Abagize guverinoma batangiye gukora ubugenzuzi mu masoko bareba uko kwirinda Covid-19 byubahirizwa

Yanditswe na Ishimwe Alain
Kuya 3 Nzeri 2020 saa 02:36
Yasuwe :
0 0

Abagize guverinoma barimo ba Minisitiri n’Abanyamabanga ba Leta mu Muri Minisiteri zitandukanye, batangiye kugenzura uko amabwiriza yo kurwanya icyorezo cya Covid-19 yubahirizwa mu masoko manini n’inyubako z’ubucuruzi mu Mujyi wa Kigali.

Ni igenzura ryakorewe mu masoko ya Kicukiro, Kimironko, Nyamirambo, Kabuga, Kagugu ndetse no mu nzu z’ubucuruzi zitandukanye.

Muri iri genzura aba bayobozi basanze bamwe mu bacuruzi batagira kandagirukarabe imbere y’amaduka yabo, binjiza abakiriya benshi mu masoko bigatera ubucucike kubera ko begeranye. Basanze hari na restaurants ziri ahatemewe, abarenze kuri ayo mabwiriza baciwe amande banafungirwa inyubako.

Umwe mu bacurizi bacururiza Nyabugogo bafungiwe kubera kutubahiriza izi ngamba, Mutsinzi Dominique yabwiye Televiziyo Rwanda ko batunguwe n’iki cyemezo.

Yagize ati” dushidutse tubona umurenge uza uhita udufungira, baratubwiye ngo baduciye amande 50 000 bahita banadufungira.”

Mugenzi wa Mutsinzi, Muhorakeye Hadjat we yavuze ko minisitiri yabahaye impanuro z’uko bagomba gusibura imirongo ifasha abakiliya kwinjira batabyigana.

Ati “ikibazo Minisitiri abonye nuko tugomba kuhashyira isabune y’amazi, imirongo nayo yari isibamye yatubwiye ko tuyisibura bakatureka nta kibazo.”

Umunyamabanga wa Leta muri Minisiteri y’ubuhinzi n’ubworozi wahawe inshingano zo gukurikirana isoko rya Kimisagara n’inyubako z’ubucuruzi za Nyabugogo, Dr Ngabitsinze Jean Chrysostome yavuze ko nubwo hari ibyakozwe mukubahiriza amabwiriza ku bacuruzi ariko ko hari abatayubahiriza.

Yagize ati "Nk’iyo urebye umubare w’abantu ntabwo ujya munsi y’ibipimo byatanzwe na guverinoma ugasanga abarimo ni benshi ugereranyije n’abakagombye kuba barimo, mu kubikemura ahongaho twahavuye tumaze kugabanyamo abantu.”

Bamwe mu bayobozi b’aya masoko bavuga ko kuba abagize guverinoma bamanutse bakaza kureba ikurikizwa ry’amabwiriza yo kurwanya covid 19 mu masoko no mu nyubako z’ubucuruzi zo mu mu Mujyi wa Kigali, bigaragaza imbaraga Leta ishyize mu kwigisha no gukumira abarenze kuri aya mabwiriza.

Bavuga ko iyo abayobozi babasuye bituma batadohoka ahubwo bagakomeza kuba baso bagenzura ijana kw’ijana ko amabwiriza yubahirizwa.

Iri genzura rikozwe nyuma y’aho hari amasoko n’andi mazu y’ubucuruzi yafunzwe n’abayakoreramo bakajyanywa mu kato kubera ko hari hagaragaye abarwayi ba covid 19.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .