Abahabwa na FARG inkunga y’ingoboka bifuza ko yongerwa - Ubushakashatsi

Yanditswe na Emma-Marie Umurerwa
Kuya 20 Ugushyingo 2018 saa 08:04
Yasuwe :
0 0

Abarokotse Jenoside yakorewe Abatutsi batishoboye bahabwa inkunga y’ingoboka n’Ikigega cya Leta gishinzwe gutera inkunga Abarokotse Jenoside yakorewe Abatutsi batishoboye (FARG), bifuza ko yakongerwa kuko ari nke ugereranyije n’ibyo bakenera mu buzima bwa buri munsi.

Abarokotse Jenoside batishoboye bagabanyije mu byiciro bibiri; abagenerwa inkunga y’ingoboka harimo abahabwa 7500Frw ku kwezi n’abagenerwa ibihumbi 30Frw kubera ibibazo byihariye nk’incike, abafite ubumuga bukomeye, uburwayi n’ibindi bibazo.

Ubushakashatsi bwakozwe ku bikorwa bya FARG mu myaka irindwi ishize (2010-2017) bwashyizwe ku mugaragaro kuri uyu wa 20 Ugushyingo 2018, bwagaragaje ko aya mafaranga ari iyanga kuri bamwe.

Masabo François wayoboye ubu bushakashatsi yagize ati “Ariya mafaranga 7500 bamwe babona ari make ugereranyije n’ibyo bakeneye mu buzima bwa buri munsi. Ikindi cyagaragajwe ni uko hari igihe inkunga itinda cyane ku buryo ibageraho benda guhera umwuka, uburyo bwo guhitamo nabwo ngo bukwiye kongera bugasubirwamo neza kuko hari abayikeneye batayibona.”

“Abantu 59.4% by’ababajijwe bifuje ko iriya nkunga yakwiyongera mu gihe hari abandi bifuje ko inkunga FARG itanga yabarwa nk’uko iya VUP ibarwa. Muri VUP buri muntu ahabwa 7500Frw mu muryango mu gihe FARG umuryango wose iwuha 7500Frw.”

N’ubwo aya mafaranga hari abavuga ko ari make ariko, abagenerwabikorwa 94% bavuze ko yateje imbere imibereho yabo dore ko 17% babashije kuyikoresha mu bindi bikorwa byabateje imbere.

Umuyobozi wa FARG, Ruberangeyo Theophile, yavuze ko bazi ikibazo cy’inkunga rimwe na rimwe itinda kugera ku bo igenewe.

Ati “Turabizi ko hari uturere tumwe na tumwe inkunga y’ingoboka yatinze no mu rwego rwa FARG nyirizina, hari za fagitire z’ibitaro na za farumasi tutarishyura, byose biterwa n’uko amafaranga yabonetse mu rwego rwa Minisiteri y’Imari n’Igenamigambi.”

Mu myaka irindwi ishize FARG yarakoresheje miliyari zisaga 17Frw mu gutanga inkunga y’ingoboka.

Mu buvuzi hakoreshejwe miliyari zirenga 10Frw, mu burezi ikoresha miliyari zisaga 100Frw, mu kubakira abatishoboye bakoresheje asaga miliyari 12Frw, mu gusana inzu zasanyutse n’izishaje hakoreshejwe asaga miliyari 11Frw, mu mishinga ibyara inyungu hakoreshwa asaga miliyari 20Frw.

Ubwo Masabo François yasobanuraga ibyavuye mu bushakashatsi ku bikorwa bya FARG

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza