Abakozi ba AB Bank Rwanda bibutse Abatutsi bazize Jenoside mu 1994

Yanditswe na IGIHE
Kuya 13 Mata 2019 saa 01:41
Yasuwe :
0 0

Abakozi n’abayobozi ba banki y’ubucuruzi ya AB Bank Rwanda, kuwa Kane w’iki cyumweru bifatanyije n’abandi banyarwanda bose Kwibuka ku nshuro ya 25 inzirakarengane z’abatutsi bazize Jenoside mu 1994.

Abakozi n’abayobozi ba AB Bank Rwanda bafashe umunota wo kwibuka inzirakarengane zazize Jenoside yakorewe abatutsi muri Mata 1994.

Umwe mu bakozi bayo, warokotse Jenoside yakorewe abatutsi, yatanze ubuhamya bw’inzira y’umusaraba yanyuzemo mu gihe cya Jenoside.

Umuyobozi wa AB Bank; Arah Sadava yavuze ko kwibuka bifasha abanyarwanda gukomeza kuzirikana abazize Jenoside no gukomeza abarokotse.

Ati “Buri mwaka, twibuka duha agaciro abazize Jenoside mu mahano yabaye mu myaka 25 ishize. Ibi bihora bitugaruka cyane mu mutwe, mu mutima no mu ngo zacu. Kwibuka bidufasha kugarura icyizere cy’ubuzima, tugasaba ubumwe, amahoro n’urukundo hagati yacu, tugafashanya, tunaba hafi ababuze ababo muri Jenoside.”

Arah Sadava yavuze ko kandi mu izina ry’ubuyobozi n’abakozi ba AB Bank, bazakomeza guha agaciro igikorwa cyo Kwibuka, barwanya ingengabitekerezo ya Jenoside aho iva ikagera, yongeraho ko bazakomeza kugira uruhare mu gufasha abanyarwanda kwibuka biyubaka.

Rwigemera Prosper, umwe mu bakozi ba AB Bank, yatanze ikiganiro kiri kuri gahunda yo Kwibuka ku nshuro ya 25, kibanze ku ngingo igira iti’ Ubumwe bw’abanyarwanda mu kubaka u Rwanda nyuma Jenoside, kurwanya ingengabitekerezo yayo no gusigasira ibyagezweho.’

Muri uyu muhango, hakozwe kandi amasengesho yo gusaba amahoro no kubabarirana hagati y’abanyarwanda, aho hacanywe urumuri rw’icyizere, hanarebwa filimi ikubiyemo ubuhamya bw’abarokotse Jenoside mu 1994.

AB Bank ni banki ikorera mu bihugu bitandatu bya Afurika, bitatu byo ku mugabane w’u Burayi ndetse no mu bindi byo muri Aziya yo hagati na Amerika y’Epfo, ikaba izobereye mu gutanga inguzanyo ku mishinga minini, iringaniye ndetse n’imishinga iciriritse.

AB Bank Rwanda yatangiye imirimo yayo mu 2014, ifite amashami atandatu arimo atanu ari mu mujyi wa Kigali, n’irindi riri mu mujyi wa Musanze.

JPEG - 339.1 kb
Abakozi nabayobozi ba AB Bank Rwanda bafashe umunota wo kwibuka inzirakarengane zazize Jenoside yakorewe Abatutsi mu 1994
JPEG - 239.6 kb
Herekakanywe kandi filime Ubumuntu
JPEG - 232.7 kb
Hatanzwe ikiganiro ku mateka yaranze u Rwanda mbere ya Jenoside ndetse naho rugeze mu kubaka ubumwe bw’abanyarwanda
JPEG - 253.9 kb
Umwe mu bakozi ba AB Bank warokotse Jenoside yakorewe Abatutsi yatanze ubuhamya bw’inzira y’umusaraba yanyuzemo mu gihe cya Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza