Abantu 144 bafashwe batwaye imodoka ’basinze’

Yanditswe na IGIHE
Kuya 16 Nzeri 2019 saa 09:38
Yasuwe :
0 0

Polisi y’u Rwanda yatangaje ko mpera z’icyumweru cyasojwe yafashe abatwara ibinyabiziga basinze barenga 140, binangiye gukurikiza inama zo kwirinda gutwara ibinyabiziga banyoye inzoga.

Ni ibikorwa byatangiye ku wa Gatanu aho hafashwe abagera kuri 80, ku wa Gatandatu hafatwa 37 mu gihe ku Cyumweru hafashwe abagera kuri 27 bose hamwe bakaba 144. Si byo gusa, hanafashwe n’abashoferi barenga 100 bacomokoye utugabanyamuvuduko.

Ni mu gihe Polisi y’u Rwanda imaze iminsi iburira ikanagira inama abatwara ibinyabiziga kwirinda gutwara basinze.

Ubwo yari mu kiganiro Waramutse Rwanda kuri Televiziyo Rwanda mu gitondo cyo kuri uyu wa mbere tariki 16 Nzeri, umuvugizi wa Polisi y’u Rwanda CP John Bosco Kabera yavuze ko muri rusange umutekano mu gihugu wifashe neza, ariko umutekano wo mu muhanda ukomeje kubangamirwa n’imyitwarire y’abantu batwara ibinyabiziga basinze aho bakomeje kugaragaza imyitwarire iteza impanuka.

Yagize ati “Umutekano muri rusange mu gihugu wifashe neza ariko hari bamwe mu batwara ibinyabiziga bakomeje guteza umutekano muke mu muhanda, bagateza impanuka zitwara ubuzima bw’abantu abandi zikabasigira ubumuga ndetse zikangiza n’ibikorwaremezo.”

Yongeyeho ko bitewe n’iyi myitwarire ikomeje kugaragara ku bantu batwara basinze, Polisi y’u Rwanda izakomeza kurushaho gukaza ibihano n’imikwabu yo kubafata hirya no hino mu gihugu.

Yagize ati “Ubu iyi mikwabu igiye kujya ikorwa mu gihugu hose haba mu mihanda minini ndetse n’uduhanda tuyishamikiyeho hagamijwe guhashya abatwara basinze kuko byagaragaye ko bakwepera muri iyo mihanda mito bakayitezamo impanuka.”

CP Kabera yavuze ko amande y’ufashwe atwaye ikinyabiziga yasinze ageze ku 150,000 Frw naho uwakubaganyije cyangwa agacomokora akagabanyamuvuduko ni 200,000 Frw kandi azakomeza kwiyongera uko abantu barushaho kutumva uburemere bw’iki cyaha cyo gutwara ikinyabiziga basinze.

Yongeyeho ko aya mande ari ayo gutwara wasinze cyangwa gucomokora akagabanyamuvuduko gusa, mu gihe bagusanganye andi makosa uzajya uyahanirwa ukwayo.

Umuvugizi wa Polisi y’u Rwanda yongeye gusaba abatwara ibinyabiziga basinze kubicikaho burundu, bagakurikiza inama bagirwa na Polisi zo gukurikiza amategeko y’umuhanda.

Polisi y’u Rwanda ivuga ko itabuza abantu kunywa no kwidagadura, ikibujijwe ni ugutwara ikinyabiziga wasinze no kwirengagiza amategeko y’umuhanda.
Abakoresha umuhanda basabwa kubahiriza amategeko n’amabwiriza biwugenga ndetse abagenzi bakirinda kureberera amakosa y’ababatwara.

Umuvugizi wa Polisi y'u Rwanda CP John Bosco Kabera avuga ko abatwara imodoka basinze bakomeje kubangamira umutekano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza