Abakandida 14 bahataniye gusimbura mu Nteko Nyirarukundo wagizwe Umunyamabanga wa Leta muri MINALOC

Yanditswe na Rabbi Malo Umucunguzi
Kuya 12 Ukuboza 2019 saa 09:20
Yasuwe :
0 0

Komisiyo y’Igihugu y’amatora yatangaje abakandida 14 bemejwe burundu, bagomba guhatanira binyuze mu matora, gusimbura Nyirarukundo Ignacienne wari watorewe guhagararira Intara y’Amajyepfo mu Nteko Ishinga amategeko – umutwe w’abadepite - uheruka kugirwa Umunyamabanga wa Leta muri Minisiteri y’Ubutegetsi bw’Igihugu, ushinzwe imibereho myiza y’abaturage.

Ku mugoroba wo ku wa 4 Ugushyingo 2019 nibwo Nyirarukundo yinjiye muri Guverinoma, asimbura Dr Mukabaramba Alvera wari umaze iminsi agizwe umusenateri.

Ku wa Kabiri nibwo hagiye hanze urutonde rw’abakandida bemejwe burundu bagomba guhatanira kwinjira mu nteko ishinga amategeko, muri manda izarangira mu 2023.

Umunyamabanga Nshingwabikorwa wa NEC, Munyaneza Charles yabwiye IGIHE ko nyuma yo gutangaza abakandida, "amatora azaba ku wa 8 Mutarama 2020, bazatangira kwiyamamaza mu cyumweru gitaha."

Mu bakandida 14 b’abagore bemejwe, umuto muri bo ni Mukabalisa Germaine w’imyaka 32, afite impamyabumenyi yo ku rwego rwa Master’s, naho umukuru muri bo ni Mukagatana Fortunée ufite imyaka 57, afite impamyabumenyi ya A0.

Umutwe w’Abadepite ugizwe n’Abadepite mirongo inani; barimo 53 bakomoka mu mitwe ya politiki, ishyirahamwe ry’imitwe ya politiki cyangwa biyamamaje ku giti cyabo, batorwa mu itora rusange ritaziguye kandi mu ibanga; 24 b’abagore; babiri batorwa n’Inama y’Igihugu y’Urubyiruko n’Umudepite umwe utorwa n’Inama y’Igihugu y’abantu bafite ubumuga.

Itegeko rigenga amatora riteganya ko mu gihe Umudepite utari ku ilisiti y’umutwe wa politiki cyangwa ishyirahamwe ry’imitwe ya politiki yeguye, apfuye, avanywe cyangwa agize indi mpamvu imubuza burundu gukomeza gukora umurimo yatorewe, Komisiyo imaze kubimenyeshwa na Perezida w’Umutwe w’Abadepite, ikoresha itora ryo kumusimbura iyo igihe cya manda gisigaye kirenze umwaka umwe. Umudepite utowe arangiza igice cyari gisigaye kuri manda y’uwo asimbuye.

Uburyo abadepite b’abagore batorwa

Ku rwego rwatoreweho, abakandida barushije abandi amajwi ni bo baba batowe hashingiwe ku mubare w’Abadepite wagenewe iyo fasi y’itora.

Icyakora, iyo hari abakandida nibura babiri banganyije amajwi kandi bahatanira umwanya wa nyuma kugira ngo umubare wa ngombwa w’imyanya uboneke, hakoreshwa irindi tora hagati y’abanganyije amajwi mu gihe kitarenze iminsi itatu.

Itora risubirwamo rimwe gusa, bakongera kunganya, hagakoreshwa tombola kugira ngo hamenyekane uwegukanye umwanya.

Inteko itora abadepite b’abagore iba igizwe n’abagize inama njyanama z’uturere tugize Intara abiyamamaza bakomokamo, biro za njyanama z’Imirenge igize uturere twayo n’abagize inama y’igihugu y’abagore ku rwego rw’uturere tw’iyo ntara.

Nyirarukundo aheruka kugirwa Umunyamabanga wa Leta muri Minisiteri y'Ubutegetsi bw'Igihugu, Ushinzwe Imibereho myiza y'abaturage
Abakandida bemejwe burundu na NEC
Abakandida bemejwe burundu na NEC {PDF}
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza