Abakozi ba Mobisol basuye urwibutso rwa Nyamata banatera inkunga abaharokokeye (Amafoto)

Yanditswe na Habimana James
Kuya 23 Mata 2019 saa 05:45
Yasuwe :
0 0

Abakozi n’abayobozi b’Ikigo gikwirakwiza Ingufu zikomoka ku mirasire y’Izuba (Mobisol), basuye urwibutso rwa Jenoside rwa Nyamata mu karere ka Bugesera, bunamira imibiri y’inzirakarengane ihashyinguye, banatanga ubufasha ku barokotse burimo za Televiziyo.

Ku rwibutso rwa Nyamata, abakozi ba Mobisol bari bayobowe n’umuyobozi mukuru wayo Kanimba Kayitesi Sylvie, babwiwe ubugome bw’indengakamere bwakorewe abatutsi bari bahungiye kuri Kiliziya ya Nyamata.

Umukozi wa Komisiyo y’Igihugu yo kurwanya Jenoside (CNLG), Muberuka Leon, ku rwibutso rwa Nyamata, yavuze ko kuva mu 1962 Abatutsi bo mu Bugesera bagiye bicwa bigeze mu 1994 abari bahatuye bararimburwa.

Yagize ati “Hano muri Bugesera kari agace aho Abatutsi bagiye bakusanyirizwa bavanwe hirya no hino mu gihugu. Aka kari agace kagizwe n’amashyamba intego yari uko babakusanya bakazaribwa n’inyamaswa ndetse n’isazi ya Tse-tse.”

Yavuze ko mu 1992 abatutsi bari batuye mu Bugesera bongeye kwibasirwa baricwa abandi bahungira kuri kiliziya ya Nyamata, uwitwaga Antonia Locatelli wakomokaga mu Butaliyani akaba yari n’Umuyobozi w’Ikigo cyigisha imyuga iciriritse (CERAI) cya Nyamata, niwe wafashishe abari bahungiye ndetse akajya atanga amakuru mu mahanga ko Abatutsi barimo gukorerwa Jenoside muri aka karere.

Mu 1992 abasirikare ba Perezida Habyarimana baje kumwica bamurashe kuko yarimo gushyira hanze ibyarimo kuba.

Mu 1994 abatutsi bongeye kwizera ko nibahungira kuri iyi Kiliziya bagombaga kurokoka, gusa siko byagenze kuko abarenga ibihumbi 10 bahiciwe. Ubu iyi Kiliziya yabaye urwibutso rushyinguyemo imibiri isanga ibihumbi 45.

Nyuma yo gusura uru rwibutso, abakozi ba Mobisol basuye imiryango 20 y’abarokotse Jenoside yatujwe mu kagari ka Murama, Umurenge wa Nyamata, babagenera za televiziyo zizajya zibafasha kureba amakuru no gukomeza kwivana mu bwigunge, banabagenera inkunga mu mishinga bafite ibateza imbere.

Mu butumwa yahaye aba baturage, Rwagaju Louis, ushinzwe Ubucuruzi bunini n’ubufatanye n’ibindi bigo muri Mobisol, yavuze ko baje gusura aba baturage babazaniye ubutumwa bwo kubakomeza.

Yagize ati “Murabizi ko igihugu cyahuye n’akaga gakomeye, nkatwe nka Mobisol dutanga serivisi nziza z’amashanyarazi twifuje kuzirikana akaga abatuye Nyamata baciyemo kubera ko aka ni karere mu turere Jenoside yakoranywemo ubukana bukomeye kandi Isi yose irabizi. Twaje kugira ngo twige kuko muri twe harimo abakiri bato, hari abumvaga amateka ya Nyamata ariko batarahagera.”

Yakomeje agira ati “Indi mpamvu ni uko Mobisol ifitanye amateka akomeye n’abaturage ba Bugesera, murabizi ko mbere y’uko tujya gukorera ahandi mu gihugu twabanje kuba hano muri aka karere kuva mu 2013, ni ukuvuga ko hano ari mu rugo.”

Yavuze ko Jenoside yabaye yateguwe n’ubuyobozi bubi, umukozi wese wa Mobisol n’undi munyarwanda wese akwiye kuba yumva ikibi cy’ubuyobozi bubi.

Yagize ati “Mu kigo cyacu hari abakozi baturuka ku Isi hose, kuzuzanya nibyo biranga abakozi ba Mobisol ariko twaniyemeje kwigisha n’abandi kuba abakozi b’amahoro. Ikindi kintu gikomeye ni uko dushima Perezida Paul Kagame kuko iyo Inkotanyi zitagera aha, ubu Bugesera iba imeze ite? uyu munsi se iki gihugu kiba kimeze gute?, iri ni ishimwe rikomeye.”

Rwagaju yavuze ko kuba aba baturage bari basanzwe bafite amashanyarazi ya Mobisol, bahisemo no kubaha televiziyo kugira ngo barebe amakuru yo hirya no hino mu gihugu no hanze, ndetse bajye bakurikirana umukuru w’igihugu aho yagiye.

Uwimana Tasiana warokokeye muri aka karere, yavuze inzira y’umurasaba abari batuye mu Bugesera banyuzemo, ashimira uburyo leta y’u Rwanda ikorana n’abafatanyabikorwa kugira ngo abarokotse bakomeze kwiyubaka.

Yagize ati “Mbere tutarabona amashanyarazi wasanga dutinya no kujya hanze ariko nyuma tuyabonye ubu dukora ku gikuta tugacana, kuba tubonye televiziyo za Mobisol, bigiye gutuma turushaho kumenya amakuru bitari ukuyumva gusa.”

Kugeza muri Gicurasi 2018 Mobisol yari imaze kugeza imirasire y’izuba mu ngo ibihumbi 27 mu gihe abantu 25 000 ari bo bakoreshaga serivisi zayo by’umwihariko abatuye ahataragera umuriro w’amashanyarazi.

Abakozi ba Mobisol ubwo bageraga ku rwibutso rwa Nyamata
Ubwo abakozi n'abayobozi ba Mobisol bageraga ku rwibutso rwa Nyamata
Bashyize indabo ku mva zishyinguyemo imibiri y'abazize Jenoside yakorewe Abatutsi
Aba baturage bahawe ubufasha bwa televiziyo
Bamwe mu barokotse Jenoside yakorewe Abatutsi bo mu Bugesera
Imiryango 20 niyo yahawe za televiziyo
Mobisol yanatanze inkunga yo gushyigikira uru rwibutso rwa Nyamata
Umuyobozi Mukuru wa Mobisol, Kanimba Kayitesi Sylvie asinya mu gitabo cy'abashyitsi ku rwibutso rwa Nyamata
Ragaju Louis yavuze ko Akarere ka Bugesera gafite amateka akomeye muri Jenoside yakorewe Abatutsi
Umuyobozi Mukuru wa Mobisol atanga Televiziyo

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza