Abakuriye ubugenzacyaha bwa RIB mu turere bahuguriwe guhangana n’icuruzwa ry’abantu

Yanditswe na Habimana James
Kuya 20 Kamena 2019 saa 08:38
Yasuwe :
0 0

Abayobozi bashinzwe ubugenzacyaha mu Rwego rw’Igihugu rushinzwe Ubugenzacyaha (RIB) ku rwego rw’Uturere bari guhabwa amahugurwa agamije kubafasha guhangana n’icuruzwa ry’abantu.

Aya mahugurwa y’iminsi itatu yatangiye kuri uyu wa Gatatu, agamije kongerera ubushobozi abakozi ba RIB mu kugenza ibi byaha, kubikumira no kubikoraho iperereza.

Umuyobozi w’Umuryango Mpuzamahanga ushinzwe Abimukira (IOM) mu Rwanda, Alia Hirji, yavuze ko aya mahugurwa ari imwe mu ntego z’uyu muryango zo kongera ubumenyi, gushyiramo imbaraga no guhuza ibikorwa byo guhangana n’icuruzwa ry’abantu.

Yavuze ko icuruzwa ry’abantu ari icyaha gikomeye kandi kiri mu bihugu byose ku Isi, kibangamiye uburenganzira bwa muntu.

Yagize ati “Tuzakomeza gufasha guverinoma y’u Rwanda kugira ngo abakorewe ibi byaha bahabwe ubutabera.”

Umuyobozi Mukuru ushinzwe Iperereza ku byaha muri RIB, Twagirayezu Jean Marie, yavuze ko mu myaka ishize gucuruza abantu cyane cyane abagore n’abana byabaye ikibazo gikomeye, cyashegeshe cyane umuryango mpuzamahanga.

Yavuze ko ubu bucuruzi ari ndengamipaka kandi bwugarije buri gace ku Isi, bukaba bwaramaze kwemezwa ku ruhando mpuzamahanga nk’ikibazo gikomereye umutekano wa muntu, uburenganzira bwa muntu ndetse n’ishyirwa mu bikorwa ry’amategeko.

Yagize ati “RIB ifite inshingano yo gukora iperereza rigamije kurwanya icuruzwa ry’abantu, guhana abashinjwa ubu burucuzi, gutanga uburinzi kuri abo bagizweho ingaruka n’ubu bucuruzi.”

Yavuze ko aya mahugurwa aje mu gihe umubare w’ibi byaha urimo kwiyongera, ibi bikaba bisaba RIB n’abandi gufatanya mu buryo bukomeye kandi hagashyirwaho ingamba nyazo zo kubikumira.

Urwego rw’Ubugenzacyaha (RIB) rugaragaza ko mu myaka itanu ishize mu Rwanda hagaragaye ibyaha 189 byo gucuruza abantu, byagizwemo uruhare n’abantu 378.

Nk’umwaka ushize gusa, ibyaha nk’ibyo byagaragaye ni 49, byarimo abantu 80.

Umuyobozi Mukuru ushinzwe Iperereza ku byaha mu Rwego rw'Igihugu rw'Ubugenzacyaha, RIB, Twagirayezu Jean Marie, yavuze ko mu myaka ishize gucuruza abantu cyane abagore n’abana byabaye ikibazo gikomeye
Abahagarariye ubugenzacyaba muri RIB ku turere barahugurwa uko barwanya icuruzwa ry’abantu
Umuyobozi w’Umuryango Mpuzamahanga w'Abimukira(IOM) mu Rwanda Alia Hirji, yavuze ko aya mahugurwa ari imwe mu ntego z'uyu muryango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza