Ababyeyi barerera muri EP St Joseph bahawe umukoro wo kwita ku bana babo mu biruhuko (Amafoto)

Yanditswe na Akayezu Jean de Dieu
Kuya 9 Ugushyingo 2019 saa 07:55
Yasuwe :
0 0

Ababyeyi bafite abana biga n’abasoje amashuri abanza mu Ishuri ryitiriwe Mutagatifu Yozefu riherereye mu Mujyi wa Kigali, basabwe kubafasha mu gihe cy’ibiruhuko babatoza uburere n’imirimo yo mu rugo kugira ngo babarinde gutwarwa n’ibishuko.

Byagarutsweho kuri uyu wa Gatandatu, tariki 9 Ugushyingo 2019, mu birori bisoza amashuri y’incuke n’abanza, hagarukwa ku bumenyi buvanze n’indangagaciro z’umuco Nyarwanda bahavoma.

Ni ibirori bidasanzwe byabereye mu Murenge wa Niboye mu Karere ka Kicukiro aho iri shuri riherereye, byitabirwa n’ababyeyi, abafatanyabikorwa n’abarezi, abakozi, abatangiye iri shuri n’abayobozi baryo.

Umwaka w’amashuri ushize iri shuri ribanza rya St Joseph ryari rifite abanyeshuri 923 barimo 97 basoje amashuri abanza banakoze ibizamini bya leta na 122 barangije icyiciro cy’amashuri y’incuke bagiye mu mwaka wa mbere w’abanza.

Muri iri shuri abanyeshuri biga kuva mu ry’incuke kugeza mu wa kabiri w’amashuri abanza biga mu rurimi rw’Igifaransa mu gihe abandi kuva mu wa Gatatu kugeza mu wa Gatandatu biga mu Cyongereza.

Abanyeshuri basoje amasomo batsinze ku kigero cyo hejuru, ibintu ubuyobozi buvuga ko ari umuco w’iri shuri.

Muri rusange abana bo mu mwaka wa mbere bari 120, abimutse bajya mu wa kabiri 113, ni ukuvuga ko batsinze ku kigero cya 92.4%.

Ubutumwa bwatanzwe n’abana babinyujije mu mikino, ubwatanzwe n’ubuyobozi bw’ikigo n’abandi bashyitsi bagarutse ku kuba muri iki gihe ababyeyi bamwe bahugijwe n’ikoranabuhanga rituma batabonera umwanya abana babo.

Umwana wavuze umuvugo wagarutse ku byiza n’ibibi by’ikoranabuhanga yavuze ko muri iki gihe abana bataha bagera mu rugo bagasanga ababyeyi babo cyangwa abashinzwe kubitaho bibereye muri telefoni bari kuri za WhatsApp cyangwa mudasobwa bityo “Abana bakabura ababyeyi bo kubitaho.”

Umuyobozi w’iri shuri, Nzabamwita Vianney, yasabye ababyeyi kutazatwarwa n’ikoranabuhanga ngo bibagirwe inshingano zabo zo gufasha abana kuruhuka no kubatoza imirimo yo mu rugo.

Yagize ati “Icyo tubasaba ni ugufasha abana kuruhuka, bakabigisha imirimo yo mu rugo kandi ntibatume bahora muri za televiziyo kuko akenshi zituma bataruhuka neza. Turagira ngo bazongere kubatuzanira bameze neza bararuhutse koko.”

Ibivugwa n’umuyobozi w’ishuri byashimangiwe kandi n’ababyeyi bavuze ko uburere bw’umwana butarangirira ku ishuri gusa ahubwo mu rugo by’umwihariko mu kiruhuko aribwo ababyeyi baba bakwiye kwerekana uruhare rwabo mu burere bw’abana babo.

Mushimiyimana Marie Jose uhagarariye ababyeyi yasabye bagenzi be kwita ku burere bw’abana babo by’umwihariko muri ibi bihe by’ibiruhuko.

Ishuri ryitiriwe Mutagatifu Yozefu ryatangiye muri Nzeri 1997, rifite abanyeshuri batagera kuri 250, mu mwaka w’amashuri ushize ryari rifite abanyeshuri barenga 1000.

Abana bato baririmbiye abitabiriye ibirori baranyurwa
Niyongabo Jacques wahoze ari umukozi w'Akarere ka Kicukiro ushinzwe ibikorwa rusange na we ni umwe mu barerera muri iki kigo
Ubwo baririmbaga indirimbo yubahiriza igihugu "Rwanda Nziza''
Abana bo mu ishuri ry'incuke rya St Joseph bari bafite akanyamuneza
Abanyeshuri bakoze imyiyereko imbere y'ababyeyi babo
Abarimu na bo bashimiye umusaza wabaye umuzamu kuva iki kigo cyatangira
Aha bari bazaniye Umwami n'Umwamikazi igisabo kugira ngo aheshe umugisha umusaruro w'ibikomoka ku bworozi
Babyinnye imbyino gakondo batorejwe muri EP St Joseph
Babyinnye imbyino zitandukanye
Bakoze imyiyereko ikorwa n'abasirikare aho baba batozwa kudasobanya
Aba bana bavuze umuvugo ku ikoranabuhanga wari ubumbatiye ubutumwa bukangurira ababyeyi kwita ku bana babo
Umuyobozi w’Inama y’Ubutegetsi mu Ishuri ribanza rya St Joseph, Nyirimana Joseph, yasabye ababyeyi kwita ku bana mu biruhuko
Umuyobozi w’ishuri, Nzabamwita Vianney, yahaye umukoro ababyeyi barerera muri EP St Joseph wo guha umwihariko uburere bw'abana babo
Umuyobozi w'Inama y'Ababyeyi barerera muri EP St Joseph, Mushimiyimana Marie Jose, yasabye bagenzi be kwita ku bana babo
Umuco gakondo ni imwe mu nkingi zigize ishuri rya St Joseph
Umunyamabanga wa Leta muri Minisiteri y’Imari n’Igenamigambi ushinzwe Igenamigambi, Dr Uwera Claudine, na we yari yitabiriye ibi birori
Umuyobozi w’Inama y’Ubutegetsi bw’iri shuri, Nyirimana Joseph, yashimiye umusaza wakoraga akazi k'izamu kuri iri shuri kuva ryatangira
Uyu mwana yagaragaje ubuhanga mu gucuranga inanga ya kizungu izwi nka Piano
Uyu musaza wari umuzamu yashimiwe n'abanyeshuri uburyo yabanye nabo neza
Byari ibyishimo ku babyeyi bafite abana babaye indashyikirwa
Ibikoresho gakondo bigaragaza umuco Nyarwanda byifashishwa mu kwigisha abana kuri EP St Joseph
Abana bahize abandi mu gutsinda no kurangwa n'imyitwarire bashimiwe mu ruhame
Abana basoje mu mashuri y'incuke bahawe impamyabushobozi
Bari bafite akanyamuneza ku maso

Amafoto: Niyonzima Moses


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza