Abakoranaga na Cassien Ntamuhanga mu itsinda ry’iterabwoba bagiye gusubira mu rukiko

Yanditswe na Habimana James
Kuya 30 Gicurasi 2020 saa 02:09
Yasuwe :
0 0

Urukiko rukuru, Urugereko ruburanisha ibyaha mpuzamahanga n’ibyambukiranya imbibi ruherereye mu Karere ka Nyanza, rwatangaje ko tariki 9 Kamena uyu mwaka ari bwo ruzasubukura urubanza ruregwamo abantu 13, ibyaha by’iterabwoba, aba bakaba bari mu mugambi umwe na Cassien Ntamuhanga watorotse gereza ya Mpanga.

Urubanza rwabo rwagombaga kuba kuri uyu wa Gatatu ariko rwaje kwimurwa nyuma y’aho abanditsi b’Urukiko, bavuze ko bakeneye iminsi yo kwitegura.

Umwanditsi w’urukiko yavuze ko “Kubera umwanya ndetse n’imirimo myinshi, kongera kumva aba bantu bari mu bikorwa bimwe na Ntamuhanga byimuriwe tariki 9 Kamena uyu mwaka.”

Uko ari 13 batawe muri yombi mu 2018, bashinjwa ibyaha birimo kugambirira guteza umutekano muke mu gihugu, kugambirira kujya mu bikorwa by’iterabwoba no gukoresha ibikoresho biturika.

Ubushinjacyaha buvuga ko bari mu mugambi wo gukoresha ibintu biturika bagasenya bimwe mu bikorwa remezo mu Mujyi wa Kigali birimo sitasiyo za SP ziherereye i Gatsata, Uruganda rwa Inyange, ibiro bikuru by’Umuryango FPR-Inkotanyi biherereye i Rusororo n’ibindi. Bari kandi mu mugambi wo gukora ibikorwa by’iterabwoba ku bufasha bw’imitwe irimo uwa RNC.

Abazitaba urukiko barimo Phocas Ndayizeye, uyu yahoze ari umunyamakuru wa BBC, Eliakim Karangwa, Patrick Niyihoze, Garno Byiringiro, Bosco Rutaganda, Emmanuel Niyonkuru, Martin Munyensanga, Jean Claude Nshimyumuremyi, Terence Bizimana, Bonheur Bikorimana, Theoneste Ukurikiyimfura, Ernest Nshiragahinda na Yves Mushimiyimana.

Mu gihe baba bahamwe n’ibi byaha, bahanishwa gufungwa hagati y’imyaka 20 kugeza kuri 30.

Ntamuhanga ubu ari muri Mozambique

Cassien Ntamuhanga ari i Maputo muri Mozambique, aho akomeje gukwirakwiza amatwara ye ku bufasha bwa Kayumba Nyamwasa.

Uyu mugabo yatorotse gereza mu ijoro rishyira ku wa 31 Ukwakira 2017, aho Urwego rw’Igihugu rw’Imfungwa n’Abagororwa, RCS, rwaje kwemeza ko hamwe n’abo bajyanye “bakoresheje imigozi bakurira urukuta rwa gereza.”

Ntamuhanga wari umunyamakuru wa Radio Amazing Grace yaregwaga hamwe na Jean Paul Dukuzumuremyi, Agnes Niyibizi na Kizito Mihigo.

Yaje guhanishwa igifungo cy’imyaka 25 ku cyaha cyo kugambirira kugirira nabi Umukuru w’Igihugu, kuko ari cyo gihano kiruta ibindi urebeye ku byaha yahamijwe, birimo kurema umutwe w’abagizi ba nabi no gucura umugambi w’ibikorwa by’iterabwoba.

Amakuru agaragaza ko Ntamuhanga yacitse gereza aca muri Uganda na Afurika y’Epfo, acikishwa n’abantu batatu, ubu nabo baje gutabwa muri yombi ndetse bahabwa ibihano.

Abo ni Ephraim Munyentwari alias Kabayiza, n’abahungu be babiri aribo Pascal Niyitegeka na William Nzabandora. Bakatiwe gufungwa imyaka itatu.

Abasesenguzi mu by’umutekano bavuga ko ibikorwa Ntamuhanga akomeje kugaragaramo, birimo kumuharurira inzira zo kuba yatabwa muri yombi nka mugenzi we Callixte Nsabimana alias “Sankara”. Uyu wafatiwe muri Comores, ubu ari imbere y’ubutabera mu Rwanda.

Uko ari 13 bagiye gusubira mu rukiko kuburana ku byaha bakekwaho by'iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .