Abafatiwe muri P5 batakambiye urukiko nyuma yo gusabirwa gufungwa burundu, umwe bavuga ko arwaye mu mutwe

Yanditswe na Rabbi Malo Umucunguzi
Kuya 7 Ukuboza 2020 saa 01:30
Yasuwe :
0 0

Ubushinjacyaha bwa Gisirikare, kuri uyu wa Mbere bwasabiye abantu 32 bashinjwa gukorana n’umutwe wa P5, gufungwa burundu, ku byaha bakurikiranyweho birimo iterabwoba no kugambirira kugirira nabi ubutegetsi buriho.

Mu baregwa harimo amatsinda abiri, irya mbere rigizwe n’abantu 25 barangajwe imbere na Rtd Major Mudathiru Habib wahoze mu Ngabo z’u Rwanda, baregwa ibyaha bitanu birimo kwinjira mu mutwe w’ingabo utemewe; kugambirira kugirira nabi ubutegetsi buriho; kugirana umubano na Leta y’amahanga bigiriwe gushoza intambara, kurema umutwe w’abagizi ba nabi no gucura umugambi wo gukora icyaha cy’iterabwoba.

Bafatiwe mu mashyamba nyuma y’ibitero bagabweho n’Ingabo za FARDC, bahuriza ku kuba barashyikirijwe u Rwanda ku wa 18 Kamena 2019.

Hari n’irindi tsinda rifatwa nk’irirangajwe imbere na Pte Muhire Dieudonné, rigizwe na Corporal Kayiranga Viateur, Corporal Dusabimana Jean Bosco, Private Igitego Champagnat n’abasivili Muhire Pacifique na Nzafashwanimana Richard.

Nyuma y’umwanzuro w’ubushinjacyaha, abaregwa bahawe umwanya ngo bagire icyo bavuga, bagenda batakambira urukiko umwe ku wundi, bagaragaza ko benshi bisanze mu mutwe witwaje intwaro wa P5, bajyanywe n’ababashukaga babijeje kubaha akazi.

Ibyo bigatuma bavuga ko nta bushake bwo gukora icyaha bari bafite, nubwo Ubushinjacyaha bwakomeje kuvuga ko utarashimye kuba muri uyu mutwe yagombaga gutoroka, kandi ngo hari ababikoze bagarutse mu Rwanda, ubu batekanye.

Bitandukanye ariko na Rtd Maj Habib Mudathiru (we azatangaza icyifuzo cye kuri uyu wa Kabiri), we wemera ko yagiye muri P5 azi neza ko agiye gutoza abasirikare bashya bazagenda binjizwamo, nyuma yo guhurira n’abayobozi bayo i Kampala.

Nsanzimana Patrick yavuze ko nk’uko yagerageje kubisobanura mu rukiko, ko nta bushake bwo gukora icyaha bwabayeho, yemera ko yagize uburangare ntabe maso agashukwa, akisanga yagiye mu mutwe witwaje intwaro.

Ati “Nkaba nsaba imbabazi z’iki cyaha, ngasaba imbabazi u Rwanda n’Abanyarwanda kandi nkaba nizeza abanyarwanda ko mbabariwe iki cyaha, ntazahirahira ngo mbisubiremo kubera kutaba maso.”

Mu bafunzwe kandi harimo Pte Muhire Dieudonne wari umusirikare muri RDF, wafunzwe nyuma y’igihe yaratorokeye muri Uganda, ushinjwa ko hagiye no mu mashyamba ya RDC. Muri icyo gihe ngo yaninjizaga abarwanyi mu mutwe wa FLN na P5.

Yahakanye ibyaha byose, cyane ko ngo abayobozi ba FLN bafashwe, yaba Nsabimana Callixte Sankara cyangwa Paul Rusesabagina, nta n’umwe baziranye ku buryo adakwiye guhamywa imikoranire n’uyu mutwe.

Uyu musore ajya gutangira ibi byose, mu 2017 ngo yibye sheki ya mugenzi we Pte Bunani Jean yo muri Unguka Bank, aza guhamagara uwitwa Cyrille Ndizeye bahurira i Musanze, amuha iyo sheki yujujeho miliyoni 1.9 Frw, barayabikuza nyuma baza kuyagabana.

Pte Muhire yaje gufungwa anakatirwa gufungwa imyaka irindwi, ariko atoroka igisirikare, ajya muri Uganda, ku buryo we asanga akwiye guhanirwa gutoroka kasho, aho kuba igisirikare.

Yashinjwe ko yageze muri Uganda ahabwa ubutumwa bwo gushaka abarwanyi bashya muri FLN ahereye ku bakoranye muri RDF, akagenda abakangurira kwanga igisirikare. Ubushinjacyaha bumurega ko yafashwe agarutse mu Rwanda kwakira abasirikare yari kujyana muri uwo mutwe, nabo ubu bari imbere y’urukiko.

Me Rutebuka Jean Patrick umwunganira, yavuze ko uyu musore agomba kuba afite uburwayi bwo mu mutwe ku buryo akeneye gusuzumwa n’abaganga, nubwo nyir’ubwite atigeze abitindaho.

Pte Muhire ngo yagiye mu gisirikare mu 2009 afite indoto zo kuba umukomando, ariko ngo byaje kumugiraho ingaruka zitumye muri iki gihe ari imbere y’urukiko.

Yagize ati “Mu biganiro twagiranye no mu myitwarire yagaragaje imbere y’urukiko, twabonye mu mutwe we afite ikibazo, ndetse yavuze ko hari ikindi gihe byigeze kumubaho, akagaragaraza imyitwarire yo gusara.”

“Icya mbere dusaba ni uko urukiko rwabwira Ubushinjacyaha kumusuzumisha, rukagaragaza ibisubizo mbere y’uko icyemezo cy’urukiko gifatwa, inzobere ikagaragaza ibimenyetso ko Muhire arwaye, hagatangwa umwanuro unyuze mu mucyo.”

Yavuze ko ubundi umurwayi adahanwa ahubwo avuzwa, ku buryio “bigaragaye ko Muhire afite ikibazo cy’uburwayi, yasubizwa uko yahoze mbere, mu kigo cya Gisirikare ku Mukamira, muri batayo ya 73”.

Mu gihe ngo urukiko rutabibona uko ariko, ngo rwashingira ku mpamvu nyorohyacyaha kuko ibikorwa akurikiranyweho bidakwiriye kuvangwa n’iby’abakoze ibindi byaha baregwa hamwe, kuko we atafatiwe mu mutwe witwaje intwaro.

Icyo gihe ngo yahanirwa gutoroka igisirikare agahanisha igihano cy’amezi atandatu y’igifungo, ndetse ngo gishobora kujya munsi hagendewe ku mpamvu nyoroshyacyaha.

Mu basabiwe gufungwa burundu kandi harimo Nzafashwanimana Richard wafashwe nyuma yo gutwara kuri moto Pte Muhire Dieudonne atorotse. Yavuze ko yakoze akazi ko gutwara umuntu kuri moto gusa, ndetse ngo yamwishyuye igiciro gisanzwe, nta kindi ngo bari bahuriyeho.

Gusa Ubushinjacyaha bwagaragaje ko ari we wambukije n’abandi basirikare benshi bagiye batoroka, akabageze ku mupaka wa Uganda.

Mu iburanisha bwagaragaje ibiganiro byaberaga kuri Facebook hagati Pte Muhire warangiye Pte Igitego Champagnat umumotari Nzafashwanimana Richard wakoreraga mu karere ka Burera wagombaga kubacikisha, ahita amubwira ko amuzi, ngo “ni ingurutsi y’umumotari, ni nawe ufasha abantu baciye isheni”.

Nzafashwanimana yavuze ko arengana, asaba ko yarekurwa agasanga umuryango we ugizwe n’umugore n’abana yasize.

Pte Igitego Champagnat we yavuze ko yarenganurwa agasubizwa muri RDF kuko yayikuwemo. Umwunganizi we Me Sadi Jashi, yavuze ko urukiko rukwiye kumugiora umwere, nubwo atigeze ajya muri byinshi yaba ashingiraho. Mu byaha aregwa we hiyongeraho icy’ingengabitekerezo ya Jenoside.

Nyuma yo kumenyeshwa umwanzuro w’Ubushinjacyaha, abaregwa bazakomeza kugaragaza imyanzuro yabo banasaba ibyo urukiko rwazibandaho mu kubacira urubanza. Ni igikorwa kizasozwa kuri uyu wa Kabiri, hagatangazwa itariki urubanza ruzasomerwaho.

Abantu 32 bafatiwe muri P5 basabiwe gufungwa burundu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .