Airtel igiye gufasha abagenzi n’abamotari bo muri Kigali kwishyurana mu buryo bw’ikoranabuhanga

Yanditswe na Habimana James
Kuya 28 Gicurasi 2020 saa 02:35
Yasuwe :
0 0

Sosiyete y’Itumanaho ya Airtel yatangaje ko igiye guha amajile mashya abamotari bakorera mu Mujyi wa Kigali no kubafasha kwishyurwa n’abagenzi hakoreshejwe ikoranabuhanga kuri Airtel Money nk’uburyo bwo kwirinda icyorezo cya Coronavirus.

Inama y’Abaminisitiri yateranye ku wa 18 Gicurasi 2020, yemeje ko ingendo zihuza Intara n’Umujyi wa Kigali zizongera gusubukurwa ku wa 1 Kamena ndetse ko ari na wo munsi moto zitwara abantu zizemererwa kongera gukora.

Ubu imyiteguro irarimbanyije mu gihe habura iminsi ine gusa ngo moto zongere gutwara abagenzi.

Abamotari batangiye gutegurwa mu buryo bazahagarara neza muri metero imwe, gukaraba ndetse no kugendana umuti wo gukaraba ‘alcohol’.

Banashishikarijwe kandi gukoresha ikoranabuhanga mu kwishyurana ndetse hari uburyo bwo gushyira mubazi kuri moto buzorohereza umugenzi kubona amafaranga agomba kwishyura hatabayeho guciririkanya.

Urwego Ngenzuramikorere (RURA) kuri uyu wa 27 Gicurasi 2020 rwatangaje amabwiriza akubiye mu ngingo zirindwi, abamotari bagomba gukurikiza nibasubira mu muhanda mu kwirinda ikwirakwira rya Coronavirus.

Amwe muri ayo mabwiriza ni uko abamotari bose bo mu Mujyi wa Kigali bagomba gukoresha ikoranabuhanga rya mubazi ndetse bakishyurwa hakoreshejwe ikoranabuhanga nka Airtel Money cyangwa MTN Mobile Money.

RURA yavuze ko abamotari bo mu Ntara bazatangira gukoresha mubazi nyuma ariko na bo bagomba kwishyurwa hakoreshejwe ikoranabuhanga nka Airtel Money cyangwa MTN Mobile Money.

Airtel Rwanda ivuga ko ubu yashyizeho ingamba zifasha abamotari kwishyurwa kuri telefoni uhereye tariki ya 1 Kamena 2020, ubwo moto zizaba zongeye kwemererwa gukora mu Mujyi wa Kigali.

Ivuga ko abagenzi bazabasha kwishyura mu buryo bworoshye bakoresheje telefoni zabo, bakanze *544#.

Airtel Rwanda ivuga ko muri ibi bihe bitoroshye bya Coronavirus, kwishyura hakoreshejwe ikoranabuhanga byatumye ubukungu budahungabana kandi binagabanya ibyago byo kwanduzanya.

Iki gisubizo mu myishyurire kizabafasha kwishyura imisanzu mu mashyirahamwe yabo bahuriramo, banagabanyirizwe mu gihe baguze lisansi kuri sitasiyo za Mount Meru.

Umuyobozi Mukuru wa Airtel Rwanda, Amit Chawla, yagize ati “Muri iki gihe abantu basubira mu kazi, twishimiye guha abamotari ijile za Airtel zituma basa neza, bagakomeza kwirinda kandi banafite umutekano, uretse n’ibyo kandi byaragaragaye ko kwishyurira kuri telefoni ari uburyo bwizewe bufasha abantu kwirinda kuba bakwandura virusi bitewe no gukora ku bintu bitandukanye cyangwa amafaranga.”

Airtel Rwanda ivuga ko yinjiye mu bufatanye n’ibigo bicuruza ibikomoka kuri petelori harimo Mt Meru Ltd, aho abamotari bagabanyirizwa ibiciro kuri serivisi z’ingenzi nka lisansi n’amavuta ya moto, mu gihe bishyuye kuri Airtel Money birinda guhererekanya amafaranga mu ntoki.

Umuyobozi w’ishyirahamwe ry’abamotari, FERWACOTAM, Ngarambe Daniel, yagize ati“Turashimira Airtel kuba yihutishije ubu bufatanye tunahamya ko bwaje mu gihe gikwiye kuko icyo dushyize imbere cyane ari isuku n’umutekano w’abamotari. Uburyo bw’imyishyurire buvuguruye bwa Airtel buzatuma abanyamuryango bacu bagenda barushaho kumenya ibyiza byo kwishyura hakoreshejwe ikoranabuhanga.”

Airtel Rwanda ivuga ko mu kwishyura urugendo, abakiliya bazajya bakanda *544# bagakurikiza amabwiriza.

Kwishyura kuri moto bizajya bikorwa mu buryo bw'ikoranabuhanga aho guhererekanya amafaranga nkuko byari bisanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .