00:00:00 IGIHE NETWORK KN KINYARWANDA EN ENGLISH FR FRANCAIS

Abambura aborozi bagiye kujya bashyirwa ku ntonde za ba bihemu

Yanditswe na Hakizimana Jean Paul
Kuya 28 Ukuboza 2022 saa 01:13
Yasuwe :

Ikigo gishinzwe guteza imbere Ubuhinzi n’Ubworozi (RAB) kiratangaza ko cyatangiye gusaba uturere kugikorera urutonde rwa ba rwiyemezamirimo bakunze gufata amata y’aborozi ntibabishyure, kugira ngo bashyirwe ku ntonde za ba bihemu kuko baba batifuriza iterambere igihugu.

Ibi byagarutsweho kuri uyu wa Kabiri tariki ya 27 Ukuboza 2022 ubwo mu Karere ka Kayonza haberaga inama nyunguranabitekerezo ku ngamba zigamije iterambere ry’ubworozi, uburyo bwo gufata neza ibikorwaremezo by’ubworozi ndetse n’uburyo bwakoreshwa mu kongera umukamo.

Muri iyi nama hagaragajwe ko ba rwiyemezamirimo bagura amata y’aborozi bakunze kubambura bikaba bimwe mu bisubiza inyuma iterambere ry’ubworozi, kuri ubu aborozi bamaze kwamburwa miliyoni 43 Frw.

Umuyobozi w’ihuriro ry’aborozi mu Karere ka Kayonza, Sebudandi Stephen yavuze ko iki kibazo cy’aborozi bamburwa usanga gikunze gukorwa na ba rwiyemezamirimo bato, bafatirana aborozi bakabagurira amata yabo bamwe batari banayageza ku makusanyirizo.

Uretse uyu muyobozi hari n’aborozi bavuga ko batereye icyizere amakusanyirizo yabo nyuma yo kuyajyanaho amata, ba rwiyemezamirimo bakabambura kuri ubu bakaba barahisemo kuyigurishiriza.

Umuyobozi Mukuru Wungirije ushinzwe iterambere ry’Ubworozi muri RAB, Dr Uwituze yavuze ko kuri ubu batangiye gusaba uduce dukorerwamo ubworozi nka Gicumbi n’ahandi kubakorera intonde za ba rwiyemezamirimo bambuye aborozi, kugira ngo bashyirwe ku ntonde za ba bihemu.

Yakomeje asaba n’ubuyobozi bw’Akarere ka Kayonza kubakorera urwo rutonde ngo kuko uko bigaragara hari ababigize umwuga aho bambura aborozi mu mirenge itandukanye.

Ati “ Abo mubona badahari n’abahari turasaba ko mutwandikira urutonde rw’abo bantu, twe icyo dukora muri RAB na MINAGRI turwohereza muri RCA bakabashyira ku rutonde rw’aba bihemu.”

Dr Uwituze yakomeje asobanura ko iyo bamaze kubona urutonde rw’abashinjwa kwambura aborozi ngo barujyana ku ma banki .

Ati “Urwo rutonde turarujyana tukavugana n’amabanki tukababwira ngo aba bantu ntimuzongere gukorana nabo ni ba bihemu kugeza igihe bazishyurira abaturage.”

Kuri ubu Akarere ka Kayonza kabona umukamo ungana na litiro zirenga ibihumbi 20 , ni ukuvuga amata anyuzwa ku makusanyirizo. Ubuyobozi buvuga ko ubusanzwe haboneka litiro zirenga ibihumbi 76 amenshi akaba agurishwa abacunda, muri aka Karere kandi habarurwa inka zirenga ibihumbi 42.

Aborozi bamaze igihe binubira uburyo bagemura umukamo, bakamburwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .