00:00:00 IGIHE NETWORK KN KINYARWANDA EN ENGLISH FR FRANCAIS

Abafite ubutaka bwo guturaho i Kigali butaragezwamo ibikorwaremezo by’ibanze bagiye gusonerwa umusoro

Yanditswe na Igizeneza Jean Désiré
Kuya 11 Mutarama 2023 saa 10:29
Yasuwe :

Ubuyobozi bw’Umujyi wa Kigali bwemeje ko bugiye gusonera imisoro abafite ubutaka bwagenewe guturwaho ariko ibikorwaremezo by’ibanze bikaba bitarahagera, bwemeza ko bazatangira gutanga imisoro y’ibyagenewe gukorera aho hantu mu gihe bizaba byahageze.

Ni ibyatangajwe kuri uyu wa 11 Mutarama 2023 mu muhango wo gutangiza ubukangurambaga bwahariwe icyumweru cy’abasora, aho ubu buyobozi bwagaragaje ko buri gukusanya amakuru n’imibare ya nyayo y’abarebwa n’iyo gahunda ubundi ishyirwe mu bikorwa.

Ni umuhango witabiriwe n’abayobozi mu nzego zitandukanye barimo Meya w’Umujyi wa Kigali, Pudence Rubingisa; Komiseri wungirije ushinzwe Intara n’Imisoro y’Ibanze mu Kigo cy’Igihugu cy’Imisoro n’Amahoro, RRA, Karasira Ernest, Abayobozi Nshingwabikorwa b’Uturere tw’Umujyi n’abandi barimo abasora.

Ubusanzwe igishushanyo cy’umujyi kivugururwa kenshi bijyanye n’iterambere igihugu kigenda kigeraho ndetse n’ibikenewe mu gukomeza kugira umujyi usukuye ndetse urimo inyubako zigezweho.

Hari ubwo ahantu hasanzwe hahingwa bigera aho hakagenerwa guturwa cyangwa hakagenerwa ibikorwa by’ubwubatsi n’ibindi, bivuze ko iyo hahinduriwe icyo hagenewe n’imisoro iba ihindutse.

Ibyo birumvikana ko kugira ngo haturwe cyangwa hacururizwe habanza kugira ibikorwaremezo birimo imihanda, amazi, amashanyarazi n’ibindi bibanza kuhashyirwa kugira ngo bizafashe abaturage bazaba bakora iyo mirimo inyuranye.

Kubera ko ikoranabuhanga riba rigaragaza icyo ubutaka bwagenewe iyo Ikigo cy’Igihugu cy’Imisoro n’Amahoro, RRA kigiye gusoresha kigendera ku cyagenewe ubutaka akaba ari cyo gisorerwa kabone nubwo ibyahagenewe biba bitaratangira.

Komiseri wungirije ushinzwe Intara n’Imisoro y’Ibanze muri RRA, Karasira Ernest, avuga ko bakunze guhura n’ibibazo by’uko rimwe na rimwe abaturage baba batabyumva agasaba ubuyobozi bw’umujyi kubyitaho ndetse bakaba basonerwa mu gihe ibikorwaremezo bitarahagera.

Ati “Twe nk’abantu basoresha ntidushobora kuvuga ko nta bikorwaremezo by’ibanze bitarahagera kuko izo ni inshingano z’inzego z’Umujyi wa Kigali cyangwa se akarere [zikwiriye] kubwira RRA ko abaturage bazasora kuri zeru cyangwa batazasora kuko ibyo bikorwaremezo bitarahagezwa.”

Akomeza avuga ko biramutse bigaragajwe n’ubuyobozi RRA itabasoresha cyane ko baba bataramenya ngo ni he hazubakwa, ahazajya umuhanda ni he n’ibindi, bakazongera gusoreshwa mu gihe ibyo bikorwaremezo byahagejejwe.

Ibi bigaragara mu bice bitandukanye birimo nka Gahanga na Masaka mu Karere ka Kicukiro n’ahandi mu Mujyi wa Kigali. Karasira agaragaza ko bigomba kwitabwaho cyane ko umuturage aba ari kuharenganira kandi aba yagakwiriye gusonerwa.

Meya w’Umujyi wa Kigali, Pudence Rubingisa, yavuze ko mu gihe batarageza ibi bikorwa hatekerejwe ko aba baturage basonerwa imisoro ndetse ngo umurongo waratanzwe igisigaye ni ukureba uko washyirwa mu bikorwa.

Ati “Haba ubwo umuntu ufite ubutaka ahantu runaka agiye muri ‘système’ bikagaragara ko bugomba guturwaho ariko mu by’ukuri nta bikorwaremezo by’ibanze birahagera. Abo urutonde rwabo turarufite ndetse n’abo tutarabona turi gukorana n’inzego z’ibanze kugira ngo baboneke ubundi basonerwe, nta mpamvu yo gusoreshwa kandi icyo hagenewe kitarahagera.”

Akomeza ashishikariza n’abaturage gukomeza gutanga amakuru kugira ngo iyi gahunda yihute ndetse abasaba korohereza abandi bashaka kwihutisha iterambere cyane cyane ababa bashaka kuhashyira ibikorwa by’ubucuruzi.

Kugeza ubu ingengo y’imari y’Umujyi wa Kigali ni miliyari 145 Frw. Muri aya mafaranga hafi 50% byayo ni ukuvuga agera kuri miliyari 72.5 Frw ava mu misoro y’abaturage.

Rubingisa agasaba abaturage gukomeza kumenyekanisha umusoro ndetse n’abajya mu bucuruzi bakabimenya kugira hatahirizwe umugozi umwe mu kuzamura ikigero cyo kwigira cyane ko kugeza ubu 57% by’ingengo y’imari yose y’igihugu iva mu gihugu harimo n’imisoro y’abaturage.

Ibi Meya Rubingisa yavuze bishimangirwa na Nayituriki Thérèse utanga serivisi za Mobile Money wahembwe nk’uwatanze imizoro neza, aho yavuze ko we azakomeza muri uyu mujyo ndetse akarushaho no gushishikariza bagenzi be kuwutanga ku buryo bwa nyabwo kuko “ubu ari uburyo bwiza bwo kubaka igihugu natwe twiyubaka.”

Uko umuntu yakererewe gutanga umusoro asabwa ku gihe ahanishwa 10% by’umusoro agomba kwishyura.

Ibi bihano byiyongeraho inyungu z’ubukererwe za 1% za buri kwezi mu gihe utaramenyekanishije umusoro ku nyungu hejuru ya bya bihano byo gutinda kwishyura hongerwaho 40% by’umusoro yagombaga kwishura.

Biteganyijwe ko ibi bikorwa byo gukangurira abatuye Umujyi wa Kigali gutanga umusoro bizamara ukwezi bikazakomereza mu mirenge no mu tugari ku buryo imyumvire ijyanye no gutanga imisoro ku baturage yazamuka bityo n’igihugu kikarushaho gutera imbere.

Ubukangurambaga bwo gushishikariza abantu gusora neza biteganyijwe ko buzamara ukwezi kugira ngo abaturage bazamurirwe imyumvire ku buryo imisoro itangwa
Komiseri wungirije ushinzwe Intara n’Imisoro y’Ibanze muri RRA, Karasira Ernest, atanga igihembo ku watanze imisoro neza
Komiseri wungirije ushinzwe Intara n’Imisoro y’Ibanze muri RRA, Karasira Ernest, yasabye abaguzi kujya baka inyemezabuguzi ya EBM, kuko baba batanze umusanzu wabo mu kubaka igihugu
Meya w'Umujyi wa Kigali, Rubingisa Pudence, ashimira uwahize abandi mu gutanga imisoro neza
Abahize abandi mu gusora neza bo mu turere dutatu tw'Umujyi wa Kigali bahawe ibihembo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .