Abafite ubumuga babayeho bate mu nzego zitandukanye z’ubuzima?

Yanditswe na Habimana James
Kuya 10 Ukwakira 2019 saa 09:48
Yasuwe :
0 0

Muri Nyakanga 2018 i Londres mu Bwongereza habereye Inama Mpuzamahanga y’abafite ubumuga, irangira ibihugu bitandukanye ku Isi bishyizeho ingamba zigamije kurengera abafite ibi bibazo bitandukanye by’ingingo.

Intego nyamukuru z’iyi nama zari uguhindura ubuzima bw’abafite ubumuga hibandwa ku hakigaragara kutubahiriza uburenganzira bwabo, gushishikariza imiryango itandukanye guhura kandi bagashyiraho ingamba zijyanye na gahunda za Loni zirengera abafite ubumuga.

Harimo kandi kugaragaza ibimaze gukorwa mu bihugu bitandukanye by’Isi ariko no gushyiraho gahunda zifasha abafite ubumuga.

Guverinoma y’u Rwanda nayo yihaye intego zitandukanye, zigamije gukomeza gushyigikira abafite ubumuga.

Zimwe muri izo ntego harimo ko umwaka wa 2019 uzarangira yaramaze kwemeza amasezerano ya AU arebana n’uburenganzira bwa muntu ku bantu bafite ubumuga, yiyemeje kandi ko umwaka wa 2018 wagombaga kurangira hashyizweho gahunda nshya ijyanye n’abafite ubumuga no kudashyirwa ku ruhande.

Ko umwaka wa 2019 uzarangira hasubiwemo itegeko risobanura abafite ubumuga bigendanye n’amahame mpuzamahanga agenga abafite ubumuga, ndetse n’ay’ Ishami ry’Umuryango w’Abibumbye ryita ku buzima.

Mu bindi ni uko u Rwanda rwemeje ko mu ngengo y’imari ya 2019/2020, NCPD izatanga inama mu ngeri zitandukanye z’irebana n’ingengo y’imari, mu 2020/2021 hagatangizwa ku rwego rw’igihugu ingengo y’imari y’abafite ubumuga.

Guverinoma kandi yemeje ko mu 2020 izateza imbere gahunda ya siporo mu bafite ubumuga ku rwego rw’igihugu no ku rwego mpuzamahanga, hakabamo no gutera inkunga amakipe n’abantu ku giti cyabo bafite ubumuga n’ibindi. Ni gahunda izagera mu 2024.

IGIHE yaganiriye n’inzego zitandukanye ndetse n’abagenerwabikorwa, harebwa ibimaze gukorwa n’ibigomba gushyirwamo ingufu mu gusigasira imibereho myiza y’abafite ubumuga.

Ndayisaba Emmanuel, Umunyamabanga Nshingwabikorwa w’Inama y’igihugu y’abafite ubumuga, NCDP, yavuze ko ibimaze gukorerwa abafite ubumuga hagendewe kuri gahunda leta yemeje ari byinshi nubwo hakiri ibyo gukora.

Agaragaza ko ibyakozwe cyane ari ukubashyiriraho amategeko abarengera.

Yagaragaje ko mu 2011 hajyaho inama y’igihugu y’abafite ubumuga, yatangiranye umurongo w’ibyakorwa ngo ahari ibibazo bikemuke.

Ati “Tukijyaho twafashe ingingo eshatu z’ingenzi arizo zijyanye n’uburezi, ubuvuzi ndetse n’iterambere, nyuma twasabye ko hakorwa ibarura ry’abafite ubumuga bagashyirwa mu byiciro, mu 2012 nibwo aduhaye imibare ingana n’ibihumbi 446 ariko inerekana n’ibyiciro byabo.”

Mu buvuzi hakozwe iki?

Ndayisaba yavuze ko nyuma yo kumenya umubare w’abafite ubumuga, habayeho no kumenya ibyiciro byabo kugira ngo n’utanga ubufasha amenye aho ahera afasha.

Yavuze ko bahise batangira gutanga amakarita y’abafite ubumuga, kugeza ubu bageze kuri 80%.

Ati “Kugeza ubu usanga buri muntu tuzi ibyo akeneye mu bumuga bwe, nk’ubu ibyinshi mu bikoresho dukenera bifasha abafite ubumuga usanga biva hanze kandi birahenze, urugero niba akagare k’ufite ubumuga kagura hagati y’ibihumbi 300-400 Frw, kugira ngo uzabone umuturage uryigurira biragoye ariko ubu iki kibazo twamaze kugikemura, dufite abafatanyabikorwa twasinyanye amasezerano yo kuduha ayo dushaka yose.”

Yakomeje agira ati “Ubu turimo kunoza ikijyanye n’ubwisungane mu kwivuza, turimo gufatanya n’Ikigo cya Gatagara gikorera i Nyanza aho ubu cyatangiye gutanga inyunganirangingo, serivisi zo kubagwa n’ibindi, ibi byose bemeye kubitanga bakoresheje ubwisungane mu kwivuza. Kugeza ubu ikibazo kigihari ni uko insimburangingo zo ntibarazemera ariko twaganiriye na Minisiteri zibishinzwe kandi bemera ko mu mwaka utaha nabyo bazabishyiramo.”

Mu burezi hakozwe iki?

Ndayisaba avuga ko ubu abafite ubumuga basigaye biga. Ati “Simvuze ko bose biga ariko hari intambwe imaze guterwa, ubu ugiye mu mashuri y’inshuke usangamo abafite ubumuga ndetse no mu yisumbuye, tugeze aho abafite ubumuga batabonye buruse, ubu twumvikanye n’Ikigo gishinzwe amashuri makuru, HEC ku buryo dukora urutonde rw’abafite ubumuga tukarwohererazayo, kikabaha buruse bakajya kwiga nta mafaranga batanze.”

Ati “Ubu turimo kuganira ngo tugire aba bantu bacu bahabwa buruse bajye kwiga hanze, bagaruke baza kwita ku bafite ubumuga.”

Yavuze ko “Ubu abafite ubumuga bwo kutumva no kutavuga turimo gutegura inkoranyamagambo y’ururimi rw’amarenga, turashaka ko tugira ururimu rw’amarenga rushingiye ku muco wacu kandi rube rwakwemerwa yewe rujye no mu mashuri rwigishwemo.”

Kongerera ubushobozi abafite ubumuga bihagaze gute?

Ndayisaba agaragaza ko abarangiza kwiga hari abagira ingorane zo kubona akazi, cyane ko abakoresha bamwe batarumva ukuntu umuntu utumva cyangwa utabona yakora akazi.

Yagize ati “Turimo kubona bamwe batsinda mu kizamini cyanditse bagera mu cyo kuvuga bakabaha amanota make bavuga ngo bazakora bate, nyamara ababakoresha bo bakubwira ko nta mukozi bigeze babona nk’aba bantu.”

Yavuze ko abatarashoboye kwiga nabo bashyizwe muri gahunda yo gufashwa kwihangira imirimo no gufashwa.

Yagize ati “Ubu dufite ingengo y’imari duhabwa buri mwaka yo kwigisha aba bantu kwihangira imirimo no gufasha imishinga y’abafite ubumuga ngo nabo birwaneho nubwo batashoboye kwiga.”

Agaragaza ko iyo uganiriye n’ibindi bihugu ubona ko biba bishaka kuza kwigira ku bimaze gukorwa mu Rwanda. Atanga urugero rw’aho Guverinoma y’u Rwanda yatangije uburyo bwo gushyiraho imodoka zifasha abafite ubumuga, ibi bikaba ari ibintu ubona mu bihugu bike.

Ihuriro ry’imiryango iharanira uburenganzira bw’abafite ubumuga mu Rwanda, Nudor, rivuga ko leta ifite ubushake bwo gukemura ibibazo by’abafite ubumuga, gusa ngo haracyari ibyo gukora.

Umunyamabanga Nshingwabikorwa wa NUDOR, Jean Damascène Nsengiyumva, yavuze ko ururimi rw’amarenga rukwiye kunozwa rukarangira, hakanozwa politike y’umuririmo yavuguruwe ariko itaremezwa kugira ngo abatanga akazi bayifasije mu buryo bwo kudaheza.

Yagize ati “Haracyari ibikoresho by’abafite ubumuga bitaraboneka, hari ibyakozwe ariko haracyari byinshi byo gukora, politike y’umurimo ninozwa byose bizakemuka.”

Thacien Yankurije, Umuyobozi w’ishami ry’imibereho myiza muri Minisiteri y’Ubutegetsi bw’Igihugu (MINALOC) avuga ko guverinoma hari byinshi imaze gukorera abafite ubumuga, birimo gushyiraho inzego ku buryo zibakurikirana umunsi ku munsi.

Ati “Buri mwaka amakoperative abiri muri buri karere aterwa inkunga, mu rwego rwo kurwanya kudaheza kandi hari ubugenzuzi bukorwa mu nyubako zitandukanye, harebwa niba zuzuje ibisabwa ngo abafite ubumuga bafashwe, ubu kandi Minisiteri y’Uburezi yashyizeho uburezi budaheza, harimo gutegurwa na politike y’abafite ubumuga.”

Yabwiye IGIHE ko ubu abari mu cyiciro cya mbere n’icya kabiri nabo bahabwa inkunga y’ingoboka ihwanye na 7,500 Frw buri kwezi.

Abafite ubumuga bageze he biyubaka?

Samaza Chantal atuye mu Karere ka Gasabo mu Murenge wa Kacyiru aho akora umwuga wo gutunganya imisatsi.

Nubwo afite ubumuga bw’ingingo ariko yanze kwicara ngo asabirize. Yahisemo guhuza bagenzi bafite ubumuga ngo bishakemo ibisubuzo.

Yabwiye IGIHE ko uko ari 65 bamaze imyaka ibiri bishyize hamwe, aho bakoze itsinda buri umwe akajya atanga amafaranga afite ngo bajye bagurizanya.

Ati “Kumugara ntibivuze kwicara ku muhanda ngo usabirize, iyo ufite mu mutwe hazima urakora, ubu uko twishyize hamwe iyo ushatse ugurizwa ibihumbi 50 buri kwezi akunguka ibihumbi bitanu akaba wayishyura mu mezi atatu, umwaka iyo urangiye dufata ya yandi y’inyungu ku buryo igera kuri buri munyamuryango.”

Avuga ko leta ibafasha umunsi ku munsi, gusa akavuga ko bafashwa kugira aho bakorera no kujya babona inkunga ijyanye n’igishoro.

Ati “Ikindi leta ikwiye kudufasha nk’abagore bafite ubumuga, ni uko twafashwa kubonerwa imidugudu kuko abenshi usanga abatishoboye kandi bafite abana, badufashije kubona aho tuba twatera imbere kuko duhora twirukanwa mu nzu z’abandi.”

Umunyamabanga Nshingwabikorwa wa NUDOR, Jean Damascène Nsengiyumva, avuga ko hari bimwe bigomba gukorwa ngo abafite ubumuga koko bafashwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza