Abana 10% bavuka mu Rwanda baba badashyitse

Yanditswe na Hakizimana Jean Paul
Kuya 20 Ugushyingo 2019 saa 09:36
Yasuwe :
0 0

Minisitiri y’Ubuzima yatangaje ko mu bana bari hagati y’ibihumbi 37 na 40 bavuka buri mwaka mu Rwanda, 10% bavuka badashyitse abandi bakavuka igihe kitaragera bitewe n’impamvu zirimo indwara zo mu mubiri, malariya, kunywa imiti ya Kinyarwanda, kubyara uri muto n’ibindi.

Iyi minisiteri yagaragaje ko muri abo bavuka, 36% bapfa bazize ingaruka zo kuvuka igihe kitageze naho 60% bapfa batarageza umwaka umwe. Imibare kandi igaragaza ko 45% by’abana bapfa bari munsi y’imyaka itanu baba baravutse badashyitse.

Kuri uyu wa Kabiri tariki 19 Ugushyingo 2019 nibwo hizihijwe umunsi Mpuzamahanga w’abana bavutse badashyitse, ukaba ari ubwa mbere wizihijwe mu Rwanda, wizihirizwa mu Karere ka Kirehe ku bitaro bikuru by’aka Karere ahanatashywe ikigo cyigisha ababyeyi uburyo bwo kwita ku bana bavutse badashyitse mu mikurire yabo.

Insanganyamatsiko y’uyu munsi ikaba igira iti “Umwana wese uvutse adashyitse akwiriye kubaho.”

Umuyobozi Mukuru w’Ishami rishinzwe gukumira no kurwanya indwara mu kigo cy’igihugu cy’ubuzima, Dr Turate Innocent yavuze ko leta igerageze gutanga ibishoboka kugira ngo umwana akurikiranwe kuva agisamwa, ariko hari bamwe mu babyeyi batabyubahiriza, abasaba kwitwararika cyane.

Ati “10% ry’abana bavuka mu Rwanda bavuka badashyitse cyangwa se batagejeje igihe cyo kuvuka, icyo ni ikibazo rero gikunze no gutera impfu z’abana akenshi, zimwe mu ngamba zatuma turwanya iki kibazo harimo kuboneza urubyaro ndetse no gukurikiza inama zose uhawe na muganga n’ibindi.”

Umuyobozi wungirije w’Akarere ka Kirehe ushinzwe imibereho myiza y’abaturage Mukandarikanguye Geraldine, yitanzeho urugero rw’uko ubwo yabyaraga bwa mbere harenzeho iminsi itandatu ku gihe yari kuzabyarira abantu bakamugira inama yo gukoresha imiti ya Kinyarwanda gusa ngo kubw’amahirwe we n’umugabo we ntabwo babumviye ngo bahisemo gukurikiza inama za muganga.

Yasabye abaturage kwitwararika bagakoresha neza inama bahabwa n’abaganga.

Abangavu babyara imburagihe bari mu bazamura imibare y’abana bavuka badashyitse.

Urwego rw’Igihugu rw’ubugenzacyaha rugaragaza ko nibura mu myaka itatu ishize abangavu ibihumbi 70 basambanyijwe, abaganga bakerekana ko benshi mu babyara igihe kitageze bakanabyara abana badashyitse aba bangavu baza ku isonga ngo kuko usanga baterwa inda imibiri yabo itarakomera.

Dr Turate yavuze ko ubundi nta mwana wari ukwiye kubyara, kuko nawe aba ataragira amagufa akomeye. Yavuze ko hakwiye gukomeza gushyirwamo imbaraga mu kurwanya abasambanya aba bana kugira ngo n’imibare igabanuke.

Nzayisenga Grace utuye mu Murenge wa Kigina yatanze ubuhamya bw’ukuntu yabyaye bwa mbere akabyara abana babiri batarageza igihe,akababyara bafite ibyumweru 34, abaganga bamwitaho kugeza abana be bagejeje ibiro bikwiriye.

Yasabye ko ubu buryo bwo kwita ku bana batarageza igihe bwamanurwa hasi mu bajyanama b’ubuzima ngo kuko aribwo byagira umusaruro cyane mu baturage.

Umuyobozi w’Ishami rishinzwe kubungabunga ubuzima bw’umwana n’umubyeyi n’ubuvuzi rusange muri minisiteri y’ubuzima Dr Felix Sayinzoga, avuga ko bafashe ingamba zo kwita ku mubyeyi kuva akivuka kugira ngo bakumire buri kimwe cyose cyatuma abyara igihe kitageze.

Ati “Ingamba ya mbere ni uguhera umwana agisamwa kuko niho hakunze kugaragara ibibazo, icya mbere dusaba nuko ababyeyi baza kwisuzumisha kuva bakimenya yuko basamye bakaza kwa muganga bakabakurikirana bishobora gutuma ikintu cyose cyatuma babyara igihe kitageze kivurwa cyangwa kigafatirwa ingamba.”

Mu bitaro bya Kirehe nibura buri kwezi ngo havukira abana bari hagati ya batanu n’icumi bavuka badashyitse, ngo umwana udashyitse avukana amagarama guhera kuri 500 kuzamura.

Dr Trate Innocent yasabye abaturage kujya bakurikiza inama za muganga aho kwizera ibyo babwirwa n'abandi bantu
Dr Turate Innocent yishimiye ukuntu mu bitaro bya Kirehe bita ku bana baba bavutse igihe kitaragera
Abayobozi batandukanye bitabiriye umunsi wo kuzirikana ku bana bavuze igihe kitageze
Nzayisenga Grace yatanze ubuhamya bw'ukuntu abana be bavukiye ibyumweru 34 bakitabwaho n'abaganga kugeza bakuze
Umuyobozi w'Akarere ka Kirehe wungirije ushinzwe imibereho myiza y'abaturage Mukandarikanguye Geraldine yavuze ukuntu abaturanyi bashatse kumushuka ngo akoreshe imiti ya kinyarwanda ngo kugira ngo abyare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza