Urukingo rwa COVID-19 rwakozwe n’u Bushinwa rwatangiye gutangwa muri Sénégal

Yanditswe na Ndahayo Emmanuel
Kuya 24 Gashyantare 2021 saa 08:03
Yasuwe :
0 0

Urukingo rwa Sinopharm rwakorewe mu Bushinwa, rwatangiye gutangwa muri Sénégal, nyuma y’uko icyo gihugu cyakiriye inkingo 200 000 za mbere mu cyumweru gishize.

Sinopharm ni rumwe mu nkingo ziri gukorerwa mu Bushinwa, aho rufite ubushobozi bwo kurinda Covid-19 ku kigero cya 79%.

Sénégal yiyongereye ku rutonde rw’ibindi bihugu byinshi bimaze kwakira urukingo ndetse zatangiye gutangwa kuri uyu wa Kabiri. Ku ikubitiro, Minisitiri w’Ubuzima muri icyo gihugu, Abdoulaye Diouf Sarr, niwe muntu wa mbere wahawe urwo rukingo, ashagawe n’abandi bayobozi bakuru b’icyo gihugu na bo bazihawe.

Byitezwe abakora mu nzego z’ubuzima ndetse n’abasanganywe izindi ndwara ari bo ba mbere bazahabwa urwo rukingo.

Uru rukingo rwatangiye gukoreshwa mu bihugu byiganjemo ibyo mu Burasirazuba bwo Hagati n’iby’Abarabu nka Misiri, Maroc, Peru, Leta Zunze Ubumwe z’Abarabu, Bahrain n’ibindi.

Perezida w’u Bushinwa, Xi Jin Ping, aherutse kuvuga ko igihugu cye kizashyira imbaraga mu gufasha ibihugu birimo ibyo muri Afurika kubona inkingo za Covid-19 mu buryo bworoshye,kugira ngo uyu Mugabane utazasigara inyuma mu rugamba rwo kurandura COVID-19.

Mu Bushinwa kandi hari gukorerwa izindi nkingo zirimo CoronaVac, zamaze gutangwa mu bihugu birimo Brésil n’ibindi byinshi byagaragaje ubushake bwo kubona urwo rukingo.

Mu gihe ku Isi hakomeje kugaragara ikibazo cy’ubucye bw’inkingo, ibihugu birimo u Bushinwa bimaze gutera imbere bihanzwe amaso cyane ku Isi mu gufasha ibyiganjemo ibikiri mu nzira y’amajyambere nyuma y’uko ibindi bikize byihariye igice kinini cy’inkingo zose zimaze gukorwa, bimwe bikanagura izirenze umubare w’abaturage zifite.

Sénégal yatangiye gutanga inkingo za COVID-19 zakorewe mu Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .