Abadepite batoye itegeko ry’ingengo y’imari ya Leta ivuguruye ya 2019/2020

Yanditswe na IGIHE
Kuya 26 Gashyantare 2020 saa 07:45
Yasuwe :
0 0

Inteko Rusange y’Umutwe w’Abadepite iyobowe na Perezida wawo, Mukabalisa Donatille, kuri uyu wa Gatatu yateranye yemeza Itegeko no 014/2019 ryo kuwa 30/06/2019 rigena ingengo y’imari ya Leta y’umwaka wa 2019/2020.

Ubwo Depite Prof Munyaneza Omar, Perezida wa Komisiyo y’Ingengo y’Imari n’Umutungo by’Igihugu yagezaga ku Nteko Rusange raporo ya Komisiyo ku mushinga w’itegeko rihindura kandi ryuzuza Itegeko no 014/2019 ryo kuwa 30/06/2019 rigena ingengo y’imari ya Leta ya 2019/2020, yavuze ko itegurwa ry’umushinga w’itegeko rihindura itegeko no 014/2019 ryo ku wa 30/06/2019 rigena ingengo y’imari ya Leta ya 2019/20.

Yavuze ko basuzumye uyu mushinga basanga wubahiriza ibiteganywa n’Itegeko Ngenga no 12/2013/OL ryo ku wa 12/09/2013 ryerekeye imari n’umutungo bya Leta.

Yavuze kandi ko nk’uko bigaragara, hari inzego zimwe na zimwe ingengo y’imari yazo yagabanutse, ariko mu isesengura harebwe ibyo basanga bitazarangirana n’umwaka w’ingengo y’imari, amafaranga yabyo akimurirwa ahandi hari ibikorwa byihutirwa kuruta ibindi.

Hari kandi izindi nzego ingengo y’imari yazamutse cyane, bikaba byaratewe n’uko hari imishinga yagombaga gukorwa n’urwego runaka ariko ikimurirwa mu rundi.

Ibi ni byo byatumye ingengo y’imari ya Leta yiyongeraho Miliyari 140.1 FRW igera kuri Miliyari 3,017.1 FRW ivuye kuri Miliyari 2,876.9 FRW yari yatowe n’Inteko Ishinga Amategeko muri Kamena 2019.

Minisitiri w’imari n’igenamigambi Dr Uzziel Ndagijimana, ubwo yatangazaga umushinga w’ingengo y’imari ivuguruye, yavuze ko iyi nyongera izafasha mu kwishyura imishahara y’abaganga bashya no kubazamura mu ntera, kubonera za ambasade nshya arizo Accra muri Ghana, Doha muri Qatar, Rabat muri Marocco n’izindi nzego zirimo minisiteri y’umutekano mu gihugu amafaranga yo gukoresha.

Yavuze ko hari kandi amafaranga afasha mu bwisungane mu kwivuza, ndetse n’amafaranga afasha mu gutanga amata ku bana n’ibindi.

Nyuma yo kumva ibisobanuro ku bibazo byabajijwe ndetse no kwakira ibitekerezo byatanzwe n’Abadepite batandukanye kuri raporo ya Komisiyo, Inteko Rusange y’Umutwe w’Abadepite yakiriye raporo ya Komisiyo ubwo yasuzumaga uyu mushinga w’ingengo y’imari ivuguruye, hanyuma kandi ihita itora itegeko rihindura kandi ryuzuza Itegeko no 014/2019 ryo kuwa 30/06/2019 rigena ingengo y’imari ya Leta y’umwaka wa 2019/2020.

Inkuru bifitanye isano: Ingengo y’Imari ya 2019/2020 iziyongeraho arenga miliyari 140 Frw

Abadepite bemeje ingengo y'imari ivuguruye ya 2019/2020
Minisitiri w'imari n'igenamigambi Dr Uzziel Ndagijimana ubwo yagezaga ku badepite umushinga w'itegeko ry'ingengo y'imari ivuguruye
Perezida w'Umutwe w'Abadepite Mukabalisa Donatille niwe wayoboye Inteko rusange yatoye itegeko ry'ingengo y'imari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza