Perezida Kagame yitabiriye inama muri Qatar izaganira ku bibazo byugarije Isi

Yanditswe na Evariste Nsengimana
Kuya 13 Ukuboza 2019 saa 08:22
Yasuwe :
0 0

Perezida wa Repubulika y’u Rwanda, Paul Kagame yageze i Doha muri Qatar, kwifatanya n’Umuyobozi w’Ikirenga w’icyo gihugu (Emir) Sheikh Tamim bin Hamad al Thani, abakuru b’ibihugu n’abandi banyacyubahiro mu nama yiga ku ngingo zitandukanye zigamije gushakira ibisubizo ibibazo bibangamiye Isi.

Iyi nama izwi nka Doha Forum iteganyijwe ku wa 14-15 Ukuboza 2019, yatangijwe mu 2000, ikaba ari urubuga ruhuriza hamwe abayobozi, impuguke, abahagarariye inzego zifata ibyemezo bagamije kongera gushyiraho imiyoborere isubiza ibibazo bihari.

Iy’uyu mwaka yahawe insanganyamatsiko igaruka ku ‘Kongera gutekereza ku miyoborere mu nguni zose z’Isi’ no kureba amahirwe ibihugu byakura mu kuva mu miyoborere y’igice kimwe bijya ku ikora mu nguni zose.

Inama y’uyu mwaka izasuzumirwamo ingingo zitandukanye zirimo guteza imbere ikoranabuhanga, ubucuruzi n’ishoramari, kongerera ubushobozi abakozi no kugabanya ubusumbane. Hari kandi gusigasira umutekano, ikoranabuhanga n’imiyoborere, guteza imbere imiryango mpuzamahanga, sosiyete sivile, umuco n’umwihariko wa buri gihugu.

Biteganyijwe ko Perezida Kagame azitabira umuhango wo gufungura iyi nama n’ikiganiro azahuriramo n’umunyamakuru Ghida Fakhry, wamamaye ku bitangazamakuru mpuzamaghanga birimo Al Jazeera yo muri Qatar, TRT World yo muri Turikiya na HuffPost cy’abanyamerika.

Muri iki kiganiro biteganyijwe ko Perezida Kagame azagaruka ku rugendo rw’u Rwanda mu nzira y’iterambere.

Umuyobozi w’Ikirenga wa Qatar (Emir) Sheikh Tamim bin Hamad al Thani yaherukaga guhura na Perezida Kagame ku wa mbere ushize, mu muhango wo gutanga ibihembo byamwitiriwe ‘Sheikh Tamim Bin Hamad Al Thani International Anti-Corruption Excellence Award’ bihabwa abantu babaye indashyikirwa ku Isi mu kurwanya ruswa no kwimakaza ugukorera mu mucyo.

Umubano w’u Rwanda na Qatar umaze iminsi uhagaze neza aho bigaragazwa no kuba abakuru b’ibyo bihugu bakunze kwitabira inama zabereye muri kimwe muri ibyo bihugu.

Nko mu Ukwakira uyu mwaka, Perezida Kagame yagiye muri Qatar yitabiriye inama ku ikoranabuhanga mu mijyi naho mugenzi wa Qatar, Sheikh Tamim bin Hamad al Thani, yavuye mu Rwanda ku wa mbere w’iki cyumweru mu muhango wo gutanga ibihembo byamwitiriwe.

Uretse gusurana bitabiriye inama mpuzamahanga kandi abakuru b’ibihugu byombi bakunze gusurana mu ruzinduko rw’akazi, bakaganira ku ngingo zitandukanye zigamije kunoza imibanire hagati yabyo ndetse hagasinywa n’amasezerano atandukanye y’ubufatanye.

Ubwo Emir Al Thani aheruka kugirira uruzinduko mu Rwanda rwamaze iminsi itatu uhereye ku wa 21 Mata 2019, hasinywe amasezerano y’ubufatanye mu ngeri enye zirimo imikoranire mu rwego rw’umuco, muri siporo, mu bukerarugendo n’ibikorwa by’ubucuruzi ndetse n’ingendo zo mu kirere.

Muri uku kwezi, Guverinoma y’u Rwanda na Qatar Airways, basinye amasezerano y’ubufatanye mu ishoramari mu kibuga cy’Indege cya Bugesera, aho ubwo bufatanye bugizwe n’amasezerano atatu, ni ukuvuga yo kubaka, kugira no kubyaza umusaruro iki kibuga kizaba gifite imiterere igezweho. Muri aya masezerano, “Qatar Airways yemeye gufata 60% muri uyu mushinga, wose hamwe ufite agaciro ka miliyari $1.3.”

Umwaka ushize nabwo Perezida Kagame yagiriye uruzinduko muri Qatar nabwo hasinywa amasezerano arimo amasezerano mu bijyanye n’indege, amasezerano ku guteza imbere no kurengera ishoramari n’amasezerano y’ubufatanye ku butwererane mu bijyanye n’ubukungu, ubucuruzi na tekiniki.

Muri Gicurasi 2017 u Rwanda na Qatar byashyize umukono ku masezerano yo gushyiraho imikoranire mu bya dipolomasi. Indege za Qatar Airways kandi zikora ingendo zihuza Doha na Kigali n’ibindi byerekezo birimo na Dubai.

Muri Gicurasi 2015 kandi ibihugu byombi byasinye amasezerano y’ubufatanye mu birebana no kurwanya ibiyobyabwenge.

Perezida Kagame yitabiriye inama izaganira ku bibazo byugarije Isi izabera muri Qatar
Perezida Kagame yakiriwe n'abayobozi bo muri Qatar

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza