Zimbabwe yahagaritse ikoreshwa ry’ibyuma bishyushya amazi kubera ubuke bw’amashanyarazi

Yanditswe na Iradukunda Serge
Kuya 13 Ugushyingo 2019 saa 05:00
Yasuwe :
0 0

Nyuma y’uko Zimbabwe imaze iminsi ifite ikibazo cy’umuriro w’amashanyarazi udahagije, ubu leta yasohoye amabwiriza abuza abantu kongera gukoresha ibyuma bishyushya amazi kubera ko bitwara umuriro mwinshi.

Hagamijwe kurondereza no gusaranganya umuriro, kuri uyu wa Gatatu leta yashyize hanze amabwiriza agenga imikoreshereze y’ingufu, harimo n’iryo guhagarika ikoreshwa ry’ibi byuma.

Imwe mu ngingo z’aya mabwiriza igira iti “Nyuma y’aya mabwiriza nta muntu wemerewe gucomeka ibyuma bishyushya amazi hifashishijwe amashanyarazi, gusa igihe nyiri nzu yemeye kwishyura icyo bisaba yakoresha uburyo bwifashisha ingufu zikomoka ku zuba”.

Ibi bije nyuma y’uko Zimbabwe imaze iminsi ifite ikibazo cy’umuriro udahagije kubera igabanuka ry’ingano y’amazi mu ngomero z’amashanyarazi, kuri ubu ukaba ushobora kugenda ukamara amasaha 18 utaragaruka ibintu byagize ingaruka ku nganda, ubucukuzi bw’amabuye ndetse no mu ngo bwite z’abaturage b’iki gihugu.

Leta ya Zimbabwe ivuga ko ibi byuma ku munsi bitwara umuriro ungana na MW 400 kandi ubu ubasha kuboneka ku munsi ungana na MW 563 mu gihe hakenewe MW 1 200 ku munsi kugira ngo iki kibazo gikemuke.

Nubwo Zimbabwe igira abaturage bayo inama yo gukoresha ibyuma bikoresha imirasire y’izuba mu gushyushya amazi, bo bavuga ko uburyo bwo kubibona bugihenze kubera ibihe by’ubukungu bujegajega iki gihugu kitarabasha kwikuramo.

Mu 2015, leta ya Zimbabwe yatangaje ko mu gihugu hose habarirwa ibyuma 300 000 bishyushya amazi hakoreshejwe amashanyarazi ndetse ko 40% by’amafaranga y’ifatabuguzi abaturage bishyura aba yagiye kuri ibi byuma.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza