Ababyeyi basambanya abana bibyariye basabiwe gufatwa nk’ababangamiye igihugu

Yanditswe na Habimana James
Kuya 21 Ugushyingo 2019 saa 09:26
Yasuwe :
0 0

Umunyamabanga Mukuru Wungirije wa RIB, Karihangabo Isabelle, yagaragaje ko bibabaje kuba hari ababyeyi gito basambanya abana babo mu ngo, avuga ko iki kibazo kimwe n’ibindi byo gusambanya abana bigomba gufatwa nk’ibihangayikishije igihugu.

Ibi yabigarutseho kuri uyu Gatatu ubwo mu Nteko Ishinga Amategeko y’u Rwanda, habaga Inama y’Igihugu y’abana ku nshuro ya 13, ikaba yitabiriwe n’abana bahagarariye abandi mu gihugu cyose.

Insanganyamatsiko y’iyi nama igira iti" Uruhare rw’abana mu burere buboneye".

Imibare y’uburyo ibirego byo gusambanya abana byatanzwe igaragaza ko mu 2016/17, Urwego rw’Igihugu rw’Ubugenzacyaha, RIB, rwakiriye ibirego 2091, mu 2017/18 biba 3060 naho mu 2018/19 yakira ibirego 3512.

Mu 2016 abangavu ibihumbi 17 batewe inda nk’uko imibare ya Minisiteri y’Ubuzima ibigaragaza, umwaka ushize bariyongera bagera ku bihumbi bisaga 19.

Umunyamabanga Mukuru Wungirije wa RIB, Karihangabo Isabelle, yavuze ko imibare bafite iteye agahinda, abana barimo gusambanywa mu buryo abantu badakwiye gukomeza kurebera.

Ati “Iki cyaha kirimo kugira n’ingaruka zikomeye harimo gutereranywa n’ababyeyi, kwandura indwara n’ibindi, hari abarimo gushukwa n’abashoferi, hari abahabwa amandazi ugasanga irindazi rimwe riteje ibibazo, igikomeje kubabaza kandi ni uko hari n’abana basambanywa n’ababyeyi babo mu ngo, aba ni ababeyi gito kandi batagomba kwihanganirwa na buri wese.”

Yavuze ko uretse abantu bakuru bashuka abana, hari n’abana b’abahungu batarageza imyaka 18 bakomeje gusambanya abana b’abakobwa, RIB ikaba ivuga ko 673 aribo baregwa iki cyaha muri uyu mwaka.

Yakomeje agira ati “ Bana b’abakobwa namwe ubwanyu mugomba kwirinda, mugomba kwirinda ibyo bishuko mukamenya kuvuga ‘Oya’ kandi ikaba ‘Oya’, mwabona uwo muntu atangiye gushyiramo imbaraga mugatabaza.”

Perezida w’Inteko Ishinga Amategeko y’u Rwanda, umutwe w’Abadepite, Donatille Mukabalisa, we yavuze ko buri wese akwiye kugira uruhare kuri buri kintu cyose cyabangamira uburere bw’umwana ndetse n’icyerekezo cye.

Yavuze ko nubwo hari byinshi byakozwe ngo uburenganzira bw’umwana bukomeze kubungwabungwa ariko hakiri ibibazo bikomeje kugariza uburenganzira bwe, nk’ihohoterwa rishingiye ku gitsina, gutwita kw’abangavu n’ibindi.

Yagize ati “Ababateye inda akenshi ntibamemyekana ngo bahanwe ariko aba ntibakwiye guhishirwa, nta na rimwe igihugu kizihanganira bene aba bantu, bagomba kumenyekana kandi ibyo amategeko ateganya bigomba kubahirizwa.”

Yavuze ko hakibura uburere bw’ababyeyi ariko hari n’abana bifuza ibirenze ubushobozi bw’ababyeyi babo.

Abana bahagarariye abandi nibo baba bitabiriye iyi nama
Abana basabwe kwirinda ababashukisha ikintu icyo aricyo cyose bagamije kubicira ejo hazaza
Abana bavuye mu gihugu cyose bitabiriye iyi nama aho harebwa uko ikibazo cy isambanywa ry abana cyakumirwa
Guverinoma y u Rwanda iha umwanya abakiri bato bagatanga ibitekerezo bibabereye
Perezida w Inteko Ishinga Amategeko y u Rwanda umutwe w Abadepite Donatille Mukabalisa ari kumwe n abana bitabiriye iyi nama yabo
Umunyamabanga wa Leta Ushinzwe amashuri abanza n ayisumbuye Dr Isaac Munyakazi nawe yitabiriye inama y abana
Umuyobozi w΄Intara y΄Amajyaruguru Gatabazi Jean Marie Vianney yitabiriye nawe iyi nama y abana yabaye ku nshuro ya 13
Umuyobozi wa Komisiyo y igihugu y abana Dr Claudine Uwera Kanyamanza yavuze ko nubwo hari ibyakozwe ariko abana bakibangamiwe n abakomeje kubahohotera
Abana baba bahawe imyanya mu Nteko Ishinga Amategeko bagatanga ibitekerezo by uko uburenganzira bwabo bwarindwa
Abana bafata umwanya wo guhura n abayobozi bakuru mu gihugu bagahana inama
Umunyamabanga muri Minisiteri y Urubyiruko n Umuco Bamporiki Edouard yasabye abana kujya bavuga Oya kandi bakamenya kwanga ababashuka
Umunyamabanga Mukuru Wungirije wa RIB Karihangabo Isabelle yavuze ko hari ababyeyi bafata abana babo ku ngufu
Umuhuzabikorwa wa Porogaramu y Igihugu Mbonezamikurire y abana bato Dr Anita Asiimwe na we yitabiriye iyi nama y abana aho abana b abakobwa basabwe kwirinda ibishuko
Perezida w Inteko Ishinga Amategeko y u Rwanda umutwe w Abadepite Donatille Mukabalisa ari kumwe n abana bitabiriye iyi nama yabo
Minisitiri w Urubyiruko n Umuco Rosemary Mbabazi yitabiriye inama yabaye ku nshuro ya 13
Minisitiri w Uburinganire n Iterambere ry Umuryango Solina Nyirahabimana yitabiriye iyi nama avuga ko gusambanya abana ari ikibazo kigomba guhagurukirwa
Inzego zitandukanye zirengera uburenganzira bw umwana zari zitabiriye ibi biganiro

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza