COVID-19: Polisi yerekanye abantu 16 biganjemo abakobwa bateguye ibirori by’isabukuru (Amafoto & Video)

Yanditswe na Mukahirwa Diane
Kuya 23 Ukuboza 2020 saa 06:18
Yasuwe :
0 0

Polisi y’u Rwanda yerekanye abakobwa 14 n’abahungu babiri barenze ku mabwiriza yo kwirinda COVID-19 aho ku wa Gatandatu tariki ya 19 Ukuboza 2020 bahuriye hamwe mu birori by’isabukuru.

Ibirori n’indi mihuro ihuza abantu benshi ni bimwe mu bibujijwe muri iki gihe icyorezo cya COVID-19 cyakajije ibintu mu gihugu. Gusa ku wa Gatandatu mu Murenge wa Kimironko habaye isabukuru yitabiriwe n’abakobwa 14 n’abasore babiri, barasabana babyina umuziki biratinda.

Ibyo birori byari biteguye ku buryo urusaku rutabasha gusohoka aho bari kuko buri wese yifashishaga écouteurs mu kumva umuziki, ibizwi nka Silent Disco.

Nubwo babikoze mu mayeri menshi, Polisi yaje kumenya amakuru y’ibi birori ikurikirana abitabiriye iyi sabukuru kugira ngo bahanirwe ko barenze ku mabwiriza yo kwirinda COVID-19.

Nyuma yo gufatwa, uru urubyiruko rwemeye ko rwakoze amakosa yo kurenga ku mabwiriza yo kwirinda COVID-19.

Shema Deborah wari wagize isabukuru yagize ati “Twateguye ibi birori kuva mbere gusa umunsi ugera haragiyeho ingamba zo kwirinda COVID-19. Twe rero ntabwo twahagaritse, twakoze ibirori nk’uko twabiteguye nyuma Polisi iza kumenya amakuru. Rwose ni amakosa twakoze ariko ntituzongera.”

Uyu mukobwa na bagenzi be basabye imbabazi ku bwo gukora igikorwa gishobora gushyira mu kaga ubuzima bw’abaturarwanda kuko cyaba intandaro yo gukwirakwira kwa Coronavirus.

Ati “Ni amakosa twakoze gusa ntabwo tuzongera kandi n’abandi bari gutegura ibi birori nabagira inama yo kuba babiretse kuko COVID-19 irica kandi iyo utubahirije amabwiriza uba uri kwishyira mu kaga.”

Ibi abihuje na Iribagiza Arlette wavuze ko bidakwiye ko abantu bategura amasabukuru muri iki igihe icyorezo kimeze nabi.

Ati “Buri muntu wese akwiye kumenya ko COVID-19 yica abantu n’abandi bakaremba, buri muntu wese akwiye gukurikiza amabwiriza kugeza igihe izashirira. Kandi burya amagara araseseka ntayorwa, haracyari igihe kinini cyo kwishimisha, abantu birinde gutegura ibirori dutegereze ibihe byiza bizaza.”

Umuvugizi wa Polisi y’u Rwanda, CP John Bosco Kabera, yavuze ko abantu bahimbye amayeri ku buryo bategura ibirori mu buryo bwa Silent Disco amajwi adasohoka, aho bigoye ko bafatwa, ariko asaba abaturage ko bakwiye kureba ahateraniye abantu bagatanga amakuru.

Ati “Ubu abantu bahimbye amayeri y’uko bazana za Silent Disco amajwi ntiyumvikane ariko ibirori bigakorwa bakabyina kakahava, turasaba Abanyarwanda ko n’iyo batazumva umuziki ariko bakabona ahantu hateraniye abantu bakwiye guhamagara polisi bakayiha amakuru.”

Yakomeje asaba Abanyarwanda ko bakwiye gushishoza bakita ku buzima bwabo muri iki gihe cy’icyorezo kuko gutegura isabukuru ari ibyo gushyira ubuzima bwabo mu kaga.

Ati “Kwizihiza isabukuru ni byiza kandi biranashimishije ariko noneho kuyizihiza muri ibi bihe ukaba wakuramo COVID-19 ikaguhungubanya ntacyo byaba bikumariye. Icyiza ushobora kuyisubika kuko ibaye mu bihe bitari byiza ukazayizihiza undi mwaka kuko izagaruka cyangwa se akazayizihizanya n’abo babana mu rugo atarinze gutumira kuko turi mu bihe bidasanzwe abantu bakwiye kwirinda bakarinda n’abandi.”

Uko ari 16 bose basabwe kwipimisha COVID-19 kugira ngo barebe ko ari bazima ndetse uwateguye ibirori acibwa amande y’ibihumbi 200 Frw mu gihe buri wese wabyitabiriye yaciwe ibihumbi 25 Frw.

Abitabiriye ibi birori bose baciwe amande ndetse basabwa na kwipimisha COVID-19
Bakoresheje uburyo budasohora amajwi ku buryo nta wamenya ko ahantu habereye ibirori
Iyi sabukuru yabaye mu gihe ibirori bihuriza abantu mu ruhame bitemewe
Iyi sabukuru yateguwe mu buryo bwa silent disco aho bambara écouteurs umuziki ntubashe gusohoka
Ibi birori byabereye mu Murenge wa Kimironko
Iyi sabukuru yitabiriwe n'urubyiruko
Shema Deborah wari wagize isabukuru, yavuze ko batazongera gutegura ibirori muri ibi bihe bya COVID-19
Abari bitabiriye ibi birori buri umwe yaciwe ibihumbi 25 Frw
Abitabiriye isabukuru yabaye ku wa Gatandatu barenze ku mabwiriza yo kwirinda COVID-19
Uru rubyiruko rwasabye bagenzi babo bafite gahunda zo gutegura ibirori ko baba babihagaritse COVID-19 ikarangira
Umuvugizi wa Polisi y'u Rwanda, CP John Bosco Kabera, yasabye Abanyarwanda kwirinda guhurira ahantu hamwe kuko bishobora gukwirakwiza icyorezo cya COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .