Abafite ubumuga bw’uruhu bemerewe kwifashisha mituweli mu kugura amavuta yo kurwitaho

Yanditswe na Mukahirwa Diane
Kuya 23 Ugushyingo 2020 saa 11:00
Yasuwe :
0 0

Mu Nama y’Igihugu y’Umushyikirano ya 2017, abafite ubumuga bw’uruhu basabye koroherezwa kubona amavuta y’uruhu rwabo bakayagura kuri mituweli.

Imwe mu mbogamizi abafite ubumuga bagaragaje ni uko amavuta bifashisha asanzwe akoreshwa n’abandi bantu kandi ahenze cyane.

Aya mavuta afasha abafite ubumuga bw’uruhu kutagira ibibazo byinshi birwangiza kuko akenshi usanga iyo rutayafite rukomeza kwangirika cyane bishobora no kubaviramo no kurwara kanseri.

Nyuma y’ubusabe bw’igihe kirekire, kuri ubu aya mavuta agiye kwegerezwa abafite ubumuga bw’uruhu ku bigo nderabuzima ndetse azajya atangwa kuri mituweli.

Ni amakuru yatangarijwe mu muhango wo gutangiza Icyumweru cyahariwe kwita ku bafite ubumuga kizasozwa ku wa 3 Ukuboza 2020, ku Munsi Mpuzamahanga w’abafite ubumuga.

Umuhuzabikorwa w’Inama y’Igihugu y’Abafite Ubumuga, Ndayisaba Emanuel, yavuze ko ikibazo cy’amavuta y’abafite ubumuga bw’uruhu cyabonewe umuti.

Ati “Ubu ngubu amavuta yamaze kuboneka mu gihugu hakozwe n’inama yo kureba uko twayohereza mu bigo nderabuzima, kandi tunirinda ko abatayagenewe bazayakoresha, tuzakorana na RSSB na Minisiteri y’Ubuzima n’Ikigo gishinzwe gutumiza imiti mu mahanga kugira ngo azahabwe abayagenewe kandi azajya atangirwa kuri mituweli.”

Umunyamabanga wa Leta muri Minisiteri y’Ubutegetsi bw’Igihugu, Nyirarukundo Ignacienne, yavuze ko aya mavuta ari umuti ku ruhu rw’abafite ubumuga.

Yakomeje ati “Ikibazo cy’amavuta y’uruhu cyararangiye, ubundi si amavuta ni umuti kandi na kera iyo bayita umuti muganga akawukwandikira byari koroha. Amavuta nafatwe nk’umuti, bawufate kuri mituweli n’ubundi bwishingizi, buri wese akwiye kuyabona ku giciro gihendutse.”

Ku ruhande bw’abafite ubumuga bishimiye ko bagiye kubona amavuta kuri mituweli kuko yajyaga abahenda.

Komezusenge Charles ufite ubumuga bw’uruhu yavuze ko kuba amavuta bagiye kuyabona kuri mituweli ari intambwe y’ingenzi yatewe.

Ati “Ni intsinzi ikomeye cyane ko kuva uyu muryango washingwa yari imbogamizi twahoraga tugaragaza ko aya mavuta arahenda kandi tuba tuyakeneye. Ni ibyishimo rero ko Perezida yabitwemereye none bikaba bishyizwe mu bikorwa.”

Ubusanzwe amavuta y’uruhu yagurwaga 10500 Frw mu gacupa kamara ukwezi kuri ubu ufite mituweli azajya ayagura 1500 Frw.

Komezusenge Charles ufite ubumuga bw'uruhu yavuze ko bashimishijwe no kuzajya babona amavuta kuri mituweli kuko yabahendaga cyane
Umunyamabanga wa Leta muri Minisiteri y’Ubutegetsi bw’Igihugu, Nyirarukundo Ignacienne, yavuze ko amavuta ari umuti abayakeneye bakwiye kujya bayahabwa kuri mituweli
Umuhuzabikorwa w’Inama y’Igihugu y’Abafite Ubumuga, Ndayisaba Emanuel, yavuze ko abafite ubumuga bw'uruhu bagiye kujya bahabwa amavuta kuri mituweli
Hatangijwe icyumweru cyo kwita ku bafite ubumuga

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .