Abagororwa bahaye Guverinoma ibyifuzo birimo kwiga kaminuza no kurekurwa bakambikwa ibikomo

Yanditswe na Evariste Nsengimana
Kuya 1 Ugushyingo 2019 saa 08:57
Yasuwe :
0 0

Abagororwa bayobora abandi bafungiye ibyaha bitandukanye birimo ibya Jenoside yakorewe Abatutsi, gukoresha ibiyobyabwenge n’ibindi, bavuze ko bamaze gutera intambwe ishimishije mu rugendo rwo kugororoka, ubumwe n’ubwiyunge, basaba guverinoma ibirimo kwiga kugera muri Kaminuza, kurekurwa bakambikwa ibikomo [utwuma tw’ikoranabuhanga] bibakumira gutoroka n’ibindi.

Ibyo byifuzo abagororwa 100 bayobora abandi muri Gereza ya Nyarugenge iherereye mu Murenge wa Mageragere nibo babishyikirije Minisitiri w’Ubutabera akaba n’Intumwa Nkuru ya Leta y’u Rwanda, Busingye Johnston, ubwo yabasuraga kuri uyu wa 31 Ukwakira 2019.

Umuyobozi w’iyi Gereza, CSP Kayumba Innocent, yabanje kugaragaza ibikorwa byo kugorora bikorerwa muri iyi gereza, urugendo rw’ubumwe n’ubwiyunge rukorwa bigizwemo uruhare n’abo bayobozi bayobora abandi n’abacungagereza basaga 200.

Yavuze ko by’umwihariko abagororwa basaga 1000 bahamijwe ibyaha bya Jenoside bya Jenoside yakorewe Abatutsi banditse basaba guhuzwa n’abo biciye bakabasaba imbabazi, bagaragaza imyobo isaga 120 yajugunywemo imibiri itarashyinguwe mu cyubahiro n’amazina y’abo bafatanyije bakidegembya hanze.

Uretse ibi bikorwa, CSP Kayumba yavuze ko aba bagororwa banagira uruhare mu bikorwa bitandukanye birimo kubaka ibikorwa remezo bya gereza n’ibindi.

Minisitiri Busingye yavuze ko bishimishije kuba hari impinduka bagaragaza mu kugororoka, bikaba bitanga icyizere ko nibarangiza igifungo, bazaba batandukanye n’uko binjiyemo bameze.

Yavuze ko by’umwihariko nk’abayobozi bayobora bagenzi babo bafunganye ari nabo bagomba kugira uruhare mu kubahindura, uwahinjiye azwiho amateka mabi ajyanye n’ibyaha yakoze akazasahokamo yarigishijwe umwuga mwiza n’ibindi bizamufasha kwibeshyaho.

Nyuma yo kubaha izo mpanuro, bahawe umwanya wo kugaragaza ibibazo n’ibyifuzo bagenzi babo bayobora bafite kugira ngo bishakirwe ibisubizo n’ubuvugizi.

Itorero ryihariye no kwigishwa bakaminuza

Umuyobozi muri Gereza ya Nyarugenge, Byukusenge Gaspard, yabwiye Minisitiri Busingye ko muri Gereza bagira imiyoborere nk’uko bikorwa hanze yayo ariko batabasha kwitabira itorero nk’uko abandi banyarwanda batozwa indangagaciro n’umuco bya Kinyarwanda.

Ati “Nifuzaga ko mwazunganira ubuyobozi bwacu cyane cyane ku Itorero ry’Igihugu hakaba haba umwihariko ku magereza kugira ngo amasibo dufite nk’uko ubuyobozi budufasha kuyanyuzamo inyigisho z’ubumwe n’ubwiyunge, indangagaciro z’umuco nyarwanda na gahunda ya Ndi Umunyarwanda tujye tugendana n’abandi.”

Ku kibazo cy’itorero, Minisitiri Busingye yabijeje ko hazabaho kuganira n’Itorero ry’Igihugu ku buryo abagororwa bajya bashyirirwaho icyiciro cyaryo cyihariye, abizeza ko ari ibintu bishoboka.

Imibare itangwa n’iyi Gereza igaragaza ko hari abagororwa bafashijwe kwiga amasomo atandukanye aho 469 bigishijwe gusoma no kwandika, 441 bigishwa indimi z’amahanga naho 707 bigishwa imyuga.

Byukusenge yavuze ko nk’uko Guverinoma idahwema kubafasha kurwanya ubujiji no kwiga imyuga, yazabafasha mu gihe kizaza, ikabashyiriraho uburyo n’abashaka kuminuza bakabona uko babikora.

Ati “Nibyo duhabwa uburezi n’ubumenyi butandukanye ariko aho bigeze birashimishije, abagororwa, tubita abaturage muri uyu murenge, bakavuga bati ‘ntibyashoboka ko habaho gahunda umuntu niba ashaka kwiga kaminuza akiga’. Hari n’ababirengaho bakavuga bati ‘baduhuje n’amashuri asanzwe abantu bashobora no gusaba imiryango yabo ikabarihira.”

Minisitiri Busingye yamusibije ati “kwiga rwose turabishaka ko mwiga n’ubushize twarabivuze. Mureke turebe uko twagira ibiganiro na kaminuza imwe hano turebe ko hagira porogaramu imwe hano, yaba iyakure yaba ko haza umwarimu hano, hari n’ubwo wasanga n’aha barimo. Turashaka ko umuntu ushaka kwiga atabuzwa amahirwe n’uko ahari.”

Uwitwa Umuhire Diane yabwiye Minisitiri Busingye ko hanze hanze ya Gereza, cyane cyane mu rubyiruko hari abatazi ukuri ku mateka u Rwanda rwanyuzemo nyamara bamwe mu bafungiye ibyaha bya Jenoside bashobora gutanga ubuhamya cyane mu mashuri.

Ati “Hano harimo ababyemera badufasha bakajya boherezwa mu mashuri gutanga ibiganiro bagaragariza ukuri urubyiruko ku byabaye mu gihugu cyacu, bikureho urujijo.”

Umuhire yavuze ko uretse kuri Jenoside yakorewe Abatutsi n’abafungiwe gukoresha ibiyobyabwenge n’ibindi bagatanga amakuru ku bubi bwabyo n’abari babifite mu nzozi bakabyikuramo.

‘Twambikwe ibikomo turekurwe’

Umuhire yabajije Minisitiri Busingye aho umushinga wo kwambika abakatiwe utwuma tw’ikoranabuhanga tubarinda gutoroka waheze ngo bamwe basohoke muri Gereza.

Ati “Hari amategeko twakiriye ko hari itegeko ryo kwambika ibikomo abantu bakatiwe, numvaga bishoboka byashyirwa mu bikorwa bikadufasha kugabanya ubucucike mu magereza, tukajya gufatanya n’abandi kubaka igihugu.”

Kuri iki kibazo, Minisitiri Busingye yamusubije ko “ibyo usabye byose ni ibintu bishoboka reka tugende tubyigeho n’ubuyobozi bwa gereza.”

Ku gutanga ubuhamya ku bakoresha ibiyobyabwenge yavuze ko hari abantu bakibyishoramo kuko batazi ububi bwabyo iyo gahunda ikaba yabafasha kubigendera kure.

Yakomeje agira ati “Ibikomo mutwihanganire gato ariko biri mu nzira itegeko ubwaryo ntabwo rirasohoka mu igazeti, ubwo tuzashaka n’ababikoresha kuko ntidushaka ko buri wese azajya abyukana igikomo akajya kucyambika umuntu ariko biraza kuza natwe tuba dushaka ko umubare w’abagororwa uguma hasi.”

Mu bindi bibazo bavuzemo gutinda kubona kopi z’imanza Minisitiri Busingye yabijeje ko mu cyumweru kimwe baza kubona impinduka.

Iyi Gereza ya Nyarugenge ifite ubushobozi bwo kwakira abakororwa ibihumbi 10 ariko uyu munsi irimo 9942 barimo abagore 1819 n’abagabo 8123.

Umuhire yabajije Minisitiri Busingye aho umushinga wo kwambika abakatiwe utwuma tw’ikoranabuhanga tubarinda gutoroka waheze
Minisitiri Busingye yavuze ko itegeko ryo gukoresha igiklomo ritarasohoka ariko riri hafi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza