Abakozi bo mu rugo basabiwe guhugurwa ku kwita ku mirire y’abana

Yanditswe na Hakizimana Jean Paul
Kuya 24 Mutarama 2020 saa 10:58
Yasuwe :
0 0

Urubyiruko rw’abakorerabushake rukorana na Polisi y’u Rwanda rwasabiye abakozi bo mu rugo amahugurwa ajyanye no kwita ku mirire y’abana ngo kuko mu ngo nyinshi usanga aribo bita ku mwana cyane kuruta uko ababyeyi be bamwitaho.

Hashize igihe ikibazo cy’imirire mibi n’ingaruka zacyo zirimo indwara ziterwa nayo kivugwa mu bihangayikishije Isi n’u Rwanda, ari nako hafatwa ingamba zitandukanye zigamije kukirandura burundu ariko ntibiragera ku kigero cyifuzwa.

Raporo y’Umuryango Mpuzamahanga wita ku Bana (UNICEF) ya 2016, yagaragaje ko mu bagera kuri miliyoni 667 bari munsi y’imyaka itanu ku Isi, abasaga miliyoni 159 bangana na 23% bari bafite ikibazo cyo kugwingira; 7,4% bafite icya bwaki; 6,1% bakagira icy’umubyibuho ukabije nka bimwe mu bituruka ku mirire mibi.

Ubushakashatsi bwakozwe n’Ikigo Mpuzamahanga gishinzwe Politiki z’Imirire, bwagaragaje ko mu 2017, abana bari munsi y’imyaka itanu muri Afurika bafite ikibazo cyo kugwingira bari ku gipimo cya 32% ndetse ibihugu byinshi byawo biri ku cya 40%.

Igenzura ryakozwe ku rwego rw’ubuzima bw’abaturage mu Rwanda mu 2015 (DHS), ryerekanye ko kugwingira ku bana bari munsi y’imyaka itanu bigabanuka ku muvuduko wa 1, 3 buri mwaka. Abari bagwingiye bageraga kuri 38% bavuye kuri 51% mu 2005 na 44% mu 2010; abana 9% bafite ibilo bidahagije ugereranije n’imyaka yabo, 2% bafite ibidahagije ugereranije n’uburebure bafite naho 37% bafite amaraso adahagije.

Ikibazo cyo guhangana n’imirire mibi kiri mu byagarutsweho mu ihuriro ry’urubyiruko rw’abakorerabushake rukorana na Polisi y’u Rwanda n’abayobozi mu nzego za leta, ryabaye ku nshuro ya kane ku wa 23 Mutarama 2020.

Uwitwa Mutoni waturutse mu Karere ka Nyarugenge yatanze icyifuzo ko abakozi bo mu ngo bahangwa ijisho muri urwo rugamba.

Yagize ati “Njye mbona dufite igikoni cy’umudugudu cyitabirwa ahanini n’ababyeyi kandi ingo nyinshi zireresha abakozi bo mu rugo. Ese muteganyiriza iki abakozi bo mu rugo mu kumenya guteka indyo yuzuye y’abana? Byaba bimaze iki duhugura ababyeyi kandi atari bo bita cyane ku bana. Bariya bakozi nifuza ko bahabwa amahugurwa ku gutegura indyo yuzuye.”

Umuhuzabikorwa wa Porogaramu y’Igihugu y’Abana Bato, Dr Asiimwe Anitha, yasubije uyu mukobwa ko bikwiriye ariko ngo nyina w’umwana ni we ukwiye gufata iya mbere mu kumwigisha.

Ati “Umubyeyi wabyaye uwo mwana niba koko asobanukiwe uburyo akwiye kubaho na we ku giti cye akwiye gufata umwanya akigisha wa mukozi we. Nubwo badufasha kurera abana, iyo tutakurikiye birangira batabitayeho neza. Tuzabitekerezaho neza tubinoze ndumva ntacyo byaba bitwaye.”

Umwe mu babyeyi baganiriye na IGIHE wo mu Karere ka Rwamagana usanzwe ukora muri imwe muri banki yavuze ko abakozi bo mu rugo bakwiriye amahugurwa.

Ati “Nkanjye mbyuka njya mu kazi nkagaruka ku mugoroba, ni ukuvuga ngo kuva umwana afite amezi atatu ni we umumenya, uretse wenda bike mwigisha ariko urumva umunsi wose bamarana simenya ngo amuha ibifite intungamubiri. Leta idufashije rero ikabagenera nk’amahugurwa rwose byadufasha cyane.”

Akomeza avuga ko mu ngo nyinshi usanga abakozi aribo bamenya abana kuva bafite amezi atatu kugeza ubwo bakuze bakamenya ubwenge, ngo hari nubwo uzana abaturutse mu cyaro ntibamenye kumugaburira neza kandi ibisabwa byose bihari.

Abahanga basobanura ko ingaruka z’imirire mibi zituma umwana adakura mu gihagararo no mu mitekerereze. Bigaragara iyo bamupimye bagasanga uburebure n’ibiro bye bidahuye n’imyaka ye.

Imibare ya 2015 igaragaza ko 38% by’abana bari munsi y’imyaka itanu mu Rwanda bagwingiye, abana 9% ntibari bafite ibiro bijyanye n’imyaka yabo, 3% bafite ikibazo cy’inzara mu gihe 78% by’abagore bonsanga abana bari hagati y’amezi 12 na 23 batafataga indyo yuzuye.

Akarere gafite abana benshi bagwingiye ni Nyabihu, ku kigereranyo cya 59%.

Urubyiruko rwasabiye abakozi bo mu ngo guhabwa amahugurwa abafasha gutegura indyo yuzuye
Rwahawe umwanya wo kubaza ibibazo bijyanye no kwita ku mirire y'abana
Umuhuzabikorwa wa Porogaramu y’Igihugu y’Abana Bato, Dr Asiimwe Anitha, yavuze ko umubyeyi ariwe wa mbere ufite inshingano zo kwita ku mwana we
Minisitiri w'Ubutegetsi bw'Igihugu, Prof. Shyaka Anastase, yatanze ikiganiro ku rubyiruko rwitabiriye iri huriro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza