00:00:00 IGIHE NETWORK KN KINYARWANDA EN ENGLISH FR FRANCAIS

​Cabo Delgado: Ingabo za Afurika y’Epfo ziri mu mazi abira kubera gutwika imirambo

Yanditswe na IGIHE
Kuya 13 Mutarama 2023 saa 12:45
Yasuwe :

Ingabo za SADC ziri mu butumwa bwo kurwanya ibyihebe muri Mozambique mu Ntara ya Cabo Delgado, zimerewe nabi n’abantu bazinenga nyuma y’amashusho yashyizwe hanze bari gutwika imirambo.

Amashusho yakwirakwiriye ku mbuga nkoranyambaga, afite amasegonda 20, agaragaza abasirikare babiri ba Afurika y’Epfo, bari gutwika ibintu bimeze nk’imyanda [intebe, imyenda ishaje, ameza n’ibindi] hejuru yabyo hariho imirambo y’abantu.

Bikekwa ko abo basirikare babiri bari hafi aho ari abo mu mutwe udasanzwe w’Ingabo za Afurika y’Epfo zoherejwe kurwanya ibyihebe kuko bari bambaye impuzankano ziriho amabendera y’icyo gihugu.

Umusirikare umwe agaragara afite imbunda mu kuboko kwe kw’ibumoso hanyuma iburyo afite telefoni ye ari gufata amashusho y’icyo gikorwa cyo gutwika imirambo.

Iyo ayo mashusho ari kugana ku musozo, umusirikare utaramenyekanye agaragaramo ari gufata amashusho mbere y’uko bongera indi myanda hejuru y’imirambo.

Umuvugizi w’Ingabo za Afurika y’Epfo yatangaje ko ayo mashusho yafashwe mu Ugushyingo umwaka ushize muri Mozambique aho izo ngabo ziri mu butumwa bwa SAMIM.

Yavuze kandi ko nta perereza ryakozwe kuri abo basirikare kuko ngo batari mu nshingano ze aho bari muri Mozambique.

Perezida wa Namibia, Dr Hage G. Geingob, unakuriye Umuryango w’Iterambere ry’Ibihugu byo muri Afurika y’Amajyepfo, SADC, yavuze ko Ubuyobozi bwa SAMIM bwatangiye iperereza kuri aya mashusho kandi ko ibizarivamo bizatangazwa ubwo rizaba rirangiye.

Ubutumwa Ingabo za SADC zirimo muri Mozambique, zibufatanyije n’Inzego z’Umutekano z’u Rwanda nubwo badakorera mu bice bimwe.

Ingabo z’u Rwanda zahawe ibice bya Palma, Mocimboa da Praia, Quionga, Afungi, Mbau, Pundanhar n’ahandi. Iza SADC zo zahawe ibice bya Nandage, Mwidumbe, Macomia, Meluco, Mueda n’ahandi.

Urebeye ku ikarita, bisa n’aho Ingabo z’u Rwanda zahawe igice cy’Amajyaruguru hanyuma Amajyepfo y’Intara ashyira Uburengerazuba asigara mu maboko y’ibihugu bya SADC.

Ibihugu bitandatu byo muri SADC ni byo bifite Ingabo muri Mozambique. Afurika y’Epfo ifite benshi ni 340. Bari mu mutwe udasanzwe mu ngabo ndetse ni bo bagenzura umutekano mu Karere ka Macomia.

Botswana ifite abasirikare 297 bari mu Karere ka Muidumbe mu gihe Tanzania ifite 257 bari mu Karere ka Nangade. Lesotho ifite abasirikare 120 bari mu Karere ka Nangade mu gihe Malawi ifite umwe ubarizwa mu Mujyi wa Pemba. Angola ifite abasirikare batandatu nabo bari i Pemba. Ibyo bihugu bibiri bya nyuma, abasirikare babyo ni abakora mu nzego z’ubuyobozi, ntibajya ku rugamba.

Amashusho yagiye hanze agaragaza Ingabo za Afurika y'Epfo ziri gutwika imirambo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .