00:00:00 IGIHE NETWORK KN KINYARWANDA EN ENGLISH FR FRANCAIS

Abafite ubumuga bafatwa bate ku isoko ry’umurimo mu Rwanda?

Yanditswe na Idukunda Kayihura Emma Sabine
Kuya 22 Ukuboza 2022 saa 09:12
Yasuwe :

Mu bihe bitandukanye hagiye humvikana abafite ubumuga bavuga ko biga ariko barangiza amashuri bakagira ikibazo cyo kudahabwa umwanya wo guhatana n’abandi ku isoko ry’umurimo, kenshi bakareberwa mu ndorerwamo y’ubumuga bafite bakimwa amahirwe.

Ibi biri mu byatumye imiryango itandukanye abafite ubumuga babarizwamo, itegura ibiganiro kugira ngo abo mu nzego za Leta n’iz’abikorera bibutswe ko abafite ubumuga hari imirimo bakora neza bityo ko batagomba guhezwa.

Urwego rw’Abikorera rwatunzwe agatoki ko rugiheza abafite ubumuga iyo bigeze mu itangwa ry’akazi, bityo ko Urugaga rw’Abikorera mu Rwanda (PSF) rukwiriye kugira uruhare mu gushakira umuti iki kibazo.

Umunyamabanga Nshingwabikorwa w’Inama y’Abantu bafite ubumuga mu Rwanda (NCPD), Ndayisaba Emmanuel, avuga ko NCPD na PSF hari amasezerano y’imikoranire bagiranye mu gukemura iki kibazo.

Ati‘‘Hari amasezerano y’imikoranire twagiranye na PSF kuko twabonye aribwo buryo bworoshye bwo kugeza ubutumwa ku bikorera.’’

Ndayisaba avuga ko aya masezerano ari gutanga ibisubizo kuko hari ingero z’igihe NCPD yasabwe na PSF urutonde rw’amazina y’abafite ubumuga n’akazi bashobora gukora.

Avuga ko hategerejwe kumenye igihe bazakoreshwa ibizamini by’akazi.

Umuyobozi Wungirije w’Umuryango Nyarwanda w’Abagore Bafite Ubumuga (UNABU), Uwamaliya Djovine, avuga ko iyo bigeze ku mugore cyangwa umukobwa ufite ubumuga, bikigoye ko abona akazi.

Ati ‘‘Navuga ko kugeza ubungubu ibijyanye n’umurimo abantu bafite ubumuga bari inyuma, ariko noneho ku mugore n’umukobwa bafite ubumuga navuga ngo ni umwihariko.’’

Uwamaliya avuga ko kuba hari abagifata umugore nk’umunyantege nke ku murimo atanafite ubumuga, bigera ku mugore n’umukobwa ubufite bigakabya.

Asaba abantu bose kugira amakuru ku mibereho y’abantu bafite ubumuga, bagasobanukirwa ko hari ibyo bashoboye kandi bakora neza baramutse bahawe umwanya wo kubigaragaza.

Umuyobozi Mukuru w’Urugaga rw’Abikorera mu Rwanda (PSF), Bafakulera Robert, avuga ko kugira ubumuga bidasobanuye kudashobora akazi, asaba abikorera kudaheza abafite ubumuga kuko bashoboye.

Ati ‘‘Kugira ubumuga ntabwo bivuze ngo umuntu ntashobora gukora akazi, kandi hari imirimo myinshi itandukanye biturutse n’ukuntu umuntu ameze n’ibyo yashobora gukora.’’

Bafakulera yatanze urugero rw’uko hari akazi gakoreshwa ikoranabuhanga ku buryo ufite ubumuga ashobora kugakora neza ndetse no kurusha udafite ubumuga.

PSF irateganya gushyiraho amahuriro abarizwamo abantu mu byiciro bitandukanye mu buryo bwo kwibumbira hamwe hagamijwe koroshya ubuvugizi.

Aya mahuriro azaba arimo iry’abafite ubumuga, iry’abagore ndetse n’iry’urubyiruko.

Imibare y’Inama y’igihugu y’abafite ubumuga (NCPD) igaragaza ko abantu ibihumbi 32 bafite ubumuga butandukanye aribo batuye mu Mirenge itandukanye igize Umujyi wa Kigali.

Kugeza ubu iyi nama igaragaza ko itewe impungenge n’uko muri aba bantu barenga ibihumbi 30 bafite ubumuga muri Kigali, abagera kuri 300 batunzwe no gusabiriza.

Inama y’igihugu y’abafite ubumuga (NCPD) igaragaza ko hari aho abafite ubumuga bahezwa ku isoko ry'umurimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .