Abakozi ba AB Bank bibukijwe isano ibahuza binyuze muri Ndi Umunyarwanda

Yanditswe na Akayezu Jean de Dieu
Kuya 11 Mutarama 2019 saa 08:25
Yasuwe :
0 0

Umuyobozi ushinzwe guteza imbere ubufatanye no kubaka ubushobozi muri Komisiyo y’Ubumwe n’Ubwiyunge, Mukayiranga Laurence, yibukije abakozi ba AB Bank Rwanda, ko gukunda igihugu, kugikorera no kugiteza imbere bigomba kujyana no kumenya isano ihuza abanyarwanda

Yabigarutseho kuri uyu wa 10 Mutarama 2018, mu kiganiro yahaye abakozi b’iyi banki kuri gahunda ya Ndi Umunyarwanda.

Mukayiranga yibukije aba bakozi ko gahunda ya Ndi Umunyarwanda ikubiye mu bintu by’ingenzi birimo gusobanukirwa no kumva neza amateka u Rwanda rwanyuzemo n’ibikomere abanyarwanda batewe na Jenoside yakorewe Abatutsi.

Yakomeje avuga ko kuba abakozi b’iyi banki biganjemo urubyiruko ari inshingano zabo kumva ko kuba bavukira mu gihugu gifite amateka akomeye basabwa gukora iyo bwabaga bubaka ubudasa kandi banubaka igihugu cy’Abanyarwanda bose.

Ati “Urubyiruko rukomoka ku babyeyi banyuze mu bihe bya Jenoside yakorewe Abatutsi, murahamagarirwa kumva ko ari inshingano muhabwa zo kuba muvukira mu gihugu gifite amateka nk’aya kandi mukumva ko bitabasaba kubanza gusaza ngo mubone kugira umusanzu mutanga.”

Avuga kandi ko kumva neza amateka y’igihugu cyabo bizabafasha kumenya neza ko isano ibahuza ari Ubunyarwanda

Nyuma y’iki kiganiro abakozi b’iyi banki babwiye IGIHE ko bigiyemo byinshi by’umwihariko amateka y’u Rwanda kuko basobanuriwe aho igihugu cyavuye n’icyerekezo gifite.

Uwitwa Ndayisaba Obadiah yagize ati “Iki kiganiro cyadukanguriye kwibonamo ubunyarwanda cyane kurenza uko twakwibonamo indi shusho itandukanye, ikindi twigishijwe uko tugomba gukunda igihugu cyacu tukagikorera.”

Yakomeje agira ati “Twe nk’urubyiruko kandi byadufashije gusubira inyuma tureba amateka y’igihugu cyacu, tumenya aho cyavuye n’aho tugeze ubu. Ibyo rero bidutera imbaraga zo kuvuga ngo ni iki twakora kugira ngo dukomeze kugendera mu cyerekezo cyiza turimo.”

Umuyobozi ushinzwe abakozi muri AB Bank, Ntagawa Ngando Fidèle yabwiye IGIHE ko bifuje ko Komisiyo y’Ubumwe n’Ubwiyunge kubaganiriza kuri gahunda ya Ndi Umunyarwanda kugira ngo abakozi barusheho kumenya ibibahuza binabafashe kugira indangagaciro z’ubunyarwanda.

Ati “Abakozi ba banki, amasaha menshi baba bari mu kazi ariko hejuru y’uko ari abakozi ni abanyarwanda bakeneye kumenya icyerekezo cya guverinoma yacu ari nayo mpamvu twifuje ko baganirizwa kuri gahunda ya Ndi Umunyarwanda kugira ngo barusheho gukora ibiduhuza twese nk’Abanyarwanda.”

“Ni ukugira ngo kandi barusheho guha agaciro akazi kuko gukoresha abakozi bafite za ndangagaciro biroroha cyane, bagakora umurimo unoze banawukunze kandi bifasha kuzamura ikigo bakorera bikanazamura igihugu muri rusange.”

Abakozi ba AB Bank bahawe iki kiganiro kuri uyu wa Kane ni abo ku cyicaro cyayo mu Mujyi wa Kigali, ishami rya Nyarugenge, Nyabugogo na Nyamirambo. Ni ibiganiro bizakomereza mu yandi mashami y’iyi banki ari hirya no hino mu gihugu.

AB Bank Rwanda yatangiye ibikorwa mu Rwanda mu 2014 iteza imbere ibikorwa by’imari iciriritse itanga servisi ku bakiliya ku giti cyabo ndetse n’amasosiyete. Kugeza ubu imaze kugaba amashami agera kuri arindwi mu Rwanda.

Ni imwe mu mabanki agize Ikigo cy’amabanki Access Holding gikorera mu bihugu bitandatu muri Afurika, bitatu byo ku mugabane w’u Burayi, kimwe muri Aziya na kimwe muri Amerika y’Amajyepfo.

Abanyamigabane b’iyi banki harimo Access Holding Microfinance AG ikorera mu Budage, Banki y’Iterambere yo mu Budage, KFW n’Ikigega Mpuzamahanga cy’Imari, IFC.

Mukayiranga Laurence yasobanuriye abakozi ba AB Bank inkingi eshatu z'ingenzi zigize Ndi Umunyarwanda
Abakozi ba AB Bank basobanuriwe impamvu Ndi Umunyarwanda ikwiye kwimakazwa
Abakozi ba AB Bank mu mashami atandukanye mu Mujyi wa Kigali bari kuganirizwa kuri gahunda ya Ndi Umunyarwanda
Bahawe umwanya wo kubaza ibibazo bitandukanye kuri gahunda ya Ndi Umunyarwanda
Bamwe mu bakozi ba AB Bank bakurikiye ikiganiro bahawe na Komisiyo y'Ubumwe n'Ubwiyunge kuri gahunda ya Ndi Umunyarwanda
Umwe mu bakozi b'iyi banki atanze icyifuzo cy'uko ibiganiro kuri gahunda ya Ndi Umunyarwanda byajya bihabwa urubyiruko ariko n'ababyeyi bakaganirizwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza