00:00:00 IGIHE NETWORK KN KINYARWANDA EN ENGLISH FR FRANCAIS

Abagizweho ingaruka n’ibitero bya FLN basabye guhura na Anthony Blinken

Yanditswe na Rabbi Malo Umucunguzi
Kuya 5 August 2022 saa 07:45
Yasuwe :

Umunyamategeko wa bamwe mu bagizweho ingaruka n’ibitero by’umutwe w’iterabwoba wa MRCD/FLN uyoborwa na Paul Rusesabagina, yavuze ko basabye guhura n’Umunyamabanga wa Leta Zunze Ubumwe za Amerika, Anthony Blinken utegerejwe mu Rwanda mu cyumweru gitaha.

Ubwo hatangazwaga ko agiye gusura u Rwanda, Umuvugizi wa Minisiteri y’Ububanyi n’Amahanga ya Amerika, Ned Price, yavuze ko Blinken azazamura "impungenge kuri demokarasi n’uburenganzira bwa muntu, ibibazo ndengamipaka, kudaha urubuga abatavuga rumwe n’ubutegetsi n’ifungwa ridakurikije amategeko ry’umuturage wa Amerika, Paul Rusesabagina."

Muri iryo tangazo, nta na hamwe havugwamo ko Blinken yaba afite ubushake bwo guhura n’abagizweho ingaruka n’ibitero bya MRCD/FLN, barimo imiryango yiciwe abayo, abamugaye ndetse n’abasahuwe ibyabo.

Ni ibitero nyamara byaguyemo abaturage icyenda, bikomeretsa abandi benshi ndetse imitungo yabo irahatikirira.

Umunyamategeko wa bamwe mu bagizweho ingaruka n’ibyo bitero, Faustin Murangwa, yabwiye IGIHE ko bitumvikana uburyo Amerika ikomeza gufata Rusesabagina nk’umwere, nk’aho abo yahemukiye batazwi.

Ni imvugo ngo zakomeje gukoreshwa mu kumusabira kurekurwa kubera ko ngo afunzwe mu buryo budakurikije amategeko ndetse akaba arwaye.

Yakomeje ati "Ni mu gihe we hari ibyo yiyemereye, nabo ubwabo hari ibimenyetso batanze mu rubanza bijyanye n’uruhare rwe, uwo muntu akaba akurikiranywe hamwe n’abandi bamushinja."

"Ikindi tutemera ni uko ngo arwaye, ku buryo uwakoze icyaha ari we uhinduka uwarenganye, bakajya kuvuga ko arwaye nk’aho nta bapfuye bahari, nk’aho nta bamugaye bahari."

Abagizweho ingaruka n’ibikorwa bya Rusesabagina, banditse ibaruwa bayishyikiriza Ambasade ya Amerika mu Rwanda basaba kubonana na Blinken. Muri iyo baruwa, bavuze ko babajwe n’amakuru amaze iminsi avuga ko hari abayobozi ba Leta Zunze Ubumwe za Amerika bashaka ko Paul Rusesabagina afungurwa. Bati “Biraduhangayikishije ko ubutabera bwatanzwe buri guteshwa agaciro bitewe n’igitutu cyo gusaba ko Paul Rusesabagina afungurwa.”

Mu bashinja Rusesabagina harimo Nsabimana Callixte Sankara wari umuvugizi wa FLN.

Me Murangwa avuga ko gufata ibintu muri ubwo buryo bidakwiye, ku buryo bigera aho "umuntu yapfushije atumvwa, ahubwo ugasanga uwamwiciye cyangwa uwafatanyije n’abamwiciye ari we wumva kubera ko abamuvugira ari ab’uruhu rwera."

Yavuze ko abakorewe ibyaha basanga uyu munsi ari bo bakwiye kuba begerwa na Blinken, akabereka ko yemera ko bahemukiwe n’umuntu ufite imitungo iwabo, ahubwo akareba uburyo bahabwa indishyi.

Yakomeje ati "None aho kugira ngo babikore gutyo, baravuga ngo narekurwe nta kintu bakwiye kumurikiranaho, ararwaye."

Mu buryo bwo kumvikanisha ikibazo cy’abakorewe icyaha no kuzamura ijwi ryabo, bahuye na Chargé d’Affaires wa Amerika mu Rwanda, Deb MacLean, ambasaderi w’u Bubiligi mu Rwanda, Bert Versmessen n’uwari ambasaderi w’Ubumwe bw’u Burayi (EU), Nicola Bellomo.

Me Murangwa yavuze ko bafite n’icyizere ko ubwo Blinken azaba ari mu Rwanda, bazabasha guhura na we.

Ati "Twebwe icyizere cyo turagifite kubera ko nta kintu cyakamubujije guhura natwe, kuko niba yaravuze ko ashaka kuvugana n’abantu ku kibazo cy’uriya mugabo, nta mpamvu atahura natwe ngo avugane natwe ku kibazo cyacu. Niba yarigize umuvugizi w’abantu, azajye avugira bose."

Avuga ko ari ngombwa kumva akababaro k’abantu bagizweho ingaruka n’ibi bitero.

Uretse Blinken, inzego zitandukanye zirimo na Komisiyo ya Sena ishinzwe Ububanyi n’Amahanga, zakomeje kuvuga ko Rusesabagina ari umwere, ko akwiye kurekurwa agasubizwa muri Amerika.

Mu isomwa ry’urubanza ryabaye muri Mata 2022, Urukiko rw’Ubujurire rwagumishijeho igifungo cy’imyaka 25 Urukiko Rukuru rwahanishije Rusesabagina Paul, kubera uruhare yahamijwe mu bikorwa by’iterabwoba.

Urukiko rw’Ubujurire rwavuze ko hari impamvu nyoroshyacyaha zishobora gutuma umucamanza agabanya igihano.

Ruti "Kuba ari ubwa mbere Rusesabagina Paul yari akoze icyaha ni impamvu nyoroshyacyaha."

Mu itangazo Minisiteri y’Ububanyi n’Amahanga y’u Rwanda yasohoye kuri uyu wa Kane, yatangaje ko yiteguye kwakira Antony Blinken, ikamugaragariza ko ifungwa rya Paul Rusesabagina rikurikije amategeko y’u Rwanda na Mpuzamahanga.

Rikomeza riti "Ku bijyanye n’Umunyarwanda Paul Rusesabagina twaganiriyeho na Amerika inshuro nyinshi mu myaka 10 ishize, rwishimiye uyu mwanya wo kongera kugaragaza neza ko ifungwa rye no guhamywa ibyaha bikomeye byakorewe abaturage b’u Rwanda (bigizwemo uruhare nawe n’abandi 20 bareganwa) mu gihe yari atuye muri Leta Zunze Ubumwe za Amerika; ryari rikurikije amategeko yaba ay’u Rwanda na Mpuzamahanga."

Si ubwa mbere u Rwanda rusa n’urushyirwa ku gitutu ariko rukerekana ko ari igihugu cyigenga. Ibintu nk’ibi byabaye kuri Ingabire Victoire, Perezida Kagame akurira inzira ku murima uwo ari we wese ko nta gitutu gishobora gushyirwa ku Rwanda ngo rurekure umunyabyaha.

Me Murangwa Faustin (iburyo) ni umwe mu bunganira abaregera indishyi mu rubanza rwa Rusesabagina
Rusesabagina yakatiwe gufungwa imyaka 25

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .