Umwiryane uri hagati ya Perezida Tshisekedi na Kabila ushobora gushyira ahazaza ha Congo mu kangaratete

Yanditswe na Iradukunda Serge
Kuya 12 Ukuboza 2020 saa 10:59
Yasuwe :
0 0

Abasesenguzi muri Politike bagaragaje hari impunge z’uko ibibazo biri hagati ya Perezida wa Repubulika Iharanira Demokarasi ya Congo, Félix Tshisekedi n’uwo yasimbuye Joseph Kabila bishobora kugonganisha imikorere y’inzego ndetse bigashyira ahazaza h’iki gihugu mu kaga.

Ibibazo bya Tshisekedi na Joseph Kabila bishingiye ku mpuzamashyaka zabo, aho iya Tshisekedi, CASH, ishinja FCC ya Kabila ko hari amategeko n’imishinga inteko yanga gutora kubera ko itajyanye n’ibyo ishaka.

FCC nayo ishinja CASH gufata imyanzuro imwe n’imwe atagishije inama kandi aribyo bemeranyije Tshisekedi ajya gufata ubutegetsi.

Ibibazo hagati y’Ishyaka rya Perezida Tshisekedi n’iry’uwo yasimbuye Joseph byafashe indi ntera muri Nyakanga 2020, ubwo uyu mukuru w’igihugu yashyiragaho abayobozi bashya mu bucamanza n’igisirikare.

FCC ya Joseph Kabila yavuze ko ibyo Tshisekedi yakoze binyuranyije n’itegeko kuko abantu bose yashyize mu myanya ngo atigeze agisha inama Inteko Ishinga Amategeko, Guverinoma cyangwa Inteko Nkuru y’Ubucamanza.

Mu bamaganye iki cyemezo harimo na Minisitiri w’Intebe, Sylvestre Ilunga Ilunkamba nawe uturuka mu mpuzamashyaka FCC.

Ikindi cyababaje abo muro FCC ni uko mu bahawe imyanya mishya kandi hatarimo Général John Numbi, inkoramutima ya Joseph Kabila wahoze ari Umugenzuzi Mukuru mu gisirikare. Kudahabwa umwanya mushya byababaje abo mu ishyaka FCC ndetse mu nama bakoze bagaragaje ko ari ukumusuzugura no gusuzugura ishyaka muri rusange.

Perezida Tshisekedi yaje gukoma rutenderi ku wa 6 Ukuboza ubwo yatangazaga ko yasheshe ubufatanye bw’impuzamashyaka ye CASH na FCC ya Joseph Kabila.
Tshisekedi yanavuze ko Inteko Ishinga Amategeko yiganjemo abadepite ba FCC, nikomeza kwitambika imishinga ye igamije gukemura ibibazo biri mu gihugu, azayisesa.

Uyu mwuka mubi waje gutizwa umurindi n’iyeguzwa rya Jeanine Mabunda wari Perezida w’Inteko Ishinga Amategeko. Uyu mugore wo mu ishyaka rya Joseph Kabila yari amaze igihe yinubirwa n’abo mu mpuzamashyaka ya Tshisekedi gufatanya n’abadepite baturuka mu ishyaka rimwe bakitambika imigambi ya Tshisekedi.

Tshisekedi yatangaje ko agiye gushyiraho umuntu uzamufasha gushakisha ubumwe n’andi mashyaka ari mu Nteko, bakagira ubwiganze buruta ubw’impuzamashyaka ya Kabila kugira ngo bimworohereze gushyira mu bikorwa ibyo yemereye abaturage.

Ibi byaje bikurikira kandi igikorwa cyigayitse cy’abadepite bagaragaye barwanira mu ngoro y’Inteko Ishinga Amategeko.

Ikirushijeho guteza inkeke ni uko ubuhuza bugeragezwa muri iki kibazo nta musaruro na muke butanga. Mu bagerageje guhaza impande zombi harimo Kalonzo Musyoka wahoze ari Visi Perezida wa Kenya, wari woherejwe na Perezida w’iki gihugu, Uhuru Kenyatta.

Mu bandi bagerageje guhuza impande zombi harimo Umuyobozi wa Komisiyo y’Umuryango w’Ubumwe bwa Afurika, Moussa Faki wanigiriye i Kinshasa, ndetse n’Intumwa za Perezida w’u Bufaransa.

Radiyo Ijwi rya Amerika iherutse gutangaza ko Perezida Tshisekedi, ari gushaka amashyaka yakunganira irye kugira ngo hashyirweho Leta nshya kuva atangaje ko asheshe impuzamashyaka yari ihuriwemo n’amushyigikiye CASH na FCC, igizwe n’amashyaka ashyigikiye Joseph Kabila wahoze ari perezida w’icyo gihugu.

Ibiri kuba bishora gushyira ahazaza ha Congo mu kangaratete

Umushakashatsi ku bibazo by’intambara, umutekano na poliike y’akarere akaba n’umwarimu muri Kaminuza ya Rotterdam mu Buholandi, Delphin Ntanyoma, yabwiye VOA ko ibyabaye bishobora gukurikirwa n’ibihe bibi muri Congo.

Yavuze ko impuzamashaka yasheshwe yari isanzwe itavuga rumwe ariko byatinze kujye ku mugaragaro. Yemeza ko ibyo Perezida Tshisekedi yakoze bigaragaza ko aya mashyaka bakoranaga yari asanzwe amunaniza, bityo mu rwego kwitegura amatora yo mu 2023, akaba yahisemo gusesa ubwo bufatanye.

Uyu mushakashatsi yavuze ko ibi bishobora gukurikirwa n’amananiza hagati y’inzego za Leta muri Repubulika Iharanira Demokarasi ya Congo.

Urugero nk’imikoranire hagati ya Peresidansi, abaminisitiri ndetse n’Inteko Ishinga Amategeko yatangaje ku munsi w’ejo ko ihagaritse imirimo yayo kugera igihe kitazwi.

Uyu mushakashatsi abona ko aya amananiza hagati y’inzego za Leta no kutumvikana hagati y’abashyigikiye Perezida Tshisekedi na Kabila wahoze ayobora icyo gihugu bishobora gukurikirwa n’ibihe bibi mu gihugu nk’imvururu mu gisirikare ndetse no mu baturage.

Agaragaza impungennge ko biramnutse bibaye bityo zishobora no kugera mu karere k’ibiyaga bigari kose.

Izi mpungenge Delphin Ntanyoma azihuriyeho n’uhagarariye Umuryango w’Abibumbye muri Congo, Leïla Zerrougui, ndetse n’Umunyamabanga Mukuru w’uyu muryango, Antonio Guterres.

Leïla Zerrougui aherutse gutangaza ko ibiri kuba muri Congo bishobora “gutuma habaho ukugongana kw’inzego.”

Antonio Guterres we yavuze ko ibintu bishobora gusubira irudubi. Ati “Umwuka mubi mu ihuriro riyoboye igihugu, ushobora gushyira mu kaga umutuzo wa politike, ndetse ukagabanya kugeza ku busa ibyari byagezweho kuva mu matora ya 2018 ndetse n’ihererekanya ry’ubutegetsi ryabayeho mu mahoro.”

Umwiryane uri hagati ya Perezida Tshisekedi na Joseph Kabila ushobora gushyira ahazaza ha Congo mu kangaratete

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .