Abafite ubumuga bongeye gutakamba ku kutabona imfashanyigisho zihagije mu mashuri

Yanditswe na Mukahirwa Diane
Kuya 5 Ukuboza 2020 saa 04:00
Yasuwe :
0 0

Mu myaka yo hambere umwana wavukanaga ubumuga mu Rwanda yarahishwaga, ntiyemererwaga kugera ahabona ndetse yahezwaga mu muryango.

Iyi migirire yagiye ihinduka ndetse kuri ubu abafite ubumuga bagenda bahabwa uburenganzira bwabo burimo no kwiga.

Nubwo abana bafite ubumuga bakurikirana amasomo atandukanye kimwe n’abandi biciye muri gahunda y’uburezi kuri bose hari aho usanga bagorwa n’imyigire bitewe no kutagira ibikorwa remezo bibafasha bijyanye n’imiterere yabo.

Leta y’u Rwanda yakoze byinshi mu gufasha abana bafite ubumuga kubona uburezi mu buryo bworoshye, birimo nko kubashyiriraho amashuri yabo ubwabo, guteza imbere ururimi rw’amarenga n’ibindi.

Nubwo hatewe intambwe mu iterambere ryabo haracyari imbogamizi mu kubona imfashanyigisho zihagije zo gufasha abana bafite ubumuga kwiga biboroheye bitewe n’imiterere n’ubushobozi bw’ibigo.

Izi ni zimwe mu mbogamizi zagarutsweho ubwo Umuryango w’Abanyamerika wita ku Iterambere Mpuzamahanga (USAID) washyikirizaga Ikigo cy’Igihugu cy’Uburezi (REB) ibitabo bikoranye ikoranabuhanga bizafasha abafite ubumuga bwo kutumva no kuvuga badakurikirana amasomo neza.

Ibi bitabo byanditswe mu mushinga wa USAID Soma umenye, ni ibyo gusoma, bikoranye ikoranabuhanga ko bibumbiyemo ururimi rw’amarenga n’amajwi ku buryo bizorohereza abafite ubumuga kubasha kubisoma.

Kuba ibi bitabo bizafasha abana bafite ubumuga gukurikirana amasomo yabo byabonetse ni ikintu cyo kwishimira kuko ubu mu mashuri yo mu Rwanda hakiri ikibazo gikomeye cy’imfashanyigisho ku burezi bw’abana bafite ubumuga.

Umuyobozi w’Ishami rishinzwe Ikoranabuhanga muri REB, Niyizamwiyitira Christine, wavuze ko hakiri ikibazo cy’imfashanyigisho zidahagije ku burezi bw’abafite ubumuga.

Yagize ati “Kugeza ubu mu mashuri yacu ntiturabona imfashanyigisho zihagije zo kwigishirizaho abana bafite ubumuga, bikaba bituma mu mashuri abafite ubumuga hari igihe batabasha kubona uburezi nk’uko bikwiriye.”

Abafite ubumuga na bo bavuze ko kuba hari imfashanyigisho zitaboneka mu mashuri ari ikibazo ku banyeshuri kuko badakurikirana amasomo yabo uko bikwiye.

Umuhuzabikorwa w’Inama y’Abafite Ubumuga bwo kutavuga no kutumva mu Rwanda, Munana Samuel, yavuze ko hakiri ikibazo cyo kuba nta bitabo bihari abafite ubwo bumuga bashobora gusoma bituma basubira inyuma mu bumenyi bw’indimi.

Ati “Hari inzitizi z’uko nta bitabo bihari abana bafite ubumuga bwo kutumva no kutavuga bashobora gusoma, kandi n’abarimu nabo bakaba batazi ururimi rw’amarenga bikagorana kubigisha.”

“Ibi rero bituma abana nta rurimi bamenya ugasanga ntibazi n’Ikinyarwanda, kandi iyo utazi ururimi na rumwe biba bigoye cyane kugira icyo wageraho, ibi rero bibangamiye uburezi bw’aba bana.”

Mu gukemura zimwe muri izi mbogamizi byatumye USAID itera ingabo mu bitugu gahunda ya leta y’uburezi kuri bose kugira ngo n’abafite ubumuga batazasigara inyuma mu burezi bikabadindiza mu iterambere.

Umuyobozi wa USAID mu Rwanda, Luann Gronhvd, yavuze ko Leta Zunze Ubumwe z’Amerika ishishikajwe no gushyigikira uburezi bw’u Rwanda butagira uwo buheza.

Ati “Uburezi ni uburenganzira bw’abana kandi n’abafite ubumuga barimo, gusoma ni umusingi wo kugira imyigire myiza ndetse no kuzagira ejo hazaza heza. Birakwiye ko buri mwana ahabwa uburezi bwiza kuko ari uburenganzira bwe.”

Tariki ya 3 Ukuboza 2020 nibwo Isi yizihije Umunsi Mpuzamahanga w’Abafite Ubumuga.

Umuhuzabikorwa w’Inama y’Abafite Ubumuga bwo kutavuga no kutumva mu Rwanda, Munana Samuel, yavuze ko abana bafite ubumuga bagorwa no kumenya indimi
Umuyobozi wa USAID mu Rwanda, Luann Gronhvd
Muri iki gikorwa harimo ufasha gusemurira abafite ubumuga bwo kutumva
REB yakiriye ibitabo bikoranye ikoranabuhanga rizafasha abana bafite ubumuga gukurikirana amasomo
Ibi bitabo bizafasha abana bafite ubumuga bwo kutuma no kutavuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .