00:00:00 IGIHE NETWORK KN KINYARWANDA EN ENGLISH FR FRANCAIS

Abakoresha Netflix mu Rwanda binubiye ikurwaho ryo gusangira ifatabuguzi

Yanditswe na Mukahirwa Diane
Kuya 30 Ukuboza 2022 saa 08:19
Yasuwe :

Niba wasangiraga na mugenzi wawe wa kure umubare w’ibanga ku buryo mwese mureba filime cyangwa ibiganiro ku rubuga rwa Netflix, iminsi isigaye ibarirwa ku ntoki kuko ubu buryo bugiye kuvanwaho.

Ni icyemezo ariko cyababaje benshi, barimo n’Abanyarwanda bakoresha Netflix mu kureba ibiganiro bitandukaye na filime zigezweho.

Netflix iheruka gutangaza ko guhera mu ntangiriro za 2023 hatazongera kubaho uburyo abafatabubuzi bayo basangizanya konti z’ifatabuguzi.

Ubusanzwe uwaguze ifatabuguzi rya Netflix yashoboraga guha abandi konti ye n’umubare w’ibanga, nabo bakabasha kureba amashusho ntacyo bishyuye.

Ni igikorwa ariko cyabangamiye cyane uburyo abantu bagura ifatabuguzi, kuko umuntu ashobora gusangiza konti ye n’umubare w’ibanga abantu ashatse, nta mupaka, bityo bakareba ibiganiro na filime kandi harishyuye umuntu umwe.

Ni ibintu bitari mu nyungu za Netflix, muri iki gihe itifashe neza mu bijyanye n’ubukungu.

Iyi sosiyete yavuze ko mu igenzura yakoze yasanze ingo zirenga miliyoni 100 zikoresha konti zishyuwe n’abandi bantu.

Ibi byatumye ifata umwanzuro ko ufite ifatabuguzi rya Netflix mu rugo rumwe, kurisangiza abandi bizajya bisaba kwishyura amadolari 1,70 nko muri Argentine n’amadolari 2,99 mu bindi bihugu.

Gusangira umubare w’ibanga ngo bizaguma gusa ku bantu baba hamwe, kandi Netflix iteganya kwifashisha uburyo bwo kugenzura amerekezo y’ibikoresho by’ikoranabuhanga bikoresha konti imwe hakoreshejwe ’IP address’, guhera mu 2023.

Bamwe mu banyarwanda bakoreshaga uburyo bwo gusangizanya ifatabuguzi bavuze ko kubikuraho hari byinshi byirengagijwe, kandi ko bizatuma umubare w’abakiliya ugabanuka.

Mahoro Emile yavuze ko abantu bajyaga bifatanya mu bushobozi bafite bakagura ifatabuguzi, ariko ko bitazongera kubaho.

Ati "Twe twifatanyaga turi nk’abantu bane buri wese agatanga make make tugafata ifatabuguzi, ubu rero ntabwo bizongera kubaho kandi nashoboraga kuba mfite make na mugenzi wanjye afite make, tugahuza. Hari igice cy’abantu Netflix yirengagije."

Isimbi Vanessa we yavuze ko iyi sosiyete yari ikwiye korohereza abafite ubushobozi buke bakabasha kureba filimi, mu gihe bafite ababishingira.

Ati "Hari abantu baba badafite ubushobozi bwo kwifatira ifatabuguzi, gusa afite umuntu nk’inshuti ye ushobora kumuhaho. Kubikuraho rero nk’abantu twabagaho gutyo baba baduhemukiye."

Muri Mata byatangajwe ko umubare w’abafatabuguzi bashya ba Netflix wabaganutse ku nshuro ya mbere mu myaka igera ku 10.

Icyo gihe byavugwaga ko uru rubuga rutambutsa filime n’ibindi biganiro by’amashusho rwatakaje abantu bari bafiteho konti ibihumbi 200 mu mezi atatu ya mbere y’uyu mwaka.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .