Abahinze urusenda ku bwinshi bakaruburira isoko basabye leta kubagoboka

Yanditswe na Hakizimana Jean Paul
Kuya 10 Ukuboza 2020 saa 10:37
Yasuwe :
0 0

Abaturage bo mu Karere ka Rwamagana mu Murenge wa Nzige barasaba leta kubafasha kubona isoko ry’urusenda bahinze ku bwinshi nyuma yaho batangiye kuruburira isoko bikabateza ibihombo.

Ni ubusabe bwatanzwe n’abaturage bibumbiye muri Koperative Gwiza Nzige yahinze urusenda rw’imiteja [rukiri rubisi] kuri hegitari 50 bizeye amasoko atandukanye nyuma icyorezo cya COVID-19 kigakoma mu nkokora abaguzi babo none ngo rukaba rutangiye gupfira mu mirima urundi rugasarurwa rwarahishije bakabura amasoko yarwo.

Umuturage witwa Hazizi Célestin wahinze urusenda ku gice cya hegitari yavuze ko baruhinze bababwira ko rutajya rubura amasoko, bwa mbere ngo barasaruye babona abaguzi ku bwinshi bituma bashoramo amafaranga menshi.

Ati “Urusenda twabonaga ari imari nziza ndetse dusarura bwa mbere tubona abaguzi abaturage barishima cyane bituma baruhinga cyane kurushaho. Ubu rero twabuze abaguzi urusenda rwarahishije ku buryo twese twahombye, njye nari nashoyemo miliyoni ebyiri ariko maze gukuramo nka miliyoni imwe andi narayahombye ruri guhisha rukiri mu murima.”

Yavuze ko basaba leta kubafasha kubona isoko nibura bakagaruza ayo bashoyemo ngo abo bari bizeye kuzakorana nabo ngo abenshi ntibaruguze abandi batwara umusaruro muke ugereranyije n’uwo abaturage baba basaruye.

Umuyobozi wa Koperative Gwiza ihinga urusenda n’imboga mu Murenge wa Nzige, Uwitonze Euphrem, we yavuze ko ubusanzwe batangiye guhinga urusenda bahereye kuri hegitari 12 kuri ubu bakaba bari bageze kuri hegitari 50 z’urusenda rwa Badae n’izindi enye z’urundi bwoko.

Ati “Mu cyumweru nibura tuba dufite hagati ya toni esheshatu n’icumi, umuguzi agatwaramo ebyiri, ibyo bica intege abahinzi twarashoye turahomba, iyo wahinze uba ukeneye kunguka. Turasaba NAEB na RAB n’Akarere [Rwamagana] kacu kudukorera ubuvugizi umusaruro wacu ntukomeze kwangirika.”

Umuyobozi ushinzwe Imari n’Ibikorwa mu Kigo cya Souk, Fred Rwigamba, yabwiye IGIHE ko ubusanzwe bo bagurira abahinzi bakorera mu Murenge wa Rubona, abo mu wa Nzige ngo babagurira umusaruro wabo ari mu buryo bwo kubafasha mu kubarinda ko wangirika wose.

Yakomeje agira ati “Ahubwo bakabaye badushimira kuko turi kubafasha nibura tugatwaraho umusaruro muke kuko ibi bihe turimo bya COVID-19 byatumye tutabona amasoko neza binatuma n’abandi bashoramari babaguriraga umusaruro wabo babireka kuko ntaho kurugurisha babona. Twe rero turi kubikora nk’ubufasha ntabwo dufite isoko rinini.”

Umuyobozi w’Akarere ka Rwamagana, Mbonyumuvunyi Radjab, we yavuze ko bagiriye inama abaturage yo gusoroma urusenda bakarugurisha ku isoko ryo mu Rwanda kuko abarujyana hanze nabo bagabanutse bitewe no kubura isoko byatewe n’icyorezo cya Coronavirus.

Ati “Ruriya rusenda rwahingwaga hariya kuruhinga birahenze n’imbuto bayihabwaga na Souk aho barujyanaga hanze rero isoko ryaraguye ari nayo mpamvu batwara ruke kubera ihungabana ry’ubukungu. Twabagiriye inama rero ko barusarura, urwahishije bakarugurisha ku isoko ryo mu Rwanda nubwo rutazagurwa ku giciro cyo hejuru nk’icyo barugurirwagaho ariko nibura hari icyo bakuramo.”

Aba bahinzi bavuga ko mu masezerano bari bafite bagurishaga ikilo cy’urusenda 550 Frw none ubu ngo kubera nta soko rifatika bafite n’uje bamuha 300 Frw ku kilo.

Koperative Gwiza Nzige ifite abanyamuryango 321, ikaba ihinga ku buso bungana na hegitari 661 bw’imusozi na 215 z’igishanga hahingwa urusenda, ibigori n’ibindi.

Hegitari zisaga 50 zahinzweho urusenda, urwinshi ruri kuburirwa isoko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .