00:00:00 IGIHE NETWORK KN KINYARWANDA EN ENGLISH FR FRANCAIS

Abakuru b’ibihugu 40 bamaze kwemeza ko bazitabira CHOGM i Kigali

Yanditswe na Rabbi Malo Umucunguzi
Kuya 1 June 2022 saa 07:07
Yasuwe :

Minisitiri w’Ububanyi n’Amahanga, Dr. Vincent Biruta, yatangaje ko abakuru b’ibihugu na za Guverinoma bagera kuri 40 bamaze kwemeza ko bazitabira inama ya Commonwealth, izabera mu Rwanda muri Kamena.

Ni inama iteganyijwe hagati ya tariki 20-26 Kamena 2022, ikazitabirwa n’abantu barenga 5000 bazaturuka mu mahanga.

Minisitiri Dr Biruta yatangaje ko abayobozi benshi mu bihugu 52 bigize umuryango, bamaze kwemeza ko bazayitabira.

Yagize ati "Tumaze kugira abakuru b’ibihugu na za Guverinoma bageze kuri 40 bamaze kwemeza ko bazaza mu nama, kandi hari izindi nama nyishi zishamikiye ku y’abakuru b’ibihugu, inama y’urubyiruko, iy’abagore, inama irebana n’ubucuruzi, irebana n‘imiryango itari iya leta, byose birateganyijwe, imyiteguro iragenda neza, twumva rwose inama tuzayakira kandi ikagenda neza."

Biteganywa ko abazitabira inama bazakoranira mu nyubako esheshatu zirimo Kigali Convention Centre, M Hotel, Kigali Conference and Exhibition Village (Camp Kigali), Serena Kigali Hotel, Intare Conference Arena na Kigali Marriott Hotel.

Biteganywa ko hazaba ihuriro ry’abacuruzi (Commonwealth Business Forum), riteganyijwe ku wa 21 – 23 Kamena muri Kigali Conference and Exhibition Village hamenyerewe nka Camp Kigali. Rizitabirwa n’abantu basaga 1000.

Kwitabira iyi nama bizaba ari ukwishyura, aho abanyarwanda n’abaturage ba EAC bazasabwa $250, abakomoka hanze yayo bishyure $450. Abaziyandikisha nk’amatsinda cyangwa ibigo ni $350.

Hazaba kandi ihuriro ry’urubyiruko, riteganyijwe ku wa ku wa 19-21, ikazitabirwa n’urubyiruko rugera muri 350 muri Intare Conference Arena.

Indi nama izaherekeza CHOGM ni izwi nka Women’s Forum, ihuriro ry’abagore rizitabirwa n’abantu 500 ku wa 20-21 Kamena 2022, muri Kigali Serena Hotel.

Hanateganyijwe People’s Forum, icyiciro kizahuza abayobora imiryango itari iya Letaku wa 21-22 Kamena 2022 muri M Hotel i Kigali.

Muri ibyo bikorwa byose kandi hazaba Urubuga rw’abanyabugeni, aho kimwe mu bikorwa bitaganyijwe muri uru rwego ari Fashion Week, mbere yabaga buri mwaka ariko yari imyaka itatu itaba.

Ku wa 21 Kamena hazaba ibiganiro muri Kigali Conference and Exhibition Village, ku mugoroba habe Fashion Night Out kuri Atelier ku Kimihurura.

Ku wa Gatatu tariki 22 Kamena hazaba isangira ry’abanyabugeni kuri Poivre Noir, ku mugoroba habe Shop Tour.

Biteganyijwe ko mu gihe CHOGM izaba iba, ari bwo hazaba Rwanda Fashion Week Show 2022, muri Kigali Arena ishobora kwakira abantu 10,000.

Hazaba hari abashyitsi 800, ku buryo abazitabira iki gikorwa bakomeje kwiyandikisha kugeza muri Gicurasi.

Hanateganyijwe imikino itandukanye irimo umukino wa Golf uzaba binyuze mu irushanwa ryiswe CHOGM Rwanda Open Championship, ku wa 24 Kamena 2020.

Ni irushanwa rizabera kuri Kigali Golf Course i Nyarutarama, abakinnyi babiri bitabiriye CHOGM bo mu mahanga bagakina na babiri bo mu Rwanda. Ni igikorwa kizitabirwa n’abantu bagera mu 120.

Hari kandi CHOGM Street Festival izaba ku wa 20-25 Kamena 2022 mu Imbuga City Walk mu mujyi wa Kigali rwagati.

Ni igikorwa kizaba kirimo imyidagaduro ikomeye, kwinjira abantu bakazaba bishyura 5000 Frw, bakayafatamo ibyo bakeneye.

Hanateganyijwe icyiswe Kigali Peoples Festival, aho abantu bazahura bakidagadura mu mihanda itagendamo imodoka ya Gisimenti i Remera mu Karere ka Gasabo no mu Biryogo i Nyamirambo.

Minisitiri w’Ububanyi n’Amahanga, Dr. Vincent Biruta, yatangaje ko abakuru b'ibihugu na za Guverinoma 40 bamaze kwemeza ko bazitabira CHOGM
Minisitiri Dr Biruta kuri uyu wa Kabiri yaganiraga n'abanyamakuru ku ngingo zitandukanye
Umuvugizi wa Guverinoma y'u Rwanda, Yolande Makolo, yari muri iki kiganiro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .