWEACC), yabaye hifashishijwe ikoranabuhanga, kuri uyu wa Kane.

Iyi nama yibanze by’umwihariko ku hari amahirwe y’ishoramari mu Rwanda no muri Suède, mu bijyanye n’Ikoranabuhanga, Ubuzima, Uburezi, Ingufu, Serivisi z’imari, Ubwikorezi n’Itumanaho bigezweho.

Yaganiriwemo ubufatanye buhuriweho mu guhanahana amakuru y’ubucuruzi binyuze mu nama, amahugurwa n’ingendoshuri, bigamije koroshya ubucuruzi no kwerekana amahirwe y’ishoramari ari muri buri gihugu.

Ubwo bufatanye bugamije kuzamura imikoranire hagati y’abashoramari b’ibihugu byombi, bukazibanda ku kongera ubumenyi, ishoramari no guteza imbere ubucuruzi.

Mu rwego rw’ubuzima, Ikigo Babylon Health gikorera mu Rwanda ku izina rya Babyl ndetse n’icya Gynius Plus AB cyo muri Suède byagarutse kuri serivisi bitanga n’icyakorwa birushijeho.

Umuyobozi wa Babyl Rwanda, Shivon Byamukama, yavuze ko kuva mu 2016, batangiye gukorera mu gihugu bamaze guhanga imirimo isaga 300 muri serivisi z’ubuzima zitangwa hifashishijwe ikoranabuhanga.

Dr. Huaging Li washinze Gynius Plus AB, yavuze ko bakoresha ikoranabuhanga rigezweho mu buvuzi bwo mu kinyejana cya 21.

Ati “Twabonye hari imbogamizi mu guhangana na kanseri y’inkondo y’umura yibasira benshi barimo n’abo mu Karere ka Afurika y’Iburasirazuba. Dufite ikoranabuhanga rifasha gutanga amakuru yihuse. Igisubizo cyacu ni ukubona ibikoresho n’ikoranabuhanga rifasha mu kuvura kanseri y’inkondo y’umura. Ibi biganiro ni ingenzi mu mu kuryagura no gutanga umurongo.’’

Impamvu zituma ba rwiyemezamirimo bahitamo gushora imari yabo mu Rwanda zirimo kuba rworohereza ishoramari, imbaduko rufite mu ikoranabuhanga, umutekano, ingendo zo mu kirere zorohejwe na RwandAir n’ibindi.

Raporo ya Doing Business Banki y’Isi iheruka gushyira u Rwanda ku mwanya wa kabiri muri Afurika yo Munsi y’Ubutayu bwa Sahara mu korohereza abashoramari, rukaza ku mwanya wa 38 ku Isi.

Umujyanama wa Guverinoma mu bijyanye n’igenabikorwa n’imishinga muri Kigali Innovation City, Philip Gasaatura, yasobanuye ko hari byinshi bituma u Rwanda rwishimirwa n’abashoramari.

Yakomeje ati “Mu myaka ishize, hagaragaye ibigo byinshi bifite abanyempano. Hari abantu benshi baje kureba uko ishoramari ry’u Rwanda rimeze barimo nka Volkswagen ihateranyiriza imodoka, ndetse hari no kwigwa uko hakoreshwa imodoka zikoresha amashanyarazi.’’

Yavuze ku Kigega Africa50 cyasinyanye n’u Rwanda amasezerano y’ubufatanye ya miliyoni 400$, agamije kunoza no gutera inkunga umushinga wa KIC uri mu ihanze amaso mu gufasha igihugu kuba igicumbi cy’ikoranabuhanga no guhanga ibishya.

Umushinga wa KIC wubatswe mu gace kahariwe inganda, uzatwara miliyari $2. Uzaba igicumbi cya kaminuza mpuzamahanga, ibigo by’ikoranabuhanga, inyubako z’ubucuruzi n’ibindi.

Ambasaderi w’u Rwanda muri Suède, Nkulikiyinka Christine, yavuze ko bihebuje kubona hari amahirwe menshi yo gukorana hagati y’ibihugu byombi.

Ati “KIC ni umushinga w’ingenzi kandi benshi bashobora kwitabira kuwukoresha. Tugomba guhana uburyo bwo kuganira ndetse abitabiriye iki gikorwa bakaba ba ambasaderi ku buryo twabona abantu benshi, haba mu bigo byo mu Rwanda na Suède.’’

Yijeje ibigo bizakenera ubufasha bwa Ambasade kuyigana mu Mujyi wa Stockholm, bakareba ibyo gukorera hamwe mu nyungu rusange.

PSF na SWEACC byatangaje ko byiteguye kubafasha kugira ngo abagiranye ubufasha mu biganiro bazabashe gukorana.

Ishoramari ry’abanyamahanga, Foreign Direct Investments (FDI’s) mu Rwanda rikomeje kuzamuka kuko mu 2010 ryari rifite agaciro ka miliyoni $251, mu 2017 ryari miliyari $1.5 mu gihe mu 2019 ryari miliyari $2.46.

Suède yubakiye ubukungu bwayo ku bucuruzi mpuzamahanga bw’ibyo yohereza hanze ndetse n’itumanaho rihagaze neza. Ni igihugu gifite ubunararibonye mu bucuruzi mpuzamahanga ndetse urwego rw’ubwenjeniyeri buteye imbere cyane kuko rugize 50% by’umusaruro w’ibyoherezwa mu mahanga.

Inyubako nshya ya Carnegie Mellon University (CMU) mu mishinga iremereye u Rwanda rufite muri Kigali Innovation City

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .