Abacuruzi bo muri EAC bagiye gusaba ko ibiciro byo gutwara abantu mu kirere bisuzumwa

Yanditswe na Habimana James
Kuya 22 Ugushyingo 2019 saa 11:14
Yasuwe :
0 0

Abacuruzi bahuriye mu ihuriro ryabo muri Afurika y’Iburasirazuba, batangaje ko gusubiramo ibiciro byo gutwara abantu mu kirere muri EAC, ari kimwe mu bibazo inama ihuza aba bacuruzi bazaganiraho i Arusha muri Tanzania, hagati ya tariki 28 kugeza kugeza 29 uku kwezi.

Umuyobozi wungirije w’inama y’abacuruzi muri aka karere, Denis Karera, yabwiye itangazamakuru ko iyi nama ishaka gukemura ibibazo bikomeye byugarije ubucuruzi mu karere, cyane cyane ubucuruzi bwambukiranya imipaka.

Yagize ati "Imbogamizi mu bucuruzi zikomeje kubangamira ibyambukiranya imipaka, turashaka kugaragaza iki kibazo, turashaka ko ikibazo cy’ingendo z’ikirere kirebwa kugira ngo indege zacu zigende mu buryo bworoshye kandi vuba, amatike abe ahendutse."

"Ushobora gutangara ukibaza impamvu amatike y’indege agihenze muri aka karere, u Rwanda hari imisoro ruca, niko bikorwa kuri Kenya, Uganda n’ahandi, tugomba guhangana n’iki kibazo nk’uko bimeze n’ahandi. Turashaka gukora uvugizi ku buryo za guverinoma zivanaho iki kibazo, twagiye tuganira kuri iki kibazo mu myaka myinshi ubu ariko dukeneye ko gikemurwa."

Yatanze urugero rw’aho ibigo by’indege bimwe bica amadorali 800 kuri buri mugenzi uvuye i Kigali ajya Nairobi mu isaha imwe.

Ati “Ibi bibangamiye kugenda kw’abantu, igiciro cy’itike y’indege cyagombaga kujya ku madorali 110 ariko kubera imisoro iri hejuru, kirazamuka.”

Ibindi bibazo bizaganirwaho, yavuze ko birimo imisoro icibwa ku mugenzi uri muri modoka rusange.

Ati “Nk’ubu imodoka zitwara abagenzi aho abenshi baba ari abacuruzi bavuye mu Rwanda bajya Nairobi icibwa amadorali 150, ni nako bimeze ku ikamyo itwara imizigo hagati y’ibihugu bibiri.”

Karera kandi yavuze ko ikindi kibazo gihari kijyanye na kontineri zitwara amabuye y’agaciro ziburirwa irengero mu gihe ziri mu ngendo.

Ati "Dufite ingero zimwe aho za kontineri zaburiwe irengero mu gihe zabaga zigeze muri Tanzania."

Yavuze ko mu myaka 20 ishize, imwe mu misoro yari iriho yari 175, kugeza ubu 50 niyo ngo bikenewe ko ikemurwa.

Yavuze ko hari ibyakozwe kuko nka kontineri iva Tanzania byayitwaraga hejuru y’amezi abiri ngo igere mu Rwanda, ubu bitwara gusa iminsi irindwi.

Karera yavuze kandi ko kuba Repubulika Iharanira Demokarasi ya Congo isaba kwinjira muri uyu muryango ari ibintu byiza. Yavuze ko nk’abagize inama y’ubucuruzi muri aka karere, basaba ko byaba byiza ubu busabe bugenzuwe mu buryo bwa vuba.

Karera yavuze ko ikibazo cy'imisoro muri aka karere gikwiye guhagurukirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza