Abagabo basabwe guha agaciro imirimo itishyurwa ikorwa n’abagore mu ngo

Yanditswe na Mukahirwa Diane
Kuya 9 Ukuboza 2020 saa 11:00
Yasuwe :
0 0

Kuva mu myaka yo hambere usanga umugore ariwe uharirwa imirimo yo mu rugo ndetse n’icyapfuye akaba ariwe kibazwa. Mu bigaragara iyo mirimo irabavuna ariko ugasanga akenshi idahabwa agaciro ndetse mu maso ya bamwe bigasa nk’aho ntacyo ivuze.

Iyi mirimo ikorwa n’abagore itishyurwa yiganjemo ikorerwa mu ngo irimo amasuku, guhinga no kurera abana.

Abagore benshi bakunze kugaragaza ko iyi mirimo ibavuna ariko ugasanga abagabo babo baba bavuga ko birirwa ntacyo bakora kandi ntacyo binjiriza umuryango.

Nyamara iyi mirimo hari agaciro ifite dore ko n’abatabashije kuyikorera bakazana abakozi bo mu rugo babahemba amafaranga menshi.

Mu bushakashatsi bwakozwe n’Umuryango wigenga ushinzwe kurwanya ubukene n’akarengane ActionAid, bwashyizwe hanze kuri uyu wa Gatatu, bwagaragaje ko abagore bamara amasaha ane ku munsi bakora imirimo yo mu rugo kandi batayishyurwa.

Bwakozwe hagamijwe kureba no kugaragaza agaciro k’imirimo ikorwa n’abagore mu ngo; bwakorewe mu turere icyenda tw’igihugu turimo Gakenke, Musanze, Rubavu, Ngororero, Muhanga, Nyaruguru, Kirehe, Nyagatare na Gasabo.

Ubu bushakashatsi bwagaragaje ko abagore bo hirya no hino mu gihugu bakora imirimo yo mu ngo ntibayishyurirwe kandi akenshi usanga bizamo n’ihohoterwa rishingiye ku gistina.

Bamwe mu bagore bavuga ko bavunwa n’iyi mirimo kandi ugasanga nta gaciro bihabwa n’abagabo babo kuko bababwira ko ntacyo bakora kandi iyo barebye basanga bakora akazi kagoye.

Umugore wo mu Karere ka Karongi, Nyirahabiyambere Esperance, yavuze ko birirwa mu rugo bakora imirimo itandukanye ariko ugasanga abagabo bavuga ko ntacyo bakoze aho kubashimira cyangwa ngo bayibafashemo.

Ati “Iyi mirimo iratuvuna, umugore yirirwa mu rugo yihiringa umugabo yataha nimugoroba akaza abaza ngo uba wiriwe ukora iki, n’abandi bamubaza ngo umugore wawe akora iki ati ‘ntacyo’ kandi wirirwa mu rugo ukora.”

Yakomeje avuga ko badakeneye kwishyurwa amafaranga ahubwo bifuza ko abagabo baha agaciro imvune bakura muri iyo mirimo.

Ati “Iyi mirimo dukora ni iyacu mu rugo twese, idufitiye inyungu ntabwo tugiye kubishyuza ngo twakoze ahubwo icyiza ni uko twayifatanya bakayidufashamo ndetse n’ibyo twakoze bakabiha agaciro.”

Umuyobozi wa ActionAid, Uwamaliya Josephine, yavuze ko abagabo batumva agaciro k’imirimo y’abagore mu ngo bakanabita inkorabusa.

Ati “Nk’iyo uhuye n’umugabo ukamubaza ngo umugore wawe akora iki akakubwira ngo ntacyo akora we yirirwa mu rugo, kandi mu by’ukuri yirirwa akora ibyakabaye bikorwa n’abandi babyishyurirwa, ka gaciro abagabo ntibakabona.”

Yakomeje asaba abagabo kumva agaciro iyi mirimo ifite ko iyo umugore yirirwa mu rugo aba afite icyo yarwinjirije gihagije.

Yagize “Icyo nakisabira Abanyarwanda muri rusange by’umwihariko abagabo ni uko bakumva agaciro k’iyi mirimo, kuko iyo umugore yayiriwemo aba yatanze umusanzu we mu rugo akwiye kubyubahirwa.”

Umukozi muri Minisiteri y’Uburinganire n’Iterambere ry’Umuryango mu Ishami ryo guteza imbere abagore mu bijyanye n’ubukungu, Mukantaganda Sarah, yavuze ko kuba abagore bakora imirimo yose ntibihabwe agaciro ari ihohoterwa.

Ati “Aba bagore bakora iyi mirimo akenshi baba bumva ko ntacyo bamaze mu mitwe yabo bakumva ko ntacyo bakora n’abagabo babo bakababwira ko ntacyo bakora, iryo ubwaryo ni ihohoterwa.”

Yakomeje avuga ko hakwiye ubufatanye bw’inzego zitandukanye mu gutanga ubukangurambaga ku kwerekana ko abakora iyi mirimo yo mu ngo itishyurwa bakwiye kubihererwa agaciro.

Ati “Dufatanyije twese n’izindi nzego n’abafatanyabikorwa batandukanye mu kumvisha cyane umuryango nyarwanda ko iriya mirimo ifite agaciro iki kibazo kizakemuka.”

Kuba imirimo ikorwa n’abagore mu ngo akenshi idahabwa agaciro bifitanye isano n’umuco w’Abanyarwanda wategekaga abagore n’abakobwa kumenya imirimo yo mu rugo gusa, bigatuma abagabo bumva ko ibyo bakora ari inshingano zabo nta gaciro ikwiye.

ActionAid yagaragaje ko abagore benshi bamara amasaha ane bari gukora imirimo itishyurwa yo mu ngo
Umuyobozi wa ActionAid, Uwamaliya Josephine, yavuze ko abagabo batumva agaciro k’imirimo y’abagore mu ngo bakanabita inkorabusa
Mukantaganda Sarah, yavuze ko kuba abagore bakora imirimo yose ntibihabwe agaciro ari ihohoterwa
Abagabo bagaragaje ko hari bagenzi babo batumva agaciro k'imirimo ikorwa n'abagore
Abagore batandukanye bagaragaje ko abagabo badaha agaciro imirimo bakora mu ngo
Hakwiye ubufatanye bwari buri muntu mu guha agaciro imirimo ikorwa n'abagore mu ngo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .