Zimbabwe igiye gutangira gukwirakwiza inoti nshya mu baturage

Yanditswe na Ndayikunda Josué
Kuya 11 Ugushyingo 2019 saa 02:47
Yasuwe :
0 0

Guhera kuri uyu wa Mbere Banki nkuru ya Zimabwe iratangira gutanga inoti zayo nshya mu baturage, ibyo yizera ko bizakemura ikibazo cy’amafaranga make mu gihugu.

Iki cyemezo kije gikurikira umwanzuro Banki nkuru ya Zimbabwe yafashe muri Kamena cyo guhagarika ikoreshwa ry’amadorali ya Amerika, dore ko kuva mu 2009 ariyo yakoreshwaga mu gihugu nyuma yuko ifaranga rya Zimbabwe ritaye agaciro.

Guverinoma ya Zimbabwe ivuga ko izi noti nshya zizafasha mu guhangana n’ikibazo cy’ibura ry’amafaranga mu gihugu, cyanatumaga abaturage batabasha kubikuza amafaranga bizigamye.

BBC ivuga ko hari impungenge z’uko iri kwirakwizwa ry’inoti nshya rishobora gutuma habaho ikibazo cyo guta agaciro k’ifaranga rya Zimbabwe, bigakomeza gushyira habi ubukungu bw’iki gihugu busazwe budahagaze neza.

Kuva hafatwa umwanzuro wo gukoresha ifaranga rya Zimbabwe, guta agaciro karyo byikubye inshuro eshatu nk’aho umugati waguraga idorali rimwe ubu ugeze ku madorali 15 ya Zimbabwe.

Guverinoma ya Zimbabwe ntigitangaza uko ifaranga ryayo rihagaze, gusa bivugwako guta agaciro k’ifaranga bigeze kuri 300%.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza