Abacuruzi barindwi baciwe miliyoni zirenga 2Frw kubera amakosa arimo gucuruza ibyarengeje igihe

Yanditswe na Twarabanye Venuste
Kuya 4 Mata 2020 saa 01:29
Yasuwe :
0 0

Minisiteri y’Ubucuruzi n’Inganda (MINICOM), yaciye amande ibigo birindwi by’ubucuruzi yatahuyeho amakosa yo kudakurikiza amategeko, mu igenzura yakoze ku itariki ya 2 n’iya 3 Mata 2020.

Kuri uyu wa 4 Mata 2020, MINICOM yatangaje ko mu igenzura yakoze ku itariki 2 n’iya 3 Mata 2020, yahanishije amande ya miliyoni ebyiri n’ibihumbi 390 by’amafaranga y’u Rwanda, ibigo by’ubucuruzi birindwi, nyuma yo gutahurwaho kudakurikiza amategeko.

Ibyo bigo by’ubucuruzi byahaniwe amakosa arimo; kutamanika ibiciro, kudatanga inyemezabuguzi, kuzamura ibiciro, gucuruza ibyarangije igihe, kugabanya ibiro, no gukoresha imashini zitujuje ubuzirangenga. Hari n’ahagaragaye umwanda hafunzwe by’agateganyo.

Ku wa 16 Werurwe 2020, nibwo MINICOM yasohoye itangazo risobanura ko hari abacuruzi bamwe bitwaje ko igihugu kirimo guhangana na Coronavirus bakuriza ibiciro, ibihanangiriza ko bitemewe kandi ko uzabifatirwamo azahanwa.

Yasabye abacuruzi kwirinda kuzamura ibiciro by’ibicuruzwa byaba ibikorerwa imbere mu gihugu cyangwa ibiva hanze yacyo, kumanika ibiciro by’ibicuruzwa ku buryo bigaragarira abaguzi.

Hari kandi kwirinda gutanga inyemezabwishyu zidahwanye n’amafaranga bakiriye, kwirinda gukoresha ibipimo bitujuje ubuziranenge cyangwa gutanga ibicuruzwa byarengeje igihe no kwirinda kubangamira abagenzuzi b’ubucuruzi igihe baje babagana.

Itangazo ryashyizweho umukono na Minisitiri Soraya Hakuziyaremye rivuga ko kuva tariki ya 17 Werurwe kugeza ubu Minicom imaze guhana abacuruzi n’ibigo by’ubucuruzi 178 byo mu Mujyi wa Kigali byose hamwe byaciwe amande angana na miliyoni 15 n’ibihumbi 850 kubera kudakurikiza amabwiriza n’amategeko.

MINICOM isaba abacuruzi kubahiriza amabwiriza n’amategeko kuko ibihano byateganyijwe kandi bikarishye. Inavuga ko ubugenzuzi nk’ubwo buzakomeza.

Uretse gucibwa amande ingingo ya 27 n’iya 29 y’itegeko No 35/91 ryo ku wa 5 Kanama 1991 rigenga imitunganyirize y’ubucuruzi bw’imbere mu gihugu , yerekena ko leta ishobora gutanga ihazabu y’inyongera, isaba uwagaragayeho uko kunyuranya n’amategeko kwishyura inyungu yungutse ku muguzi no guhagarika ibikorwa by’ubucuruzi byateye ayo makosa mu gihe cy’amezi atatu.

Bamwe mu bacuruzi bahaniwe gucuruza ibyarengeje igihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .