2018: Umwaka w’impinduka mu burezi n’ituze kuri za kaminuza

Yanditswe na Ferdinand Maniraguha
Kuya 29 Ukuboza 2018 saa 10:14
Yasuwe :
0 0

Mu gihe umwaka wa 2018 ugeze ku musozo, hari byinshi byawukozwemo mu rwego rw’uburezi, rumwe mu zifatwa nk’inkingi ya mwamba y’iterambere rya buri gihugu.

Umwaka wa 2018 wabaye uw’amahoro muri za kaminuza mu Rwanda kuko noneho nta yafunzwe cyangwa ngo ihagarikwe. Mu 2017 Minisiteri y’Uburezi yahagaritse amashami atandukanye yigishwaga muri kaminuza n’amashuri makuru 10.

Muri uyu mwaka kandi nibwo muri Minisiteri y’Uburezi hakuweho umwanya w’Umunyamabanga wa Leta ushinzwe Amashuri y’Imyuga n’Ubumenyingiro. Umuyobozi uwuherukamo ni Rwamukwaya Olivier.

IGIHE yegeranyije iby’ingenzi byaranze umwaka wa 2018 mu burezi.

Impinduka ku ngengabihe y’amashuri

Nubwo bishobora kuzashyirwa mu bikorwa mu 2020, ni umwanzuro wafashwe uyu mwaka nyuma y’igihe abenshi basaba ko umwaka w’amashuri abanza n’ayisumbuye wakongera ukajya utangira muri Nzeri, nk’uko byahoze mbere ya 2005.

Ijwi risaba izo mpinduka ryahereye muri Kiliziya Gatolika, igaragaza ko bibangamira abanyeshuri kwiga ku zuba ry’impeshyi, bikanabangamira imibereho yabo cyane cyane ku mashuri adafite amazi ahagije.

Umuyobozi Mukuru w’Ikigo cy’Igihugu gishinzwe Uburezi, REB, Dr Ndayambaje Irénée, muri Nyakanga yabwiye IGIHE ati “Hari kunozwa uburyo bizagenda bishyirwa mu bikorwa hagabanywa ibiruhuko.”

Buruse n’amafaranga y’ishuri muri UR byarongerewe

Gashyantare ya 2018 yabaye ukwezi kwiza ku banyeshuri ba Kaminuza bari bamaze imyaka n’imyaka bafata buruse ya 25 000Frw. Ni amafaranga abenshi bafataga nk’intica ntikize kuko abanyeshuri basabwaga kuyavanamo ibyo bakeneye byose.

Ubwo yari imbere ya Komisiyo y’abadepite ishinzwe uburezi, urubyiruko n’ikoranabuhanga, Minisitiri w’uburezi Dr Mutimura Eugène, yavuze ko hongeweho 15 000Frw, bigatangirana n’umwaka w’amashuri wa 2018/2019.

Aba mbere bamaze kuyabona nubwo hari aho byasabye ingufu za Perezida.

Impinduka mu bya buruse zazanye n’iyongerwa ry’amafaranga y’ishuri muri Kaminuza y’u Rwanda, aho mu bijyanye na Siyansi, yavuye ku bihumbi 900Frw agera kuri miliyoni ebyiri naho mu masomo rusange agirwa ibihumbi 800Frw avuye ku bihumbi 600Frw.

Byakozwe bigamije kuziba icyuho cy’ubuke bw’ingengo y’imari ya Kaminuza. Guverinoma yatangaje ko ku mwaka wa mbere ingengo y’imari ya Kaminuza izava kuri miliyari 25.2 Frw igere kuri miliyari 36Frw, undi mwaka ibe miliyari 48 Frw.

Ikizamini cy’Icyongereza ku barimu

Umwiherero w’Abayobozi bakuru b’Igihugu wabaye kuva ku wa 26 Gashyantare kugeza ku itariki ya 1 Werurwe 2018, wemeje ko Icyongereza kigomba kugirwa isomo ryigishwa mu mashuri yose.

Minisiteri y’Uburezi yahise itangaza ko iri kunoza gahunda y’ikizamini cy’Icyongereza kizajya gihabwa abarimu, hagasuzumwa ubushobozi bafite muri urwo rurimi. Bitewe n’amanota babonye, abarimu bazashyirirwaho porogaramu zo kubafasha kuzamura ubumenyi mu gihe runaka, uwo bigaragaye ko nta cyiyongera afatirwe ibyemezo.

Ikizamini cy’Icyongereza kizajya kinahabwa abanyeshuri bagiye kwinjira mu cyiciro runaka haba mu mashuri yisumbuye na Kaminuza.

Impungenge zahise ziba nyinshi ku barimu cyane cyane abatiyizeye mu Cyongereza, dore ko urwo rurimi rumaze imyaka 10 rutangiye kwigishwamo amasomo yose mu mashuri, kuko rwasimbuye Igifaransa ani nacyo benshi mu barezi bizemo.

Amashami ya Kaminuza y’u Rwanda yasubijwe i Huye

Imyaka yari ibaye hafi ine umujyi wa Huye warasubiye inyuma, abawucururizamo bamwe barakinze, abasigaye babara ubukeye.

Inyubako za Kaminuza y’u Rwanda i Huye, inyinshi zari zambaye ubusa nyuma y’uko hagabanyijwe abanyeshuri bakava ku bihumbi icumi bagasigara ku bihumbi bitanu. Muri icyo gihe ariko i Gikondo ku cyicaro gikuru, abanyeshuri bigaga babyigana.

Mu Ugushyingo uyu mwaka abanyeshuri bagabanyijwe i Gikondo basubizwa i Huye muri gahunda yo guteza imbere uwo mujyi, umwanzuro washimwe n’abatuye i Huye ndetse n’abahize bafata uwo mujyi nk’igicumbi cy’ubumenyi.

Impamyabumenyi zitinda n’ibitabo byirukanishije abayobozi muri REB

Inama y’Abaminisitiri yateranye yo kuwa Gatatu tariki 11 Mata 2018, yahagaritse ku kazi icyarimwe abayobozi bakuru batanu mu Kigo gishinzwe Guteza imbere Uburezi mu Rwanda (REB), barimo Dr. Musabe Joyce wari ukuriye Ishami ry’Integanyanyigisho n’Imfashanyigisho na Dr. Tusiime Rwibasira Michael wari ukuriye ishami rishinzwe Ibizamini n’Isuzumabumenyi.

Bukeye bwaho, Minisitiri w’uburezi Dr Mutimura Eugène yatangaje ko abo bayobozi bazize gutinza diplôme z’abarangije amashuri yisumbuye no kujya kuzikoresha hanze kandi haremejwe ko zigomba kujya zikorerwa mu gihugu.

Abo bayobozi bazize kandi ibitabo bya porogaramu y’integanyanyigisho ishingiye ku bushobozi byoherezwaga ku mashuri bikaza kugaragara mu nzu z’abaturage, mu biro by’abayobozi n’ahandi, aho kubijyana ku mashuri.

Igenzura ryahishuye byinshi bibera mu mashuri

Mu Ukwakira 2018 Minisiteri y’Uburezi yatangaje ko hari amashuri agomba gufatirwa ibihano kimwe n’abarimu cyangwa abayobozi bayo, nyuma y’ibibazo bikomeye byagaragajwe bibangamiye ireme ry’uburezi kandi bidashobora kwihanganirwa.

Ni umusaruro w’ubukangurambaga bwakozwe hagamijwe gushishikariza abo bireba kwita ku cyateza imbere ireme ry’uburezi. Bwakozwe mu mezi ya Gashyantare, Gicurasi na Nzeri.

Mu cyiciro cya III cyakozwe hagati ya tariki 10-21 Nzeri 2018, mu mashuri 899 yagenzuwe mu gihugu, havuyemo ko abarimu 118 basabirwa ibihano, amashuri 108 akabuzwa gutangira umwaka utaha nadakosora ibyanenzwe.

Mu byatahuwe harimo ko amashuri amwe acumbikira abanyeshuri nta byangombwa nkenerwa afite, ubwiherero budahagije cyangwa ubw’abahungu budatandukanye n’ubw’abakobwa, nta mazi meza, umutekano w’abanyeshuri udacungwa, amashuri afite amadeni akabije, amashuri yigisha porogaramu zitazwi, amashuri akoreshwa mu gukusanya imisanzu y’amadini n’ibindi.

Hari n’andi mashuri cyane cyane ay’imyuga, yagiye anengwa ko adafite abarimu bujuje ibisabwa.

Abanyeshuri bongeye kuba urujya n'uruza muri Kaminuza y'u Rwanda i Huye
Umujyi wa Huye wari warakonje, inzu zimwe zarafunzwe, ariko ubu abanyeshuri benshi basubijweyo ndetse izi nzu zirafungurwa, ubu zirimo kuvugururwa
Mu marembo yinjira muri Kaminuza y'u Rwanda i Huye
I Huye muri Kaminuza hongeye kugira abanyeshuri benshi
Iki gice nicyo gikoreramo ubuyobozi bwa Kaminuza i Huye
Minisitiri w'Uburezi Dr Mutimura Eugene yatangaje ko buruse, amafaranga y'ishuri n'ingengo y'imari bya Kaminuza y'u Rwanda byongerewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza