00:00:00 IGIHE NETWORK KN KINYARWANDA EN ENGLISH FR FRANCAIS

Umuzungu yafashwe yihagarika mu bikoresho by’umwirabura; impunzi z’Abarundi mu kaga, Coup d’état muri Mali: Ay’ingenzi muri Afurika

Yanditswe na Kanamugire Emmanuel
Kuya 17 May 2022 saa 09:34
Yasuwe :

Umunyeshuri wo muri Kaminuza yo muri Afurika y’Epfo yafashwe amashusho ari kwihagarika mu bikoresho bya mugenzi we w’umwirabura.

Byabereye muri Kaminuza ya Stellenbosch aho ubuyobozi bwayo bwabwiye BBC ko bugiye gukora iperereza ku cyihishe inyuma y’iki gikorwa kandi ko hazafatwa ingamba zirimo kwirukana uyu munyeshuri no kuba yagezwa imbere y’ubutabera.

Abanyeshuri bo muri iyi kaminuza bigaragambije basaba ko uyu munyeshuri wo mu mwaka wa mbere afatirwa ibihano bikakaye.

Ubuyobozi bwa kaminuza hamwe n’abandi bantu babonye amashusho yakwirakwijwe ku mbuga nkoranyambaga agaragaza uwo munyeshuri yihagarika mu cyumba cya mugenzi we, bavuze ko ibyo bifitanye isano n’ivangura rishingiye ku ruhu.

Umuvugizi wa Kaminuza ya Stellenbosch, Martin Vijoen, yavuze ko bamagana iki gikorwa kibabaje cyane ko uwagikorewe yahungabanye akananirwa kwakira ibyamubayeho.

Ibitangazamakuru byo muri Afurika y’Epfo byavuze ko uwahohotewe yari aryamye atungurwa no kumva umuntu winjiye mu cyumba cye.

Muri video yafashwe, yumvikana abaza mugenzi we w’umuzungu impamvu ari kwihagarika ku bikoresho bye.

Iki gikorwa cyashyize umucyo ku rugamba Afurika y’Epfo ikomeje kurwana mu guca ivanguraruhu nyuma y’ibinyacumi by’imyaka hashyizwe iherezo kuri Apartheid.

Umunyeshuri w'umuzungu muri Kaminuza yo muri Afurika y'Epfo yafashwe amashusho anyara ku bikoresho bya mugenzi we w'umwirabura

Mali: Igisirikare cyatangaje iburizwamo rya Coup d’état

Igisirikare cyo muri Mali cyatangaje ko cyaburijemo Coup d’état mu cyumweru gishize yari irangajwe imbere n’abasirikare bakuru bashyigikiwe n’igihugu cyo mu Burengerazuba bw’Isi kitatangajwe.

Itangazo ryerekeye aya makuru ryasomwe kuri Televiziyo y’Igihugu rivuga ko “itsinda ry’abantu badashyigikiye abasirikare bafashe ubutegetsi muri Mali ari bo bagerageje guhirika ubutegetsi mu ijoro ryo ku wa 11 rishyira ku wa 12 Gicurasi 2022.”

“Aba abasirikare bari bashyigikiwe n’igihugu cyo mu Burengerazuba bw’Isi. Uyu mugambi waburijwemo ku bwo kuba maso n’ubunyamwuga bw’igisirikare.”

Rikomeza rivuga ko hari abatawe muri yombi kandi ko bagomba kugezwa imbere y’ubutabera nubwo aho bahereye hatatangajwe ndetse n’imyirondoro yabo ikaba itashyizwe ahagaragara.

Amakuru yavuye mu gisirikare avuga ko abagera ku 10 ari bo batawe muri yombi ariko ko iki gikorwa gikomeje ndetse guverinoma yavuze ko ibikenewe byose byatanzwe kugira ngo hakorwe iperereza ku bafatanyacyaha bose.

Mali yabayemo ihirika ry’ubutegetsi inshuro ebyiri uhereye muri Kanama 2020 ubwo igisirikare cyakuragaho Perezida Ibrahim Boubacar Keita.

Ibihugu byo mu Burengerazuba bwa Afurika biri kurwana n’imitwe y’iterabwoba ifitanye imikoranire na Al Qaeda na Islamic State kuva mu 2012. Iki kibazo kandi cyageze no muri Niger na Burkina Faso.

Mali yatangaje ko hari igihugu cyo mu Burayi cyihishe inyuma y'igeragezwa rya Coup d'Etat ryabaye mu cyumweru gishize

Joe Biden yategetse ko ingabo za Amerika zisubira muri Somalia

Perezida wa Leta Zunze Ubumwe za Amerika, Joe Biden, yategetse ko ingabo z’iki gihugu zisubira muri Somalia mu rugamba rwo kurwanya imitwe y’iterabwoba nyuma y’aho zivanyweyo ku butagetsi bwa Donald Trump.

Trump yavanye muri iki gihugu ingabo zigera kuri 700 mu 2020.

Perezida Hassan Sheikh Mohamud, wahoze ari impirimbanyi y’amahoro, yijeje ko azakorana n’abafatanyabikorwa bo ku rwego mpuzamahanga ubwo yongeraga gufata ubutegetsi kuri uyu wa Mbere.

Somalia imaze imyaka itari mike yarazahajwe n’ibibazo by’umutekano muke iterwa n’imitwe y’iterabwoba igendera ku mahame y’idina ya kiyisilamu yigaruriye uduce twinshi tw’iki gihugu.

Ingabo za Amerika Trump yakuye muri Somalia zafatanyaga n’izigera ku bihumbi 19 z’Umuryango wa Afurika Yunze Ubumwe kubuganbunga amahoro muri iki gihugu.

Kuri ubu hagiye ingabo 500 za Amerika ni zo zigiye koherezwa muri Somalia.

Ingazo za Amerika zigiye gusubira muri Somalia

Uganda: Abatavuga rumwe n’ubutegetsi basizoye basaba Polisi kurekura Dr Kizza Besigye

Ihuriro ry’abaharanira impinduka muri Demokarasi (FDC) ryasabye inzego z’umutekano muri Uganda kubahiriza icyemezo cy’urukiko cyafashwe mu 2016 kibuza kugota urugo rwa Dr Kizza Besigye wigeze kwiyamamariza kuyobora iki gihugu mu bihe bitandukanye.

Umunyamabanga Mukuru wungirije wa FDC, Harold Kaija, yabwiye itangazamakuru kuri uyu wa Mbere ko polisi yasabwe kuva ku rugo rwa Dr Besigye ruherereye mu gace ka Kasangati.

Ati “Dufite icyemezo cy’urukiko kimaze imyaka itanu kivuga ko bibujijwe gufungira Dr Kizza Besigye iwe mu rugo. Turasaba ababishinzwe kwirukana polisi ku rugo rwa Besigye.”

Yavuze ko aho kugotera uyu munyepolitiki iwe mu rugo, leta ikwiye gukemura ibibazo yegeragezaga kugaragaza bijyanye n’izamuka ry’ibiciro by’ibiribwa.

Dr Besigye yafungiwe iwe kuva mu cyumweru gishize ubwo yageragezaga gutegura imyigaragambyo yamgana izamuka ry’ikiguzi cy’ubuzima.

Dr Kizza Besigye umaze icyumweru afungiye iwe mu rugo yasabiwe n'abamushyigikiye kurekurwa

Kenya: Raila Odinga na William Ruto batoranyije abazabungiriza nibatsinda amatora

Umukandida w’ishyaka ‘Azimio la Umoja One Kenya’, Raila Odinga yagennye
Martha Karua nk’uzamwungiriza naramuka yegukanye intsinzi mu matora ya Perezida wa Kenya ateganyijwe muri Kanama uyu mwaka.

Kuri uyu wa Mbere, Odinga yashimagije uyu mugore wahoze ari Minisitiri w’Ubutabera ku bw’umuhate we n’izina yubatse mu byo guharanira uburenganzira bwa muntu.

Karua na we yavuze ko yishimiye kungiriza Odinga yizeza ko bazakora byinshi biteza imbere uburenganzira mu mibereho n’ubukungu bakagarurira icyizere cy’ubuzima ku bagitakaje.

Karua yinjiye muri politiki mu 1992 ubwo yatorerwaga kuba umudepite. Yabaye Minisitiri w’umutungo kamere w’amazi ku butegetsi bwa Mai Kibaki hagati ya 2003 na 2008 mbere yo kuba Minisitiri w’Ubutabera kugeza mu 2009 ubwo yeguraga kuri izi nshingano.

Itsinda ry’abanyamuziki rikomeye, Sauti Sol, ryatangaje ko rigiye kurega Raila Odinga, rimushinja gukoresha indirimbo yabo yitwa Extravanganza mu kwiyamamaza no kwerekana Martha Karua nk’uwamubera visi perezida natsinda.

Mu itangazo bashyize kuri Twitter, iri tsinda ryinubiye gukoresha indirimbo yabo mu kwiyamamaza kandi ryo nta ruhande ririho.

Ku rundi ruhande Visi Perezida, William Ruto, yahisemo Depite Rigathi Gachagua ku Cyumweru.

Gachagua yabaye umuyobozi w’akarere ka Molo na Laikipia.

Raila Odinga yatoranyije Martha Karua ngo azamubere Visi Perezida natsinda

Impunzi z’Abarundi muri Tanzania na Congo ziri mu kaga

Imiryango Iharanira Uburenganzira bwa muntu yakoze raporo igaragaza uburyo impunzi z’Abarundi zahungiye mu bihugu by’akarere ka Afurika y’Iburasirazuba zibayeho aho ivuga ko abari muri Tanzania no muri Repubulika Iharanira Demokarasi ya Congo bafite ibibazo bikomeye.

Muri ibyo bibazo harimo kuba zitegekwa gutaha ku ngufu ndetse zimwe zigashimutwa.

Umuryango wita ku mpunzi, HCR, ishami ryo mu Karere ka Afurika wabwiye Ijwi rya Amerika ko amakuru y’uko impunzi ziri muri Tanzania zifashwe nabi uyumva ariko ko wo nta we utegeka gutaha atabigizemo ubushake.

Umuryango urwanya ihohoterwa (Action des chrétiens pour l’abolition de la torture, ACAT-Burundi), ukorera hanze y’igihugu, ni wo wafashe iya mbere mu gukora iperereza harebwa imibereho y’izi mpunzi mu bihugu zahungiyemo.

Umwaka ushize ibirego nk’ibyo byari byagaragajwe n’Umuryango wa Afurika Yunze Ubumwe, wavugaga ko utewe impungenge n’imibereho y’impunzi z’Abarundi muri Tanzania.

Uwo muryango werekanye ko ari ihohoterwa rinyuranye n’amasezerano mpuzamahanga arengera impunzi.

Impunzi z'Abarundi zahungiye muri Tanzania biravugwa ko zifite ibibazo birimo guhatirwa gutaha no gushimutwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .