00:00:00 IGIHE NETWORK KN KINYARWANDA EN ENGLISH FR FRANCAIS

Abakozi babiri b’Akarere ka Kicukiro batawe muri yombi bakekwaho ruswa

Yanditswe na IGIHE
Kuya 23 July 2022 saa 12:13
Yasuwe :

Urwego rw’Igihugu rw’Ubugenzacyaha (RIB) rwataye muri yombi abakozi babiri b’Akarere ka Kicukiro, bakekwaho kwaka ruswa nyuma yo gutera ubwoba umwe mu bashoramari bafite hoteli ko natabaha amafaranga barayifunga.

Amakuru agera kuri IGIHE, avuga ko abo bakozi b’akarere basabye nyiri hoteli miliyoni 1 Frw ngo batamufungira ubucuruzi, abemerera amadolari 400.

Uwo mushoramari yahise atanga amakuru kuri RIB, baza gufatirwa mu cyuho.

Abafashwe basanzwe bakora mu ishami rishinzwe isuku n’isukura mu Karere ka Kicukiro. Bafungiye kuri Sitasiyo ya RIB ya Gikondo mu gihe iperereza rikomeje.

Itegeko n°54/2018 ryo kuwa 13 Kanama 2018 ryerekeye kurwanya Ruswa ingingo ya 19 ivuga ko umuntu watanze cyangwa wakiriye indonke mu rwego rwo gufasha ubutabera kubona ibimenyetso ku cyaha cya ruswa ntafatwa nk’uwakoze icyaha iyo yabimenyesheje inzego z’ubutabera mbere y’uko icyo cyaha gikorwa.

Nta buryozwacyaha bubaho ku muntu watanze cyangwa wakiriye indonke, ubimenyesha inzego z’ubutabera mbere y’uko ikurikiranwa ry’icyaha ritangira, atanga amakuru cyangwa agaragaza ibimenyetso.

Ingingo ya kane y’iri tegeko ivuga ko umuntu wese usaba, utanga cyangwa wakira, mu buryo ubwo ari bwo bwose, indonke iyo ari yo yose, kuri we cyangwa ku wundi muntu cyangwa wemera amasezerano yabyo kugira ngo akore cyangwa adakora ikiri mu nshingano ze cyangwa yifashishije imirimo ye kugira ngo gikorwe cyangwa kidakorwa aba akoze icyaha.

Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda yikubye inshuro kuva kuri eshatu kugeza kuri eshanu z’agaciro k’indonke yatse cyangwa yakiriye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .