00:00:00 IGIHE NETWORK KN KINYARWANDA EN ENGLISH FR FRANCAIS

Abahuguwe na British Council bahize guteza imbere ururimi rw’Icyongereza mu mashuri abanza

Yanditswe na Ntabareshya Jean de Dieu
Kuya 17 May 2022 saa 03:50
Yasuwe :

Abarimu bigisha mu mashuri abanza bahuguwe n’Umuryango ugamije guteza imbere uburezi by’umwihariko ururimi rw’Icyongereza bagaragaje ko bagiye gukora ibishoboka byose kugira ngo uru rurimi rurusheho gutezwa imbere mu mashuri abanza.

Aba barimu basaga 2500 ni abo mu turere dutandukanye dukorerwamo n’umushinga Building Learning Foundations watangijwe mu Rwanda mu 2017 ugamije guteza imbere Icyongereza n’Imibare mu mashuri y’icyiciro kibanza cy’abanza.

Ni umushinga watewe inkunga n’u Bwongereza, ushyirwa mu bikorwa n’imiryango itandukanye aho British Council bakurikiranye ibyo guteza imbere Icyongereza naho imibare ikurikiranwa n’Umuryango Education Development Trust.

Uyu mushinga watangiranye gahunda zo guhugura abarimu bigisha Icyongereza mu mashuri abanza ariko mu byiciro bitandukanye birimo abarimu bigisha ururimi rw’Icyongereza mu mashuri ya Leta n’afashwa nayo, abarimu bahagarariye abarimu b’Icyongereza aho hatoranywa umwe muri buri kigo ndetse n’abarimu bazahugura abandi ku bigo by’amashuri.

Mu guhugura abarimu ariko hifashishwaga uburyo bubiri butandukanye burimo gukoresha iya kure ku barimu byagararaga ko bafite ubumenyi bwisumbuye ndetse no gukoresha imbonankubone ku barimu bigarara ko hakiri urugendo rwo kumenya Icyongereza.

Icyakora kuva icyorezo cya Covid-19 cyagera mu Rwanda, uburyo bwo guhugura abantu imbonankubone bwarahagaze hakomeza uburyo bwo guhugura hifashishijwe ikoranabuhanga.

Kuwa Gatandatu tariki ya 14 Gicurasi 2022 hasojwe icyiciro cya gatatu cy’abandi barimu bahuguwe ku kwigisha Icyongereza mu mashuri abanza mu turere 11.

Abahuguwe bavuze ko biteze ubumenyi buzabafasha guteza imbere abanyeshuri bo mu mashuri abanza.

Umwe yagize ati “Ubundi umwana apfa mu iterura, iyo urebye kwigisha umwana akiri muto bimufasha gusobanukirwa ibintu byinshi. Amahugurwa twahawe natwe azadufasha kurushaho gufasha abana bacu bakiri bato hanyuma bakure bazi neza ururimi rw’Icyongereza.”

Umuyobozi Mukuru wa British Council, Scott McDonald, uri mu Rwanda yagaragaje ko bahisemo kwibanda ku kwigisha Cyongereza abarimu kuko ari bo shyiga ry’inyuma mu kugiteza imbere.

Yakomeje agira ati “Ubusanzwe duteza imbere inkingi y’uburezi. Impamvu twahisemo guhugura abarimu ni uko tuzi neza ko uburezi ari yo nkingi n’izingiro rya byose. Iyo ushaka kubaka icyizere nta handi washingira bitari uburezi, abarimu rero bigisha urubyiruko, bakigisha abayobozi b’Isi rero aho niho tugomba guhanga amaso.”

Yagaragaje ko kugeza ubu Covid-19 yagaragaje ko ikoranabuhanga rikwiye kurushaho gukoreshwa mu bikorwa bitandukanye by’umwihariko no mu mashuri kandi ko rishobora gutanga umusaruro bigendanye n’abarikoresheje.

Scott McDonald yahishuye ko kugeza ubu hari gukorwa ibishoboka kugira ngo uyu mushinga uhugura abarimu bo mu mashuri abanza bigisha Icyongereza wongererwe ubushobozi ugere no ku barimu bari mu bindi byiciro byisumbuyeho n’ubwo biteganyijwe ko uzasozwa mu 2023.

Biteganyijwe kandi ko binyuze mu mushinga Building Learning Foundations, abarimu basaga ibihumbi 42 bazahugurwa baturutse ku bigo bisaga 2600 mu gihe byanabyaye amahirwe y’akazi ku bantu batandukanye kuko kuri ubu Abanyarwanda bagera kuri 200 babonyemo akazi n’Abanyamahanga 35.

Aba barimu basabwe gushyiramo imbaraga mu kwigisha Icyongereza
Aba barimu bagaragaje ko bagiye gushyiramo imbaraga
Abarimu bahugura abandi nabo bagaragaza ko guteza imbere ururimi bikwiye guhera mu bana bato
Abarimu basoje aya mahugurwa banahawe ibihembo birimo Tablets
Hagenzurwaga ko buri mwarimu yahawe ibimugenewe
Tablets bahawe ni izibafasha gukomeza kwihugura bifashishije ikoranabuhanga
Umuyobozi Mukuru wa British Council, Scott McDonald yavuze ko bahisemo guteza imbere icyongereza bahugura abarimu bakigisha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .