00:00:00 IGIHE NETWORK KN KINYARWANDA EN ENGLISH FR FRANCAIS

Abakuru b’ibihugu bya EAC bamaganye imvugo zihembera urwango na Jenoside muri RDC

Yanditswe na IGIHE
Kuya 20 June 2022 saa 08:42
Yasuwe :

Abakuru b’Ibihugu bigize Umuryango wa Afurika y’Iburasirazuba, EAC, bamaganye imvugo zihembera urwango rwageza kuri Jenoside muri Repubulika Iharanira Demokarasi ya Congo.

Ibi aba Bakuru b’Ibihugu babigarutseho mu myanzuro yafatiwe mu nama yabahurije i Nairobi muri Kenya kuri uyu wa Mbere, tariki ya 20 Kamena 2022.

Iyi nama yitabiriwe na Perezida w’u Rwanda, Paul Kagame; uwa Uganda, Yoweri Kaguta Museveni; uw’u Burundi, Ndayishimiye Evaritse; uwa Sudani y’Epfo, Salva Kiir Mayardit; uwa RDC, Félix Antoine Tshisekedi n’uwa Kenya, Uhuru Kenyatta ari na we uyoboye EAC.

Perezida wa Tanzania, Samia Suluhu utabashije kugaragara muri iyi nama yari ahagarariwe na Ambasaderi w’iki gihugu muri Kenya, Dr. John Steven Simbachawene.

Iyi nama yari igamije kurebera hamwe uko hakemurwa ikibazo cy’umutekano muke mu Burasirazuba bwa Repubulika Iharanira Demokarasi ya Congo.

Yabaye mu gihe muri RDC hari ikibazo cy’intambara ihanganishije Ingabo za Leta, FARDC n’abarwanyi b’Umutwe wa M23, ibintu byabaye kidobya mu mubano w’u Rwanda n’iki gihugu kuko kirushinja kuwushyigikira.

Kimwe mu byemezo byafatiwe muri iyi nama ni uko aba bayobozi biyemeje kugira uruhare mu bikorwa by’ubwiyunge no guharanira ko mu Burasirazuba bwa RDC by’umwihariko mu Ntara ya Kivu y’Amajyaruguru, iy’Amajyepfo na Ituri hagaruka amahoro.

Umwanzuro wa munani mu yo bafashe uvuga ko imvugo n’ibikorwa biganisha kuri Jenoside bikorerwa abavuga Ikinyarwanda bigomba guhagarikwa.

Ugira uti “Abakuru b’ibihugu kandi bashimangiye ko imbwirwaruhame zibiba urwango, gukangisha gukora Jenoside n’imvugo za politiki zihembera urwango bigomba guhagarara kandi impande zose zikagira uruhare mu kubica intege ndetse Abanye-Congo bagashishikarizwa gukorera hamwe ngo bagarure ituze mu Burasirazuba bwa RDC, banayiteze imbere.’’

Abakuru b’Ibihugu kandi bemeje ko imyanzuro y’ihagarikwa ry’imirwano ishyirwa mu bikorwa ndetse n’ibikorwa byo guhagarika intambara birimo gukura abarwanyi mu birindiro bafashe, bigahita bitangira ako kanya.

Ibi bizafasha kubaka politiki ihamye izafasha abaturage bo muri RDC gutekana ndetse no gukomeza gukora ibikorwa byabo muri rusange nta nkomyi.

Abakuru b’ibihugu bigize EAC kandi basabye ko imvugo zo gutukana, iz’urwango ndetse n’ibikorwa bishobora kuganisha kuri Jenoside muri Repubulika Iharanira Demokarasi ya Congo bihagarara kandi impande zose bireba zikagira uruhare mu kugarura amahoro mu Burasirazuba bwa RDC.

Abakuru b’ibihugu bya EAC bamaganye imvugo zihembera urwango na Jenoside muri RDC. Ni umwe mu myanzuro yafatiwe mu Nama ya Gatatu yiga ku bibazo by'umutekano muke muri Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .