Vuvuzela, amafirimbi n’urusaku rw’amasasu ni byo byaranze ijoro ry’impera za 2020 i Bangui

Yanditswe na Philbert Girinema
Kuya 1 Mutarama 2021 saa 05:58
Yasuwe :
0 0

Mu Mujyi wa Bangui, abantu bari uruvunganzoka guhera saa Yine z’ijoro basakuza, babyina, abandi bavuza ibirumbeti n’amafirimbi mu kwishimira impera z’umwaka wa 2020 no kwinjira mu mushya wa 2021. Gusa saa Sita z’ijoro, hatangiye kumvikana amasasu mu kirere, yaraswaga avanzwe n’ibishashi byo kwishimira umwaka mushya.

Mu bice bitandukanye by’Umujyi wa Bangui nk’ahitwa Rond-Point du Serpent, insengero zari zakubise zuzuye abantu, ntabyo kwikanga Coronavirus yahejeje abandi mu ngo, maze abantu barabyina karahava, bashimira Imana ibinjije mu mwaka mushya.

Ku rundi ruhande, mu mujyi rwagati, utubari twari twafunguye kare, kuko kugera nka saa Munani henshi bateraga intebe nk’abiteze umunsi mukuru. Ni nako abafite ibyokezo bari batangiye kubikongeza mu moko menshi y’inyama ziribwa muri Centrafrique batangiye kwitegura kuzitunga ku mishito.

Ahagana saa Yine z’ijoro nibwo hatangiye kuraswa ibishashi by’umwaka mushya, nta hantu hihariye byakorewe ahubwo buri muntu wese ubishoboye yashakaga ibiri mu bushobozi bwe maze ukabona yakije umuriro mu kirere.

Abenshi mu barasaga ibyo bishashi ni urubyiruko, gusa uko byageraga saa Sita z’ijoro, mu kirere hatangiye kumvikanamo amasasu avanze na bya bishashi.

Amakuru IGIHE yabashije kumenya ni uko ayo masasu yaraswaga mu kirere n’abasirikare ba leta bari bamaze gufata ku gacupa basazwe n’ibyishimo ubundi bakarasa mu kirere.

Twasuye umujyi wose ahagana saa Saba z’ijoro, abantu bari uruvunganzoka, nka bamwe umuntu abona iyo Rayon Sports yakinnye na APR FC i Remera iyo umukino urangiye.

Abasore bagendaga kuri moto bahagaze, bavuza amahoni, basakuza mu majwi yo hejuru, abandi bari kubyina mu muhanda rwagati bizihiwe ku buryo wabonaga neza ko umwaka bawutashye.

Abasirikare b’u Rwanda bari mu muhanda kugera mu masaha y’igitondo bacunze umutekano, igikorwa batangiye saa Kumi n’imwe z’umugoroba.

Umwe mu baganiriye na IGIHE yagize ati “Ni ikimenyetso cy’uko batekanye, kuko ubusanzwe iyo bikanga ikintu, bose baba bari mu ngo zabo, bavuye mu muhanda kare”.

Ingabo z'u Rwanda zishimwe umusanzu wazo mu kubungabunga umutekano muri CentrafriqueIngabo z'u Rwanda zishimwe umusanzu wazo mu kubungabunga umutekano muri Centrafrique
Kugera saa Cyenda z'ijoro, Ingabo z'u Rwanda zari zikiri kuzenguruka mu Mujyi wa Bangui
Kuba abaturage bagiye mu muhanda bagakesha ni ikimenyetso cy'umutekano uhari, abazi iki gihugu basobanura ko iyo ibintu bitameze neza nta muntu uba utamba
Mu Mujyi wa Bangui, ibirumbeti, amafirimbi, ibishashi by'umwaka mushya n'amasasu byari bivanze mu kirere

Amafoto: Philbert Girinema - Bangui


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .