00:00:00 IGIHE NETWORK KN KINYARWANDA EN ENGLISH FR FRANCAIS

Abakuru b’ibihugu bitabiriye CHOGM bahuriye mu mwiherero (Amafoto)

Yanditswe na Philbert Girinema
Kuya 25 June 2022 saa 12:53
Yasuwe :

Abakuru b’ibihugu bari mu Rwanda bitabiriye inama ya CHOGM, bahuriye ku Intare Arena mu mwiherero ugomba gufatirwamo imyanzuro irimo n’aho itaha izabera.

Uyu mwiherero wabaye mu gitondo cyo kuri uyu wa Gatandatu. Ni wo uza kwemerezwamo imyanzuro y’iyi nama ndetse n’igihugu kigomba kuzakira inama ikurikira.

Ntabwo witabiriwe n’Igikomangoma Charles kuko we yaraye avuye mu Rwanda asubira mu Bwongereza.

Charles yavuye i Kigali amaze kwakira abakuru b’ibihugu na za guverinoma mu isangira ryagombaga kuyoborwa n’Umwamikazi w’u Bwongereza gusa kuko atabonetse ni we wamuhagarariye.

Minisitiri w’Intebe w’u Bwongereza, Boris Johnson, usoje manda ye y’imyaka ibiri nk’Umuyobozi wa Commonwealth, ari mu bitabiriye uyu mwiherero.

Witabiriwe kandi na Perezida Kagame watangiye inshingano zo kuba Umuyobozi wa Commonwealth mu gihe cy’imyaka ibiri. Igihugu cyakiriye inama gihita gifata inshingano z’ubuyobozi bwayo.

Minisitiri w’Intebe wa Canada, Justin Trudeau; Minisitiri w’Intebe wa Singapore, Lee Hsien Loong; Perezida Uhuru Kenyatta wa Kenya; Muhammadu Buhari wa Nigeria; Nana Akufo-Addo wa Ghana; Yoweli Kaguta Museveni wa Uganda; Umwami Mswati III wa Eswatini; Julius Maada Bio wa Sierra Leone; Hage Geingob wa Namibia n’abandi bari bitabiriye.

Umunyamabanga Mukuru wa Commonwealth, Patricia Scotland, nawe yitabiriye uyu mwiherero. Ni nyuma y’amasaha make abakuru b’ibihugu na za guverinoma bamugiriye icyizere bakamwongerera manda ye.

Manda y’Umunyamabanga Mukuru wa Commonwealth ubusanzwe imara imyaka ine. Iya Scotland yagombaga kurangira mu 2020 gusa amatora ntiyabayeho ahubwo abakuru b’ibihugu bafashe umwanzuro wo kumwongerera manda kugeza igihe inama izabera.

Inama y’i Kigali yanzuye ko manda ya Scotland yongerwaho imyaka ibiri kugira ngo yuzuze ine. Yari ahanganye n’umukandida watanzwe na Jamaica, Kamina Johnson Smith.

Minisitiri w'Intebe w'u Bwongereza, Boris Johnson, ubwo yageraga ku Intare Arena. Ubu ntabwo akiri Umuyobozi wa Commonwealth nyuma yo guhererekanya ububasha na Perezida Kagame
Boris asuhuza abanyamakuru bari ku Intare Arena
Minisitiri w'Intebe wa Canada, Justin Trudeau, ubwo yasohokaga mu modoka yamugejeje ku Intare Arena
Igihugu cye kiri mu bya mbere byatangiranye na Commonwealth ubwo yashingwaga mu 1926
Perezida Mokgweetsi Masisi wa Botswana (imbere iburyo) akurikiwe na Muhammadu Buhari wa Nigeria hamwe na Uhuru Kenyatta wa Kenya
Perezida Uhuru Kenyatta wa Kenya na Buhari wa Nigeria ubwo binjiraga ahabereye inama
Perezida Kagame watangiye inshingano zo kuyobora Commonwealth mu gihe cy'imyaka ibiri ubwo yageraga ahabereye iyi nama
Minisitiri w'Intebe wa Singapore, Lee Hsien Loong, asuhuza abanyamakuru ubwo yageraga ahabereye inama
Perezida wa Uganda, Yoweli Kaguta Museveni, ubwo yageraga ku Intare Arena. Igihugu cye cyakiriye inama nk'iyi mu 2007
Perezida wa Zambia, Haikande Hichilema, ubwo yageraga ku Intare Arena
Umwami Mswati III wa Eswatini agera ahabereye iyi nama
Perezida wa Namibia, Hage Geingob, ubwo yageraga ku Intare Arena
Umwami wa Brunei, Hassanal Bolkiah, ubwo yageraga ku Intare Arena
Perezida wa Ghana, Nana Akufo-Addo, azamuka ingazi zigana mu cyumba cya Intare Arena cyabereyemo iyi nama
Abakuru b'ibihugu baganira mbere yo kwinjira mu biganiro

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .