00:00:00 IGIHE NETWORK KN KINYARWANDA EN ENGLISH FR FRANCAIS

Imitungo ya Isabel dos Santos ifite agaciro ka miliyari 1$ yafatiriwe

Yanditswe na IGIHE
Kuya 27 Ukuboza 2022 saa 02:08
Yasuwe :

Urukiko rw’Ikirenga rwo muri Angola rwategetse ko imitungo myinshi y’umukobwa w’uwahoze ari Perezida w’iki gihugu, Isabel dos Santos, ibarirwa agaciro ka miliyari imwe y’amadolari, ifatirwa, nk’uko byasabwe n’ubushinjacyaha.

Igitangazamakuru cya leta, Jornal de Angola, cyatangaje ko iki cyemezo gishingiye ku bimenyetso by’uko Isabel dos Santos hari ibyaha yakoze byo kunyereza umutungo, iyezandonke n’ibindi bihanwa n’amategeko.

Umucamanza Daniel Geraldes wasinye kuri uyu mwanzuro wo kuwa 19 Ukuboza 2022, yavuze ko "amafaranga yose ari kuri konti za Isabel Dos Santos muri banki zose n’indi mitungo yose ifatiriwe".

Zimwe muri izi konti ziri mu bihugu nka Mozambique, Cape Verde na Sao Tome and Principe. Hafatiriwe kandi imigabane ingana na 70% uyu mugore afite mu kigo cy’itumanaho cyo muri Mozambique cyitwa Mstar, n’indi migabane nk’iyo afite mu kigo Upstar Comunicação.

Urukiko kandi rwategetse ko hafatirwa imigabane 100% Isabel dos Santos, afite mu kigo UnitelL T+ muri Cape Verde na Unitel STP muri Sao Tome and Principe. Hari kandi Embalvidro, Unitel International Honding na Unitel International.

Mu 2020, ihuriro ry’abanyamakuru bakora inkuru zicukumbuye, International Consortium of Investigative Journalists bashyize hanze icyegeranyo bise Luanda Leaks, gikubiyemo ibyaha by’ubukungu Isabel yagiye akora, ari nabyo byatumye yigwizaho ubukungu.

Iryo cukumbura ryagaragaje amanyanga uwo mugore yagiye akora mu bucuruzi afite butandukanye burimo ubw’amabuye y’agaciro, itumanaho, amabanki, ubwubatsi n’ibindi.

Isabel w’imyaka 49 yahoze afite imyanya ikomeye mu butegetsi bwa se, dore ko yayoboye sosiyete ishinzwe ubucukuzi bw’ibikomoka kuri peteroli, Sonangol.

Uyu mugore yagiye ahakana ibi byaha ashinjwa, akavuga ko ari impamvu za politiki ziri gukoreshwa n’ubutegetsi buriho ubu muri Angola.

Ubutegetsi bwa Angola ndetse na Portugal bwafatiriye imitungo na konti za banki za Isabel mu gihe agikorwaho iperereza.

Ubucuruzi bwe busa nk’ubwahungabanyijwe n’ibyo byemezo yafatiwe guhera ubwo se yavaga ku butegetsi mu 2017. Ni ibyemezo kandi byafashwe na Leta zunze Ubumwe za Amerika.

Ubusanzwe Isabel aba mu bihugu bitandukanye afitemo imitungo nka Dubai na Londres, icyakora bivugwa ko akunze no gusura Portugal.

Se wa Isabel ari we José Eduardo dos Santos yapfuye muri Nyakanga 2022 kubera uburwayi. Yayoboye Angola guhera mu 1979 kugeza mu 2017.

Umugabo wa Isabel, Sindika Dokolo yapfuye mu 2020 arohamye hafi ya Dubai.

Hari urukiko rwo mu Buholandi rwagaragaje ko Dokolo n’umugore we baguze imigabane muri sosiyete y’ibikomoka kuri peteroli, Galp, mu buryo bunyuranyije n’amategeko.

Rwanzuye ko Dos Santos agomba gusubiza miliyoni 500 z’amadolari yatanzwe binyuze muri Sonangol ubwo Isabel yayiboraga.

Urukiko rwategetse ko imitungo ya Isabel dos Santos ifite agaciro ka miliyari 1$ ifatirwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .