Gisagara: Ingo zirenga ibihumbi 35 zigiye guhabwa amashanyarazi urugo ku rundi

Yanditswe na Prudence Kwizera
Kuya 4 Kamena 2020 saa 03:41
Yasuwe :
0 0

Hagamijwe gufasha abaturage kugera ku iterambere rirambye, mu Karere ka Gisagara ingo 52 532 zimaze guhabwa amashanyarazi arimo akomoka ku miyoboro migari n’aturuka ku mirasire y’izuba.

Ni umuhigo ubuyobozi bw’ako Karere bwihaye ko umwaka wa 2024 uzarangira buri rugo rwaramaze guhabwa amashanyarazi.

Umuyobozi w’Akarere ka Gisagara, Rutaburingoga Jérome, yabwiye IGIHE ko ingo zisigaye zose zigera ku 35 669 zizaba zamaze guhabwa amashanyarazi urugo ku rundi mu 2024.

Yavuze ko hamaze guterwa intambwe nini mu kugeza amashanyarazi ku baturage kuko bava kure ugereranyije no mu myaka mike ishize.

Ati “Mu mwaka wa 1994 twari kuri 0%; muri 2010 twari dufite ingo 1107 gusa zifite amashanyarazi zingana na 3%; tugera mu mwaka wa 2016 tugeze kuri 15%, none ubu tugeze ku ngo 52 532 zingana na 60%. Intego twihaye ni uko mu mwaka wa 2024 tuzaba tugeze ku kigero cya 100% buri rugo rufite amashanyarazi.”

Kugeza ubu Karere ka Gisagara gafite ingo 88 201 ziri mu mirenge 13 ikagize n’utugari 59 naho imidugudu ikaba 514.

Ingo zimaze guhabwa amashanyarazi akomoka ku miyoboro migari (On-grid) ni 41318 zingana na 47% naho izahawe akomoka ku mirasire y’izuba (Off-grid) ni ingo 11214 zingana na 13%.

Kugeza ubu utugari hafi ya twose tugerwamo n’amashanyarazi akomoka ku miyoboro migari kuko hasigaye utugari tubiri twa Kiri na Munini two mu Murenge wa Kansi.

Rutaburingoga avuga ko natwo biyemeje ko bazaduha amashanyarazi bitarenze uyu mwaka wa 2020.

Ku bijyane n’amatara yo ku mihanda (public right) bihaye intego ko uyu mwaka wa 2020 uzasozwa hamaze gushyirwa amatara ku mihanda ya Musha; Nyaruteje; Mamba; na Kibirizi aho buri umwe uzahabwa amatara ari ku ntera ya kilometero 1.5

Ayo yiyongera ku matara ari ku muhanda wa kaburimbo Huye-Gisagara ku ntera ya kilometero icyenda n’andi ari mu muhanda Save-Rwanza wa kilometero esheshatu ndetse n’acaniye Umudugudu w’icyitegererezo wa Nyanza kuri kilometero 1.5.

Bamwe mu baturage bo mu Karere ka Gisagara bavuga ko guhabwa amashanyarazi ari iterambere kuri bo kuko bibafasha kwihangira imirimo irimo inzu z’ubwogoshero (salon de coiffure), n’iyindi.

Kuri ubu mu Karere ka Gisagara hagiye kuzura uruganda rwa nyiramugengeri rwitezweho gutanga megawati 80 bikongera 40% by’amashanyarazi asanzwe akoreshwa mu gihugu hose. Ruzatwara agera kuri miliyari 289 Frw.

Amwe mu matara yo ku muhanda wa kaburimbo Huye-Gisagara
Bamwe bahawe amashanyarazi akomoka ku mirasire y'izuba
Bihaye intego ko mu 2024 ingo zose zizaba zaramaze guhabwa amashanyarazi
Mu Karere ka Gisagara ingo 52 532 zingana na 60% zimaze guhabwa amashanyarazi.
Hagamijwe gufasha abaturage kugera ku iterambere rirambye, mu Karere ka Gisagara ingo 52532 zimaze guhabwa amashanyarazi
Mu Karere ka Gisagara ingo zimaze guhabwa amashanyarazi akomoka ku miyoboro migari (On-grid) ni 41318 zingana na 47%

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .