Abafite ubumuga bw’ubugufi bukabije ntiboroherwa no kubikuza ku byuma bya ATM

Yanditswe na Thamimu Hakizimana
Kuya 10 Mutarama 2019 saa 05:16
Yasuwe :
0 0

Bamwe mu bafite ubumuga bw’ubugufi bishimira ko babasha kugerwaho na serivisi z’imari ariko bakigorwa no gukoresha ibyuma abantu bakoresha mu kubikuza amafaranga bizwi nka ATM, kuko usanga bibasumba.

Bavuga ko kuba ibi byuma bya ATM bishyirwa ahantu batabasha gushyikira bibabangamira cyane kuko bibasaba guhabwa amafaranga ari uko binjiye muri banki. Ni ibintu basanga bibasubiza inyuma mu iterambere ry’ikoranabuhanga rikomeje gukataza.

Abaganiriye na IGIHE bemeza ko mu mpera z’icyumweru (Week-End), bakunze kubura uko babikuza amafaranga yabo, kuko banki nyinshi zidakora ku buryo ngo hari n’abo biviramo kwibwirirwa cyangwa kuburara iyo batayabikuje mu yindi minsi cyangwa ngo babone abo bizeye babafashe.

Basaba ubuyobozi bubakorera ubuvugizi n’ubw’amabanki atandukanye kubafasha kugira ngo nabo bajye babasha guhabwa serivisi n’ibi byuma bya ATM, batarindiriye gukoresha sheki na zo zitaborohereza.

Ufite ubumuga bw’ubugufi bukomatanye n’ubw’ingingo Jambo Moses, yabwiye IGIHE ko bifuza ko za banki zabashyiriraho ibyuma biri hasi kugira ngo nabo babashe kujya babikoresha.

Yagize ati “Bikunze kutugora cyane iyo ari mu mpera z’icyumweru kubera ko hari banki zidakora, hari ubwo ubura uko ubikuza amafaranga kubera ko ibyuma biri hejuru, ku buryo hari n’ubwo bigusaba guha undi ikarita ukanamubwira umubare wawe w’ibanga kandi atari ngombwa, kugira ngo akubikurize.”

Uwitwa Mukampogazi Esther we yagize ati “Imbogamizi bidutera ni uko hari igihe uba ugiye kubikuza nk’amafaranga ukaba utabasha gushyira iriya karita mu cyuma kuko kiri hejuru aho utabasha gushyikira, bigatuma utinda cyangwa ugataha ntayo ujyanye.”

Ushizwe serivisi zikoresha ikoranabuhanga (E-Banking) muri Cogebanque, Nishimwe Yvon Girbert, avuga ko iki kibazo bakizi ndetse bari kucyigaho.

Yagize ati “Ku bijyanye na ATM, ikoranabuhanga rikoreshwa n’abafite ubumuga no mu bihugu byateye imbere ubona bitaragera ahantu hose, natwe turimo kubirebaho ku buryo biramutse bishobotse dushobora kureba uburyo twabona iryo koranabuhanga.”

Asobanura ko iryo korabuhanga ridasaba ufite ubumuga gukora ku cyuma ahubwo acyegera kigahita kigaragaza telefoni ye rikanamusaba gushyiramo umubare w’ibanga akoresheje telefoni bigahita bigera no kuri ATM, akabona amafaranga ye.

Gusa yagaragaje ko iryo koranabuhanga rihenze ku buryo ari byo bibabera inzitizi cyane cyane ko usanga n’umubare w’abafite ubumuga bagorwa no gukoresha ATM atari benshi.

Uretse ikibazo cyo kutagera kuri ATM, abafite ubumuga bw’ubugufi bukabije bavuga ko banahura n’ikibazo cy’uko iyo bagiye mu maduka batabasha kumenya ibicuruzwa birimo kubera ko icyo bacururizaho (Comptoire) ziba ari ndende.

Jambo Moses ufite ubumuga bw’ubugufi bukomatanye n’ubw’ingingo avuga ko bagorwa no gukoresha ATM
Bamwe mu bafite ubumuga bw'ubugufi bukabije bemeza ko batagera ku byuma bya ATM

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza