Abahungu batsinze ku manota yo hejuru mu bizamini bisoza abanza na Tronc Commun (Yavuguruwe)

Yanditswe na Ishimwe Israel
Kuya 31 Ukuboza 2018 saa 12:57
Yasuwe :
0 0

Amanota yatangajwe agaragaza ko mu banyeshuri 247 763 bakoze ibizamini bisoza abanza, abatsinze bangana na 81.1% bagera kuri 201 080.

Ni umuhango wabereye mu Cyumba cy’inama cya Minisiteri y’Uburezi (Mineduc) ku Kacyiru, kuri uyu wa Mbere, tariki ya 31 Ukuboza 2018.

Abatsinze bari mu cyiciro cya mbere mu mashuri abanza ni 8 271 bangana na 3.3%. Muri bo abakobwa bangana na 3736 (45.2%) mu gihe abahungu ari 4535 (54.8%).

Abanyeshuri bakoze ikizamini cy’Icyiciro Rusange mu 2018 bangana na 99 209. Muri bo abagera kuri 80 966 (83.3%) baratsinze. Abakobwa batsinze ni 41 990 (51,90%) mu gihe abahungu ari 38 976 (48.10%).

Muri Tronc Commun, abaje mu cyiciro cya mbere ni 9612 biganjemo abahungu 5825 (60.60%) mu gihe abakobwa ari 3787 (39.40%).

Umunyamabanga wa Leta ushinzwe Amashuri abanza n’Ayisumbuye, Munyakazi Isaac, yavuze ko amanota yatangajwe kare ngo bifashe mu myiteguro myiza.

Munyakazi yavuze ko hari abanyeshuri amanota yabo atasohotse kubera bafatiwe mu buriganya bashaka gukopera.

Ati ‘‘Hari ibitaragenze neza mu bizamini aho abana 149 bo mu mashuri abanza na 78 mu cyiciro rusange amanota yabo ntiyasohotse. Aba ni bo bagaragaye mu bikorwa by’uburiganya. Abenshi ni abarimu babakopeje. Minisiteri y’Uburezi twanzuye ko ababigizemo uruhare batangira gukurikiranwa.’’

Yavuze ko ‘‘Gukopeza bikwiye gucika. Umuco w’uburiganya ntukwiye kugaragara mu bo turera n’ababarera. Iyo bigaragaye mu bana ni icyaha gihanirwa kuko amanota ahinduka ubusa. Iyo bikozwe n’umurezi bifatwa nk’icyaha kitoroshye. Abarimu icyenda bafashwe bagiye gushyikirizwa inzego zibishinzwe, bahanwe bibere abandi urugero.’’

Abanyeshuri bafashwe bakopera hari kurebwa uko basubizwa mu mashuri aho gufatwa nk’ibicibwa.

Imibare y’abafatiwe mu bikorwa byo gukopera mu mwaka wa 2017 bari 354 mu mashuri abanza na 83 mu cyiciro rusange.

Ibizamini bisoza amashuri abanza byabaye ku wa 12-14 Ugushyingo 2018 mu gihe abakoze mu Cyiciro Rusange babikoze ku wa 20-30 Ugushyingo 2018.

Minisitiri w’Uburezi, Dr Mutimura Eugène, yavuze ko batangiye guhemba abanyeshuri batsinze ku manota yo hejuru ndetse hanazirikanwa ibigo byitwara neza by’umwihariko mu cyaro.

Yagize ati “Twishimiye kwicarana n’abanyeshuri bakoze neza mu mwaka w’amashuri turifuza ko uyu muco uzakomeza. Aya manota turayishimiye cyane kandi turatekereza ko mu mwaka utaha bizagenda neza.”

Abanyeshuri 10 ba mbere mu mashuri abanza n’abo mu cyiciro rusange bahembwe mudasobwa, ndetse bazanahabwa internet izabafasha gukurikirana amasomo yabo neza.

Ishema Blessing Gianna wize muri Kigali Parents School yabaye uwa mbere mu bakoze ibizamini by’amashuri abanza mu gihe Ishimwe Christian wo muri Ecole des Sciences de Byimana yahize abandi mu cyiciro rusange mu mwaka w’amashuri wa 2018.

Abanyeshuri bose bari mu byiciro bine bya mbere bafatwa nk’abatsinze ndetse Mineduc niyo igena ibigo boherezwamo.

Abashaka kureba amanota y’abakoze ibizamini banyura kuri www.reb.rw ugakanda ahanditse View result, ugakurikiza amabwiriza. Ushobora no gukoresha telefoni igendanwa ukandika S3 ku biga muri Tronc Commun na P6 ku b’amashuri abanza, ugashyiraho kode yawe hanyuma ukohereza kuri 4891.

Ingengabihe ya Mineduc y’umwaka w’amashuri abanza n’ayisumbuye wa 2019 igaragaza ko uzatangira ku wa 14 Mutarama.

Abanyeshuri babonye amanota meza mu bizamini bisoza amashuri abanza n'icyiciro cya mbere bahembwe mudasobwa
Ababyeyi bari bagaragiye abana babo bitwaye neza mu bizamini bya Leta
Ishema Blessing Gianna wize muri Kigali Parents School yahembwe nk'uwabaye uwa mbere mu gihugu mu bakoze ibizamini by’amashuri abanza
Minisitiri Mutimura yavuze ko hari gahunda yo guteza imbere impano z'abato binyuze mu mikino itandukanye no guteza imbere ikoranabuhanga
Umuhango wo gutangaza amanota wabereye mu Cyumba cy'Inama cya Minisiteri y'Uburezi ku Kacyiru
Umuyobozi Mukuru w'Ikigo cy'Igihugu gishinzwe Uburezi, REB, Dr Ndayambaje Irénée (iburyo)
Umunyamabanga wa Leta ushinzwe Amashuri abanza n’Ayisumbuye, Munyakazi Isaac, yavuze ko amanota yatangajwe kare ngo bifashe ababyeyi n'abana kwitegura umwaka w'amashuri neza

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza