Abafite inzuri zegereye Ikigo cya Gisirikare cya Gabiro bongeye kwihanangirizwa, batatu barazamburwa

Yanditswe na Hakizimana Jean Paul
Kuya 12 Ukuboza 2020 saa 07:55
Yasuwe :
0 0

Aborozi bafite inzuri mu turere dutatu twegereye Ikigo cya Gisirikare cya Gabiro bongeye kwihanangirizwa ku kurenga ku mabwiriza yo kwirinda kuragira muri iki kigo, batatu bamburwa inzuri nyuma y’aho leta izitiye inzuri bakarengaho bagasubira kuragira muri iki kigo.

Ibi byagarutsweho kuri uyu wa Gatanu tariki ya 11 Ukuboza 2020 ubwo abagize inama y’umutekano itaguye y’Intara y’Iburasirazuba bahuraga n’aborozi bo mu turere twa Nyagatare, Gatsibo na Kayonza kugira ngo bongere kubakebura ku kutajya kuragira muri iki kigo cya Gisirikare.

Aborozi batumiwe muri iyi nama ni abafite inzuri zihana imbibi n’Ikigo cya Gisirikare cya Gabiro, hanatumiwe kandi abayobozi bo mu makoperative y’aborozi akorera muri utwo turere, mu rwego rwo gufatanya kugira inama aba borozi.

Guverineri w’Intara y’Iburasirazuba, Mufulukye Fred yavuze ko impamvu bakomeza kubakoresha inama nyinshi ari ukugira ngo barusheho kubibutsa ingamba zafashwe, ndetse banarusheho kubagira inama z’ibyo bakwiriye kureka.

Yavuze ko leta yakoze ibishoboka mu gufasha aba borozi kutinjira mu Kigo cya Gisirikare cya Gabiro yubakira abagituriye uruhavu ruzengurutse ikigo cyose ndetse inzuri zimwe na zimwe ziranazitirwa ku mafaranga ya leta.

Ati “ Ariko twasanze inzuri eshatu zararenze kuri ayo ambwiriza bishyiriraho inzira zabo, icya mbere bwa buryo twakoresheje mu kuzitira inzuri barabuciye, barangije bataba n’umuferege wazitiraga inka kwinjira, ba nyiri izo nzuri rero twari twaje kubamenyesha ko bazambuwe kugira ngo nabo babimenye kuko amategeko arabiteganya.”

Mufulukye yakomeje avuga ko babahana kugira ngo bamenye ko ibyo bihano bihari.

Inzego z’ibanze zashinjwe kujenjeka

Umworozi witwa Kayumba Michel yashinje inzego z’ibanze zituriye Ikigo cya Girikare kureberera aborozi bajya kuragira muri iki Kigo asaba abayobozi kujya babakurikirana.

Yagize ati “ Ni gute umuntu mushya arara mu mudugudu bikamenyekana, umugore n’umugabo bakarwanira mu buriri bikamenyekana ariko umuntu washoreye inka ze akajya gusiba imiferege yashyizweho, agaca uruzitiro rwa senyenge akinjiza inka ze zose mu kigo ntamenyekane?”

Yavuze ko bigoye ngo uwo muntu ubuyobozi bwo hejuru bumumenye ariko avuga ko abayobozi b’imidugudu n’abashinzwe umutekano bamumenya, yasabye abayobozi kujya bakurikirana abo mu nzego z’ibanze bo hasi kuko ngo akenshi nabo babigiramo uruhare.

Pasiteri Peter Musisi yavuze ko nawe atumva impamvu aborozi bamwe na bamwe batumva nyamara leta yarabafashije mu kuzitira inzuri zabo, ikabaha amazi ku buryo mu mpeshyi inka zabo zitakibura amazi.

Ati “ Njyewe nibwira ko biriya bijyana n’ubujiji bwa kavukire nkanakeka ko hashobora kuba hari n’abantu bari mu kigo bakorana n’abaturage bakabwira kuza kuragiramo bikaba ubucuruzi hagati yabo, leta yadukoreye ibintu byiza byinshi baduciriye uruhavu, baduha amazi tumaze umwaka amazi atabura nyamara mbere byaratugoraga hari n’abandi banazitiriwe inzuri kuburyo batakabaye bajyayo.”

Guverineri Mufulukye yavuze ko kuri ubu umworozi bazajya bafata bazajya babanza kureba uruhare umuyobozi w’umudugudu n’uw’akagari bagize mu kumushishikariza kutajya kuragira muri iki kigo kuko ngo bigenda bigaragara ko hari ababigiramo uruhare.

Umuyobozi w’Urwego rw’Igihugu rw’Ubugenzacyaha RIB mu Ntara y’Uburasirazuba, Rutaro Hubert, yabwiye aba borozi ko ujya kuragira mu Kigo cya Gisirikare cya Gabiro aba akoze ibyaha bitatu birimo kwangiza ibikorwa remezo, kurandura imbago z’ikigo ndetse no kwigomeka ku buyobozi abasaba kubireka kuko ngo bishobora no kubafungisha.

Inama Njyanama z’utu turere dutatu zanzuye ko inka zizajya zifatirwa mu Kigo cya Gisirikare cya Gabiro zizajya zitezwa cyamunara amafaranga avuyemo agashyirwa mu isanduku ya leta, umwaka ushize hagurishijwe inka z’aborozi batandukanye ariko na n’ubu haracyakunze gufatirwamo izindi nka.

Guverineri w'Intara y'u Burasirazuba Fred Mufulukye na Maj. Gen. Mubaraka Muganga bakoresheje aba baturage inama
Aba borozi bihanangirijwe, batatu muri bo bamburwa inzuri
Bamwe muri aba borozi bashinje inzego z'ibanze uburangare
Bamwe muri aba borozi bashinje inzego z'ibanze uburangare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .